*ການຄ້າການຂາຍດຽວນີ້ ໄປຕາມຍຸກຕາມສະໄໝແຫ່ງຄວາມກ້າວໜ້າທາງເຕັກໂນໂລຊີ ໂດຍນໍາໃຊ້ເຄືອຂ່າຍອິນເຕີເນັດນໍາທາງ. ນັບແຕ່ເກີດການລະບາດຂອງພະຍາດໂຄວິດ 19, ຢູ່ປະເທດເຮົາຄ່ອຍມີການຄ້າຂາຍຜ່ານລະບົບອອນ ລາຍຄືຫລາຍປະເທດ. ນັບແຕ່ນັ້ນມາການຄ້າຂາຍຜ່ານລະບົບເອເລັກໂຕຣນິກ ຫລື ອອນລາຍກໍ່ຄ່ອຍໆຂະຫຍາຍຕົວຕາມກະແສຟອງຂອງການພັດທະນາ.

    ໃນປີ 2021 ໄດ້ມີການວິໄຈຢູ່ພາຍໃນເຫັນວ່າປະເທດເຮົາ ໃນໄລຍະນັ້ນການຄ້າເອເລັກໂຕຣນິກ ໄດ້ເຂົ້າສູ່ໄລຍະເລີ່ມຕົ້ນ ເຊິ່ງອາດແຕກຕ່າງຈາກຫລາຍປະເທດ ທີ່ດໍາເນີນມາຫລາຍປີແລ້ວຕາມສະພາບຈຸດພິເສດ ແລະ ເງື່ອນໄຂຂອງໃຜ  ລາວບໍ່ເວົ້າກັນ. ການຄ້າຂາຍມີສ່ວນລອງຜິດລອງຖືກໃນຮູບແບບ-ວິທີ ເພາະເປັນອັນໃໝ່ສໍາລັບພວກເຮົາ. ສ່ວນວ່າເຮັດຖືກຕ້ອງຕາມລະບຽບກົດໝາຍ ຫລື ບໍ່ນັ້ນກໍ່ມີສອງດ້ານໄປພ້ອມກັນສະເໝີ, ສໍາຄັນແມ່ນໄດ້ມີການຄຸ້ມຄອງກັນໃຫ້ເຂົ້າສູ່ລະບຽບກົດໝາຍ.

   ຕົກມາໃນໄລຍະສອງປີມານ້ີ ເຫັນວ່າການຄ້າເອເລັກໂຕຣນິກ ຂະຫຍາຍຕົວຢາກວ່າແຮງພໍສົມຄວນ, ອາດຍ້ອນຄວາມຕ້ອງການພາຍໃນ ແລະ ກະແສຟອງຂອງການຄ້າໃນພາກພື້ນ ແລະ ສາກົນ ກະທົບໃສ່? ແນ່ນອນວ່າການຄ້າເອເລັກໂຕຣນິກ ກໍ່ມີທັງຂໍ້ສະດວກ ແລະ ທ້າທາຍ. ເວົ້າສະເພາະການຄຸ້ມຄອງການຄ້າເອເລັກໂຕຣນິກ ກໍ່ຈະບໍ່ແຕກຕ່າງກັນກັບການຄຸ້ມຄອງດ້ານອື່ນໆທີ່ມີທັງກາລະໂອກາດ ແລະ ສິ່ງທ້າທາຍ.

    ບາງບັນຫາທີ່ຖືກຕັ້ງຂຶ້ນ ກ່ຽວກັບການຄ້າເອເລັກໂຕຣນິກ, ຕາມທີ່ເກັບກໍາມາໄດ້ ອັນເປັນທັດສະນະທາງວິຊາການມາຮອດໄລຍະຊຸມປີປັດຈຸບັນ ຄື:  ພື້ນຖານໂຄງລ່າງທຸລະກິດເອເລັກໂຕຣນິກ? ການຄຸ້ມຄອງຂໍ້ມູນ? ການຊໍາລະເງິນທາງ ເອເລັກໂຕຣນິກ? ດ້ານລະບຽບການ?...ບັນດາທັດສະນະເຫັນວ່າ, ພວກເຮົາໄດ້ພື້ນຖານໂຄງລ່າງທ່ີຈໍາເປັນຮອງຮັບເປັນພື້ນຖານໃນລະດັບໜຶ່ງ; ມີບັນດານິຕິກໍາເຊັ່ນ ກົດໝາຍວ່າດ້ວຍອາຊະຍາກໍາທາງອິນເຕີເນັດ, ກົດໝາຍວ່າດ້ວຍລາຍ ເຊັນເອເລັກໂຕຣນິກ, ກົດໝາຍວ່ດ້ວຍການປົກປ້ອງຂໍ້ມູນເອເລັກໂຕຣນິກ, ກົດໝາຍວ່າດ້ວຍທຸລະກໍາທາງເອເລັກໂຕຣນິກ, ກົດໝາຍວ່າດ້ວຍເຕັກໂນໂລຊີຂໍ້ມູນຂ່າວສານ ແລະ ການສ່ືສານ...ບັນດານິຕິກໍາເຫລົ່ານີ້ຖືວ່າເປັນເຄື່ອງມືພື້ນ ຖານໃນການຄຸ້ມຄອງຂໍ້ມູນດີຈີຕອນ ທີ່ປິ່ນອ້ອມການຄ້າເອເລັກໂຕຣນິກ ເພື່ອຮັບປະກັນຄວາມເຊື່ອໝັ້ນລະຫວ່າງຜູ້ຊື້-ຜູ້ຂາຍ, ສ້າງສະພາບແວດລ້ອມທີ່ດີໃຫ້ແກ່ທຸລະກິດ ແລະ ຄວາມເປັນທໍາ.

   ບັນດາທັດສະນະຍັງໃຫ້ເຫັນວ່າ, ເພື່ອເຮັດໃຫ້ການປົກປ້ອງ ຄຸ້ມຄອງຂໍ້ມູນ ລະຫວ່າງຜູ້ເຮັດທຸລະກໍາການຄ້າເອເລັກໂຕຣນິກຕ່າງໆ ມີປະສິດທິຜົນນັ້ນ, ການສ້າງຄວາມຮັບຮູ້ ແລະ ເຂົ້າໃຈໃຫ້ແກ່ສັງຄົມກ່ຽວກັບລະບຽບການຕ່າງໆທີ່ກ່ຽວ ຂ້ອງກັບການປົກປ້ອງຂໍ້ມູນ ແມ່ນສໍາຄັນຫລາຍໂດຍຜ່ານການຈັດຕ້ັງປະຕິບັດດ້ວຍຮູບແບບ-ວິທີການຕ່າງໆ ເຊັ່ນ ການເຜີຍແຜ່ຂໍ້ມູນດ້ານນິຕິກໍາ, ການຝຶກອົບຮົມ, ການຈັດເວທີປຶກສາຫາລື ລະຫວ່າງ ພາກທຸລະກິດ-ພາກລັດ.

   ເຖິງຢ່າງໃດກໍ່ດີ ໃນສະພາບຕົວຈິງ ຕາມບັນດາທັດສະນະເຫັນວ່າລະບຽບການສະໜັບສະໜູນບາງອັນຍັງໃໝ່, ຍັງບໍ່ທັນສາມາດເວົ້າໄດ້ວ່າບັນດາຫົວໜ່ວຍທຸລະກິດມີຄວາມເຂົ້າໃຈ ແລະ ຈັດຕັ້ງປະຕິບັດຢ່າງເປັນເອກະພາບກັນ ໂດຍສະ ເພາະດໍາລັດວ່າດ້ວຍການຄ້າເອເລັກໂຕຣນິກ ທີ່ໄດ້ປະກາດໃຊ້ແຕ່ປີ 2021 ແລະ ນິຕິກໍາອື່ນໆທີ່ປິ່ນອ້ອມ. ບາງນິຕິກໍາພັດທະນາຊ້າ? ທຽບໃສ່ບັນດາປະເທດພາກພື້ນກໍ່ຄືຄວາມຕ້ອງການຂອງການພັດທະນາຕົວຈິງຢູ່ພາຍໃນ...

    ບັນດາຄໍາເຫັນຍັງຄໍາເຫັນແລກປ່ຽນທີ່ຄວນເອົາໃຈໃສ່ :

1,ເລັ່ງຈັດຕັ້ງຜັນຂະຫຍາຍດໍາລັດວ່າດ້ວຍການຄ້າເອເລັກໂຕຣນິກ ໃຫ້ກວ້າງຂວາງ ແລະ ທົ່ວເຖິງໃນສັງຄົມ.

2,ທຸລະກິດການຄ້າຂາຍອອນລາຍຕ້ອງຫັນເຂົ້າສູ່ລະບົບຕາມລະບຽບການ ເພື່ອຮັບປະກັນການຄ້າທີ່ເປັນທໍາ ແລະ ການປະກບພັນທະໃຫ້ແກ່ພາກລັດໄດ້ຢ່າງມີປະສິດທິພາບ.

3,ສົ່ງເສີມ ແລະ ພັດທະນາພື້ນຖານໂຄງລ່າງທາງທຸລະກິດ ໃຫ້ແທດເໝາະກັບສະພາບການພັດທະນາຂອງທຸລະກິດ ພ້ອມທັງຮັບປະກັນການພັດທະນາຊັບພະຍາກອນມະນຸດໄປຄຽງຄູ່ກັນ.

4,ການກຽມຄວາມພ້ອມຂອງໜ່ວຍງານປົກປ້ອງຜູ້ບໍລິໂພກ ແລະ ຕິດຕາມກວດກາການແຂ່ງຂັນທາງດ້ານການຄ້າທີ່ເປັນທໍາ.

5,ອໍານວຍຄວາມສະດວກທາງດ້ານການຄ້າຜ່ານແດນ ຈາກກິດຈະກໍາທາງການຄ້າເອເລັກໂຕຣນິກລະຫວ່າງປະເທດ ທີ່ນັບມື້ນັບເພີ່ມຂຶ້ນ, ພ້ອມທັງຮັບປະກັນຄວາມປອດໄພທ່ີມີລະບົບກວດສອບສິນຄ້າເຂ້ົາ- ອອກທີ່ທັນສະໄໝ.

    ສະຫລຸບວ່າ ການຄ້າເອເລັກໂຕຣນິກ ຢູ່ປະເທດເຮົາເມື່ອສົມທຽບໃສ່ຫລາຍປະເທດພາກພື້ນ ຖືວ່າພວກເຮົາຍັງຢູ່ໃນໄລຍະເລີ່ມຕົ້ນເຂົ້າສູ່ລະບົບ, ເຖິງວ່າມີພື້ນຖານເຕັກນິກ, ນິຕິກໍາຄຸ້ມຄອງ, ມີເຄື່ອງມື...ອັນເປັນສິ່ງອໍານວຍຄວາມສະ ດວດແຕ່ກໍ່ຍັງມີສິ່ງທ້າທາຍຫລາຍປະການຢູ່ສໍາລັບພວກເຮົາ ໂດຍສະເພາະຕໍ່ການຄຸ້ມຄອງທີ່ມີປະສິດທິພາບ ແລະ ປະສິດທິຜົນເພື່ອໃຫ້ລັດ ໄດ້ຮັບປະໂຫຍດສູງສຸດ, ການດໍາເນີນການຄ້າທາງເອເລັກໂຕຣນິກຢູ່ພາຍໃຕ້ລະບຽບກົດໝາຍ.

ໂດຍ: ຄ້ອງໃໝ່

KPL