ຂປລ. ໃນວັນທີ 07 ສິງຫາ 2024 ທ່ານນາງ ຫລິງທອງ ແສງຕາວັນ ຮອງເຈົ້າແຂວງສະຫວັນນະເຂດ ໄດ້ໃຫ້ກຽດເປັນປະທານໃນພິທີເປີດຮ້ານ ເຊເວັ່ນ ອີເລຟເວັ່ນ ສາຂາ PTTLAO XENO ຢ່າງເປັນທາງການຖືເປັນຮ້ານສາຂາທໍາອິດທີ່ຕັ້ງຢູ່ໃນສະຖານທີ່ບໍລິການນໍ້າມັນ ແລະ ເປັນຮ້ານສາຂາທີ 7 ໃນ ສປປ ລາວ ໂດຍຮ້ານດັ່ງກ່າວຕັງຢູ່ຕັ້ງຢູ່ພາຍໃນ PTT station ຈະເລີນໄຊ 2 ບ້ານໄຊອຸດົມ ເມືອງອຸທຸມພອນ ແຂວງສະຫວັນນະເຂດ.

ຮ້ານສາຂາ PTTLAO XENO ບໍລິຫານໂດຍຜູ້ຮ່ວມທຸລະກິດ ເຊເວັ່ນ ອີເລຟເວັ່ນຂອງລາວ ເຊິ່ງເປັນໄປຕາມນະໂຍບາຍຂອງບໍລິສັດ ຊີພີ ອໍລ໌ ລາວຈໍາກັດ ໃນກຸ່ມ ຊີພີ ອໍລ໌ ທີ່ຕ້ອງການສົ່ງມອບໂອກາດ ແລະ ຄວາມຮູ້ໃນການບໍລິຫານຈັດການທຸລະກິດຂາຍຍ່ອຍສະໄໝໃໝ່ເພື່ອສ້າງຄຸນຄ່າ, ຜົນປະໂຫຍດໃຫ້ແກ່ ສປປລາວ ຕາມຄ່ານິຍົມ 3 ປະໂຫຍດຂອງເຄືອຈະເລີນໂພກກະພັນ. ສໍາລັບຈຸດແຂງຂອງພື້ນທີ່ນີ້ ຖືວ່າເປັນໜຶ່ງໃນເສັ້ນທາງຄົມມະນາຄົມຂົນສົ່ງຫລັກເສັ້ນທາງໜຶ່ງທັງຂອງນັກທຸລະກິດ ແລະ ນັກທ່ອງທ່ຽວ, ສາມາດເຊື່ອມຕໍ່ໄປຫາປະເທດຫວຽດນາມ ລວມທັງລົງໄປສູ່ສູນກາງເສດຖະກິດທາງພາກໃຕ້ຂອງ ສປປລາວ ທີ່ແຂວງຈໍາປາສັກໄດ້.

ການເປີດບໍລິການຮ້ານເຊເວັ່ນ ອີເລຟເວັ່ນຈະເຮັດໃຫ້ສະຖານທີ່ບໍລິການນໍ້າມັນແຫ່ງນີ້ໃຫ້ກາຍເປັນຈຸດບໍລິການຈຸດດຽວທັງໝົດ (One Stop Service) ອໍານວຍຄວາມສະດວກທັງຄົນ ແລະ ຍານພາຫະນະ ເຮັດໃຫ້ເກີດຄວາມຄຶກຄື້ນໃນພື້ນທີ່ ແລະ ຈະນໍາເອົາຜົນປະໂຫຍດໃຫ້ກັບຊຸມຊົນອ້ອມຂ້າງ ໂດຍສະເພາະສົ່ງເສີມການທ່ອງທ່ຽວໃນປີທ່ອງທ່ຽວລາວ. (Visit Lao Year) ຕາມນະໂຍບາຍຂອງພາກລັດ.

ທ່ານ ໂອໃດ ເສນສອນ ຜູ້ຮ່ວມທຸລະກິດ ເຊເວັ່ນ ອີເລຟເວັ່ນ ຜູ້ບໍລິຫານຮ້ານ ສາຂາ PTTLAO XENO ໄດ້ກ່າວວ່າເຊເວັ່ນ ອີເລຟເວັ່ນເປັນຮ້ານສະດວກຊື້ເປັນທີ່ຍອດນິຍົມໃນທົ່ວໂລກ, ນັກເດີນທາງ, ນັກທ່ອງທ່ຽວທີ່ເຄີຍມາໃຊ້ບໍລິການໃນປະເທດໄທລ້ວນແຕ່ມີຄວາມປະທັບໃຈໃນຄຸນນະພາບຂອງສິນຄ້າ ແລະ ການບໍລິການ. ເມື່ອ ຊີພີ ອໍລ໌ ເຂົ້າມາດຳເນີນທຸລະກິດຮ້ານ ເຊເວັ່ນ ອີເລຟເວັ່ນ ໃນ ສປປລາວ ກໍໄດ້ຮັບການຕອບຮັບເປັນຢ່າງດີຕັ້ງແຕ່ສາຂາທຳອິດຈຶ່ງໄດ້ຮັບຄວາມເຊື່ອໝັ້ນ. ໃນຂະນະດຽວກັນ ກໍໄດ້ຮັບການສະໜັບສະໜູນຈາກ ຊີພີ ອໍລ໌ ລາວ ໃນການຖ່າຍທອດຄວາມຮູ້ດ້ານເຕັກໂນໂລຊີ ເຊັ່ນດຽວກັນກັບ PTT LAO ເພື່ອເຮັດໃຫ້ການດໍາເນີນງານຄັ້ງນີ້ ປະສົບຜົນສໍາເລັດ ແລະ ເຊື່ອວ່າຈະ ການສົ່ງເສີມຄວາມເຂັ້ມແຂງທາງດ້ານເສດຖະກິດໃນອະນາຄົດ.

KPL