*ເພື່ອຈັດຕັ້ງຜັນຂະຫຍາຍມະຕຂອງກົມການເມືອງສູນກາງພັກ ສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍເສດຖະກິດ ເອກະລາດ ເປັນເຈົ້າຕົນເອງ (ສອຈ) ເຂົ້າສູ່ຊີວິດຕົວຈິງ ແລະ ນໍາໄປຈັດຕັ້ງປະຕິບັດໃນແຕ່ລະຂະແໜງການເພື່ອໃຫ້ປະກົດຜົນເປັນຈິງ ສ້າງໃຫ້ປະຊາຊົນມີວຽກເຮັດງານທໍາ, ມີອາຊີບທີ່ແນ່ນອນ ແລະ ມີລາຍຮັບທີ່ໝັ້ນຄົງຍາວນານ; ແນໃສ່ສ້າງຄວາມເຂັ້ມແຂງຮອບດ້ານໃຫ້ເສດຖະກິດຂອງແຂວງ; ແຂວງອັດຕະປືໄດ້ຈັດຕັ້ງເຊື່ອມຊຶມມມະຕິດັ່ງກ່າວ ໃຫ້ພະນັກ ງານຫລັກແຫລ່ງທົ່ວແຂວງ ປຸກລະດົບປະຊາຊົນບັນດາເຜ່ົາຫັນເອົາການຜະລິດກະສິກໍາ ເປັນປາຍແຫລມສໍາຄັນກາຍເປັນອາຊີບທີ່ໝັ້ນຄົງ, ຜະລິດເປັນສິນຄ້າໃຫ້ຫລາຍຂຶ້ນສະໜອງໃຫ້ພາຍໃນ ຫລຸດຜ່ອນການນໍາເຂົ້າ ແລະ ເປັນສິນຄ້າສົ່ງອອກ, ສ້າງລາຍຮັບໃຫ້ປະຊາຊົນສາມາດຫລຸດຜ່ອນອອກ ຈາກຄວາມທຸກຍາກ. ການນໍາແຂວງອັດຕະປື ຈຶ່ງຕົກລົງຫັນເອົາການປູກ, ການລ້ຽງສັດງົວ-ຄວາຍເປັນຟາມ, ຜະລິດພືດພັກ ແລະ ຜະລິດເຂົ້ານາເປັນລະບົບທັນສະໄໝປະສົມປະສານກັບແບບພື້ນບ້ານເພື່ອໃຫ້ໄດ້ຮັບຜົນຜະລິດຫລາຍຂຶ້ນກວ່າເກົ່າ, ໃນນັ້ນໄດ້ກໍານົດເອົາການປູກຖົ່ວລຽນ, ປູກໝາກຈອງ, ປູກກາເຟ ແລະ ປູກຫຍ້າລ້ຽງງົວ ເປັນປາຍແຫລມເສດຖະກິດຂອງແຂວງໃນຕໍ່ໜ້າ.

    ທ່ານ ວັນທອງ ກອງມະນີ ເຈົ້າແຂວງອັດຕະປື ໄດ້ກ່າວຕໍ່ກອງປະ ຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງອັດຕະປື ຊຸດທີ II ໃນທ້າຍເດືອນກໍລະກົດ 2024 ນີ້ວ່າ: ພາຍຫລັງມີມະຕິຂອງກົມການ ເມືອງສູນກາງພັກສະບັບເລກທີ 04/ກມສພ, ລົງວັນທີ 11 ເມສາ 2024. ແຂວງອັດຕະປື ຮີບຮ້ອນຈັັັັັດຕັ້ງເຜີຍແຜ່ຢ່າງກວ້າງຂວາງລົງເລິກສູ່ກຸ່ມເປົ້າໝາຍ ພ້ອມລົງປຸກລະດົມຜູ້ປະກອບການເພື່ອເປັນສ່ວນໜຶ່ງ ໃນການພັດທະນາເສດຖະກິດ- ສັງຄົມພາຍໃນແຂວງ ຂໍການຮ່ວມມືຈາກ ບໍລິສັດ ລາວອາຊຽນພັດທະນາກະສິກໍາ ຈໍາກັດ ມອບເຄື່ອງຈັກລົດໃຫຍ່ໃຫ້ໂຮງຮຽນວິຊາຊີບແຂວງ ອັດຕະປື ຈໍານວນ 5 ເຄື່ອງ, ຊຸດກະແຈສ້ອມແປງກົນຈັກໜັກ 10 ຊຸດ ເພື່ອຝຶກອົບຮົມສີມືແຮງງານໃຫ້ນັກຮຽນມີຄວາມຊຳນິຊໍານານ, ມອບໂຮງສີເຂ້ົາຂັດແຍກແບບທັນສະໄໝ 9 ເຄື່ອງ, ມອບເບ້ຍຖ່ົວລຽນ ຈໍານວນ 4.944 ເບ້ຍ ແລະ ມອບແນວພັນຫຍ້າລ້ຽງງົວອີກຈໍານວນໜຶ່ງ; ບໍລິສັດເອບີ ຈໍາກັດຜູ້ດຽວ ມອບເບ້ຍໝາກຈອງໃຫ້ແຂວງ ຈໍານວນ 1 ພັນ ກວ່າເບ້ຍ, ບໍລິສັດ ຮືກລອກ ກະສິກໍາມອບເຄື່ອງຈັກດໍານາຈໍານວນ 5 ເຄື່ອງ; ບໍລິສັດ ເພັດສະຫວ່າງ ຮ່ວມພັດທະນາກາເຟ ມອບເບ້ຍກາເຟ ຈໍານວນ 6 ພັນກວ່າເບ້ຍ, ສະໜອງແນວພັນຫຍ້າລ້ຽງງົວໃຫ້ແຂວງ ຈໍານວນ 5 ຊະນິດມູນຄ່າຫລາຍຕື້ກີບ ເປັນການປະກອບກະຕຸກຊຸກຍູ້ໃຫ້ວຽກງານກະສິກໍາພາຍໃນແຂວງມີບາດກ້າວໃໝ່.

    ທ່ານ ວັນທອງ ກອງມະນີ ກ່າວຕື່ມວ່າ: ສໍາລັບເບ້ຍຖົ່ວລຽນທີ່ໄດ້ຮັບມາແມ່ນມອບໃຫ້ຫ້ອງການກະສິກໍາ ເມືອງສະໜາມໄຊ ນໍາໄປແຈກຍາຍໃຫ້ປະຊາຊົນພາຍໃນເມືອງປູກຕາມສວນຂອງປະຊາຊົນ, ເບ້ຍໝາກຈອງ ແມ່ນແຈກຍາຍໃຫ້ປະຊາຊົນ ເມືອງຊານໄຊ ແລະ ເມືອງສະໜາມໄຊ ໂດຍສະເພາະເຂດແຊພະ-ແຊປ່ອງໄລ ປູກຟື້ນຟູໃຫ້ເປັນປ່າ ເພື່ອຕອບຮັບກິດຈະກໍາທ່ອງທ່ຽວໃນຕໍ່ໜ້າ, ສ່ວນເບ້ຍກາເຟແມ່ນມອບໃຫ້ປະຊາຊົນເມືອງຊານໄຊ ຊຶ່ງເປັນເຂດເນີນສູງສະພາບພື້ນທີ່ດີ ແລະ ອາກາດຄ້າຍຄືກັນກັບເຂດເມືອງປາກຊ່ອງ ແຂວງຈໍາປາສັກ. ສໍາລັບເຄື່ອງຈັກປູກເຂົ້າແມ່ນມອບໃຫ້ ປະຊາຊົນທີ່ຈັດຕັ້ງເປັນກຸ່ມປູກເຂົ້າ ໂດຍສະເພາະກຸ່ມປູກເຂົ້າຈ້າວກໍ່າ, ເຂົ້າຈ້າວແດງ, ເຂົ້າຈ້າວລະຄອນ ແລະ ເຂົ້າປະເພດອື່ນໆທີ່ເປັນເອກະລັກສະເພາະ ຂອງແຂວງອັດຕະປື.  ພ້ອມນັ້ນ, ແຂວງຍັງໄດ້ກໍານົດເອົາເຂົ້າກ່ອງ ເພື່ອສຸຂະພາບເປັນຜະລິດຕະພັນເອກະລັກຂອງແຂວງ ຊ່ຶງເປັນສິນຄ້າທ່ີມີຄວາມຕ້ອງການຂອງຕະຫລາດໃນປັດຈຸບັນ, ກໍານົດແຜນຜະລິດສິນຄ້າພາຍໃນໃຫ້ມີຫລາກຫລາຍຊະນິດ.

    ນອກຈາກຖືເອົາວຽກງານກະສິກໍາເປັນເສດຖະກິດປາຍແຫລມແລ້ວ, ແຂວງອັດຕະປື ຍັງໄດ້ຄົ້ນຄວ້າຈັດສັນປັບປຸງສະຖານທີ່ທ່ອງທ່ຽວໃຫ້ມີຄວາມພ້ອມໃນແຕ່ລະໄລຍະ, ການທ່ອງທ່ຽວຕິດພັນກໍາວຽກງານກະສິກໍາ. ແນໃສ່ສ້າງຄວາມເຂັ້ມແຂງໃຫ້ຜູ້ປະກອບການ ກໍຄືປະຊາຊົນບັນດາເຜົ່າ ໃຫ້ມີລາຍຮັບມີອາຊີບໝັ້ນຄົງຍາວນານ ແລະ ທັງເປັນການສ້າງຄວາມເຂັ້ມແຂງດ້ານເສດຖະກິດຂອງແຂວງກ້າວໄປສູ່ຄວາມເປັນເຈົ້າຕົນເອງໃນໃນອະນາຄົດ.

ແຫລ່ງຂໍ້ມູນຈາກ: ແຂວງອັດຕະປື

KPL