*ເພື່ອຕ້ອນຮັບການເປີດປີທ່ອງທ່ຽວ ແລະ ການເປັນປະທານອາຊຽນປີນີ້, ແຂວງວຽງຈັນ ຕັ້ງເປົ້າຈະດຶງດູດນັກທ່ອງທ່ຽວໃຫ້ໄດ້ຢ່າງໜ້ອຍ 7-8 ແສນຄົນພາຍໃນປີ 2024. ຫວ່າງບໍ່ດົນມານີ້, ພະແນກຖະແຫລງຂ່າວວັດທະນະທໍາ ແລະ ທ່ອງທ່ຽວໄດ້ລາຍງານວ່າ: ແຂວງວຽງຈັນ ໄດ້ສໍາເລັດການເປີດປີທ່ອງທ່ຽວລາວແລ້ວ ໃນນັ້ນໄດ້ມີຫລາຍກິດຈະກໍາທີ່ໜ້າສົນໃຈເຊັ່ນ: ການວາງສະແດງພາບຈໍາລອງວິຖີຊີວິດ, ສິລະປະວັດທະນະທໍາ ແລະ ກິດຈະກໍາການທ່ອງທ່ຽວຂອງແຕ່ລະທ້ອງຖິ່ນ; ມີງານຕະຫລາດ ນັດວາງສະແດງຜະລິດຕະພັນໜາກກ້ຽງຫວານ, ພຶດພັນຜົນຜະລິດທາງດ້ານກະສິກໍາ, ຫັດຖະກໍາ, ສິນຄ້າໂອດັອບ, ການຕັ້ງຮ້ານໂຄສະນາສິນຄ້າ ແລະ ການບໍລິການອື່ນໆ, ມີຮ້ານວາງສະແດງຂອງບັນດາເມືອງ, ລວມທັງພາກລັດ-ພາກທຸລະກິດຫລາຍ ກວ່າ 150 ຮ້ານ.  ທ່ົວແຂວງວຽງຈັນ ມີສະຖານທ່ີພັກແຮມທັງໝົດ 412 ແຫ່ງ, ຮ້ານອາຫານ-ກິນດື່ມ 362 ແຫ່ງ, ສະຖານທີ່ບັນເທີງ 31 ແຫ່ງ, ມີສະຖານທີ່ທ່ອງທ່ຽວທໍາມະຊາດ 238 ແຫ່ງ, ປະຫວັດສາດ 9 ແຫ່ງ ແລະ ວັດທະນະທໍາ 22 ແຫ່ງ, ມີບໍລິສັດທ່ອງທ່ຽວ 38 ບໍລິສັດ, ໜ່ວຍບໍລິການນໍາທ່ຽວ 64 ຫົວໜ່ວຍ ແລະ ຍັງມີທຸລະກິດບໍລິການທີ່ປິ່ນອ້ອມອີກຈໍານວນໜຶ່ງ ຄາດວ່າໃນປີ 2024 ນີ້ ຈະສາມາດຕ້ອນຮັບນັກທ່ອງທ່ຽວໃຫ້ໄດ້ 7-8 ລ້ານກວ່າຄົນ.

     ເຖິງແນວໃດກໍດີ, ປັດຈຸບັນນີ້ ທ່ານ ສີສະຫວາດ ແສງພະຈັນ ຫົວໜ້າພະແນກຖະແຫລງຂ່າວວັດທະນະທຳ ແລະ ທ່ອງທ່ຽວ (ຖວທ) ແຂວງ ໄດ້ນຳສະເໜີຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງກິດຈະການທ່ອງທ່ຽວທາງນ້ຳ ຢູ່ແຂວງວຽງຈັນ ຕໍ່ກອງປະຊຸມສະໄໝສາມັນເທື່ອທີ 7 ຂອງ ສພຂ ແຂວງວຽງຈັນ ຊຸດທີ II ທີ່ໄດ້ຈັດຂຶ້ນ ລະຫວ່າງ ວັນທີ 31/7 ຫາ 2/8/2024 ຊ່ຶງບັນດາຜູ້ແທນ ໄດ້ພ້ອມກັນຄ້ົນຄວ້າ, ປະກອບຄຳຄິດຄຳເຫັນພິຈາລະນາ ແລະ ຮັບຮອງເອົາຂໍ້ຕົກລົງດັ່ງກ່າວເປັນທີ່ຮຽບຮ້ອຍແລ້ວ.

   ຂໍ້ຕົກລົງສະບັບນີ້ ປະກອບມີ 9 ໝວດ 32 ມາດຕາ ໄດ້ກຳນົດຫລັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງກິດຈະການທ່ອງທ່ຽວ ທາງນ້ຳຢູ່ແຂວງວຽງຈັນ ເພື່ອເຮັດໃຫ້ວຽກງານດັ່ງກ່າວ ມີປະສິດທິພາບ ແລະ ປະສິດທິຜົນແນໃສ່ ຊຸກຍູ້, ສົ່ງເສີມ ແລະ ພັດທະນາວຽກງານການທ່ອງທ່ຽວໃຫ້ຂະຫຍາຍຕົວ, ຍືນຍົງກາຍເປັນອຸດສາຫະກຳທ່ອງທ່ຽວ ທີ່ທັນສະໄໝ. ກິດຈະການທ່ອງທ່ຽວທາງນໍ້າ ຢູ່ແຂວງວຽງຈັນ ແມ່ນການເຄື່ອນໄຫວວຽກງານກ່ຽວກັບການບໍລິການທ່ອງທ່ຽວຕາມແມ່ນໍ້າ, ແຄມນໍ້າ, ເກາະ, ອ່າງນໍ້າ, ດອນ ແລະ ຫາດ...ຢູ່ພາຍໃນແຂວງ; ການຄຸ້ມຄອງກິດຈະການທ່ອງທ່ຽວທາງນ້ຳ ແມ່ນການຈັດຕັ້ງປະຕິບັດບັນດາຫລັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງກິດຈະການທ່ອງທ່ຽວຕາມແມ່ນໍ້າຢູ່ພາຍ ໃນແຂວງວຽງຈັນ ໃຫ້ຖືກຕ້ອງຕາມກົດໝາຍ, ລະບຽບການ, ສອດຄ່ອງກັບສະພາບຄວາມເປັນຈິງ, ໂປ່ງໃສ, ປອດໄພ, ເປັນເອກະພາບມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.

    ອົງການປົກຄອງແຂວງວຽງຈັນ ເປັນອົງການຄຸ້ມຄອງຢ່າງລວມສູນ ແລະ ເປັນເອກະພາບໃນທົ່ວແຂວງວຽງຈັນ ກ່ຽວກັບການຄຸ້ມຄອງກິດຈະການທ່ອງທ່ຽວທາງນໍ້າ ໂດຍມອບໃຫ້ພະແນກ ຖວທ ແຂວງວຽງຈັນ, ຫ້ອງການ ຖວທ ເມືອງເປັນເຈົ້າການ, ເປັນໃຈກາງ ແລະ ຮັບຜິດຊອບໂດຍກົງໃນການພົວພັນ ປະສານສົມທົບກັບພະແນກການ, ອົງການລັດທຽບເທ່ົາພະແນກຂ້ັນແຂວງ, ອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງກັບວຽກງານຄຸ້ມຄອງກິດຈະການທ່ອງທ່ຽວທາງນໍ້າ. ສຳລັບສິດ ແລະ ໜ້າທີ່ຂອງພະແນກ ຖວທ ແຂວງ ເປັນເຈົ້າການຄົ້ນຄວ້າ, ສ້າງແຜນການ, ໂຄງການກ່ຽວກັບການພັດທະນາວຽກງານການຄຸ້ມຄອງກິດຈະການທ່ອງທ່ຽວທາງນໍ້າ, ພົວພັນປະສານສົມທົບກັບພາກສ່ວນທີ່ກ່ຽວຂ້ອງກ່ຽວກັບການຄຸ້ມຄອງກິດຈະການທ່ອງທ່ຽວທາງນໍ້າ, ຄົ້ນຄວ້າ, ພິຈາລະນາອອກອະນຸຍາດ, ຍົກເລີກການດໍາເນີນກິດຈະການທ່ອງທ່ຽວທາງນໍ້າ ຕາມທີ່ໄດ້ກຳ ນົດໄວ້ໃນກົດໝາຍ, ລະບຽບການ; ບຳລຸງ, ສ້າງ, ຈັດຕັ້ງການຝຶກອົບຮົມບຸກຄະລາກອນກ່ຽວກັບວຽກງານການທ່ອງທ່ຽວທາງນໍ້າ; ສຶກສາອົບຮົມ, ກ່າວເຕືອນ, ໂຈະ ຫລື ນໍາໃຊ້ມາດຕະການໃດໜຶ່ງ ຕໍ່ຜູ້ດຳເນີນກິດຈະການທ່ອງທ່ຽວທາງນໍ້າ ຕາມທີ່ກຳນົດໄວ້ໃນກົດໝາຍ, ລະບຽບການ; ສະເໜີຂັ້ນເທິງສ້າງຕັ້ງໜ່ວຍຄຸ້ມຄອງການບໍລິການທ່ອງທ່ຽວທາງນໍ້າ, ກອງທຶນບູລະນະວຽກງານຄຸ້ມຄອງກິດຈະການທ່ອງທ່ຽວທາງນໍ້າ; ສະຫລຸບ, ລາຍງານກ່ຽວກັບການຈັດຕັ້ງປະຕິບັດວຽກ ງານຄຸ້ມຄອງກິດຈະການທ່ອງທ່ຽວທາງນໍ້າ ຕໍ່ການຈັດຕັ້ງຂັ້ນເທິງຂອງຕົນຢ່າງເປັນປົກກະຕິ; ປະຕິບັດສິດ ແລະ ໜ້າທີ່ອື່ນຕາມທີ່ໄດ້ກຳນົດໄວ້ໃນກົດໝາຍ, ລະບຽບການ. ຂໍ້ຕົກລົງສະບັບນີ້ ກໍໄດ້ມີການແບ່ງຂັ້ນຄຸ້ມຄອງຢ່າງລະອຽດຈະແຈ້ງ ລະຫວ່າງພະແນກ ຖວທ  ແຂວງ ກັບຫ້ອງການ ຖວທ ເມືອງ.

ໂດຍ:ເກີດຂວັນໃຈ ມາລີຈັນສີ

KPL