ຂປລ. ​ໃນກອງປະຊຸມ ສຸດຍອດຊັບສິນດ້ານມະນຸດ ຄັ້ງທີ II ວັນ​ທີ 26 ມິຖຸນາ 2024 ຜ່ານ​ມາ, ລັດຖະບານ ແຫ່ງ ສປປ ລາວ ໄດ້ຢັ້ງຢືນຄືນເຖິງ​ຄໍາ​ໝັ້ນ​ສັນຍາ ໃນ​ການ​ແກ້​ໄຂ​ບັນຫາການ​ຂາດ​ສານ​ອາຫານ ແລະ ​ຄວາມສຳຄັນຂອງວຽກງານ​ໂພຊະນາ​ການ ໂດຍ​ຖື​ເອົາວຽກ​ດັ່ງກ່າວ​ເປັນ​ບຸລິມະສິດ​ຕົ້ນຕໍ​ ໃນ​ການພັດທະນາຊັບສິນດ້ານມະນຸດ .

          ກອງປະຊຸມດັ່ງກ່າວ ໄດ້ຈັດຂຶ້ນພາຍໃຕ້ຫົວຂໍ້ “ຮີບຮ້ອນປັບປຸງວຽກງານໂພຊະນາການ ເພື່ອພັດທະນາຊັບສິນດ້ານມະນຸດ” ​ແລະ ​ໃນ​ໂອກາດ​ນີ້, ທ່ານ ສອນໄຊ ສີພັນດອນ, ນາຍົກລັດທະມົນຕີ ແຫ່ງ ສປປ ລາວ ໄດ້ກ່າວເຖິງຄວາມສໍາຄັນ ຂອງໂພຊະນາການ ເພື່ອສ້າງເສດຖະກິດທີ່ເຂັ້ມແຂງ ແລະ ທົນທານ, ພ້ອມຍັງສະ​ແດງ​ໃຫ້​ເຫັນ​ເຖິງ​ຄຳ​ໝັ້ນ​ສັນຍາ​ຂອງ​ ລັດຖະບານ ເເຫ່ງ ສປປ ລາວ ​ໃນ​ການ​ປັບປຸງ​ວຽກງານໂພ​ຊະ​ນາ​ການ, ພັດທະນາຊັບສິນດ້ານມະນຸດ ເເລະ ຮັບປະກັນ​ການ​ເຕີບ​ໂຕ​ ດ້ານ​ເສດຖະກິດ ​ແລະ ຄວາມ​ຈະ​ເລີ​ນຮຸ່ງ​ເຮືອງຂອງປະເທດ ​ເຊິ່ງ ລັດຖະບານ ສປປ ລາວ ມີຄວາມໝາຍໝັ້ນຢ່າງເຕັມທີ່ ຕໍ່ການຈັດຕັ້ງປະຕິບັດນະໂຍບາຍ ດຳເນີນງານແບບຮອບດ້ານ ເພື່ອຮັບມືກັບສະພາບ ການຂາດໂພຊະນາການ ໂດຍການມີສ່ວນຮ່ວມຂອງຫລາຍຂະແໜງການ ແຕ່ສູນກາງຮອດທ້ອງຖິ່ນ, ພາກສ່ວນສັງຄົມ ແລະ ຄູ່ຮ່ວມພັດທະນາ.

ພ້ອມ​ນີ້, ທ່ານ ນາງ ເພຍ ເຣເບນໂລ ບຣິໂຕ ຜູ້ຕາງໜ້າ ອົງການອຸຍ​ນີ​ເຊບ ປະຈຳ ສປປ ລາວ, ກໍໄດ້ກ່າວເຖິງຄວາມສຳຄັນ ຂອງການລົງທຶນດ້ານໂພຊະນາການ ຕໍ່ການພັດທະນາປະເທດຊາດ ວ່າ: ຄວາມໝັ້ນຄົງທາງດ້ານເສດຖະກິດ ແລະ ການພັດທະນາຂອງ ສປປ ລາວ ໃນອະນາຄົດ ແມ່ນຂຶ້ນຢູ່ກັບສິ່ງທີ່ພວກເຮົາປະຕິບັດໃນມື້ນີ້. ໃນ​ໄລຍະ​ທີ່​ມີ​ຄວາມທ້າທາຍນີ້, ມັນເປັນສິ່ງສໍາຄັນທີ່ສຸດ ທີ່ພວກເຮົາຕ້ອງຮັບປະກັນວ່າ ​ເງິນທຸກໆໂດລາ ຫລື ທຸກໆກີບ ແມ່ນໄດ້ຖືກນຳໃຊ້ຢ່າງເໝາະສົມ ໃນວຽກງານດ້ານໂພຊະນາການ. ການ​ລົງ​ທຶນ​ດ້ານ​ໂພ​ຊະ​ນາ​ການ​ເດັກ​ ກໍຄື ການ​ລົງ​ທຶນ​ໃນ​ອະ​ນາ​ຄົດ​ຂອງ​ປະ​ເທດ ແລະ ພວກເຮົາຈໍາເປັນຕ້ອງສຸມໃສ່ ການປະຕິບັດທີ່ມີປະສິດທິຜົນສູງທີ່ສຸດ, ໃຫ້ສາມາດເຂົ້າເຖິງ ເດັກທຸກໆຄົນໃນທົ່ວປະເທດ.

ທ່ານ ອານເບີໂຕ້ ໂລດີເກ້ ອຳນວຍການພັດທະນາ ຊັບສິນດ້ານມະນຸດ ຂອງຫ້ອງການທະນາ ຄານໂລກ ​ໄດ້​ໃຫ້​ຮູ້ວ່າ: ເພື່ອປັບປຸງໂພຊະນາການຂອງແມ່ຍິງ ແລະ ເດັກ, ມັນຈຳເປັນຕ້ອງມີການລົງທຶນ ໃນຫລາຍໆຂະແໜງການ, ພ້ອມທັງການບໍລິການ ດ້ານໂພຊະນາການທີ່ສໍາຄັນ ໃຫ້ແກ່ຄອບຄົວທີ່ທົ່ວເຖິງ ແລະ ລະບົບການຕິດຕາມວຽກງານ ໂພຊະນາການທີ່ເຂັ້ມແຂງ ເພື່ອປະເມີນຜົນສໍາເລັດຢ່າງຊັດເຈນ.

KPL