ຂປລ
ທຸລະກິດຮ້ານອາຫານ ເປັນອີກທຸລະກິດໜຶ່ງທີ່ຫລາຍຄົນຖືເອົາເປັນອາຊີບໜຶ່ງ ເພື່ອສ້າງລາຍຮັບເຂົ້າຄອບຄົວ ແຕ່ກ່ໍບໍ່ແມ່ນເລື່ອງງ່າຍທີ່ທຸລະກິດນີ້ຈະປະສົບຜົນສໍາເລັດໄດ້ສະເໝີໄປ ເພາະມັນກໍມີຄວາມສ່ຽງເຊັ່ນກັນ ອີກຢ່າງໜຶ່ງຕ້ອງສຶກສາດ້ານການຕະຫລາດຢ່າງເໝາະສົມ ເລື່ອງ ສະຖານທີ່ ເພາະທຸລະກິດດ້ານນີ້ ແມ່ນລົງທຶນຫລາຍ ແລະ ມີຄວາມສ່ຽງສູງໃນຫລາຍໆດ້ານ.
*ທຸລະກິດຮ້ານອາຫານ ເປັນອີກທຸລະກິດໜຶ່ງທີ່ຫລາຍຄົນຖືເອົາເປັນອາຊີບໜຶ່ງ ເພື່ອສ້າງລາຍຮັບເຂົ້າຄອບຄົວ ແຕ່ກ່ໍບໍ່ແມ່ນເລື່ອງງ່າຍທີ່ທຸລະກິດນີ້ຈະປະສົບຜົນສໍາເລັດໄດ້ສະເໝີໄປ ເພາະມັນກໍມີຄວາມສ່ຽງເຊັ່ນກັນ ອີກຢ່າງໜຶ່ງຕ້ອງສຶກສາດ້ານການຕະຫລາດຢ່າງເໝາະສົມ ເລື່ອງ ສະຖານທີ່ ເພາະທຸລະກິດດ້ານນີ້ ແມ່ນລົງທຶນຫລາຍ ແລະ ມີຄວາມສ່ຽງສູງໃນຫລາຍໆດ້ານ. ແນວໃດກໍດີສໍາລັບຜູ້ປະກອບການທີ່ມີໃຈມັກ, ກ້າເຮັດ, ກ້າຕັດສິນໃຈ ເມື່ອເຫັນເຖິງຄວາມເປັນໄປໄດ້ແລ້ວ ທຸລະກິດນ້ີກໍເປັນທຸລະກິດໜຶ່ງທ່ີສາມາດສ້າງລາຍຮັບໄດ້ເປັນກອບເປັນກໍາ ເໝືອນດັ່ງ ຄອບຄົວ ນາງ ວິລະພົນ ທອງສະຫວັນ ເຈົ້າຂອງຮ້ານອາຫານ ສົມວິໄລ ທີ່ໄດ້ຈັບ 300 ລ້ານກີບຕໍ່ປີ ມາແລ້ວ.
ນາງ ວິລາພົນ ທອງສະຫວັນ ອາຍຸ 50 ປີ ເຈ້ົາຂອງຮ້ານອາຫານ ສົມວິໄລ ເວົ້າໃຫ້ຟັງວ່າ: ໃນເບື້ອງຕົ້ນການໃຊ້ຊີວິດຂອງຄອບຄົວພົບຄວາມຫຍຸ້ງຍາກຫລາຍດ້ານ ອາໃສແຕ່ເງິນເດືອນກໍ່ບໍ່ພຽງພໍກັບຄວາມຮຽກຮ້ອງຕ້ອງການໃນການໃຊ້ຈ່າຍຊີວິດປະຈຳວັນ, ດັ່ງນັ້ນຈຶ່ງໄດ້ປຶກສານຳຜູ້ຄອບຄົວເພື່ອຊອກຫາອາຊີບເສີມ ຈົນໄດ້ມາເຮັດຮ້ານອາຫານ ຍ້ອນວ່າຕົນເອງມັກຮັກທາງດ້ານການບໍລິການ, ອີກຢ່າງໜຶ່ງໃນໄລຍະນັ້ນ ຮ້ານອາຫານກໍ່ມີໜ້ອຍຢູ່ໃນເທສະບານເມືອງ ເພາະວ່າເປັນເມືອງສ້າງຕັ້ງໃໝ່ ແລະ ກຳລັງໄດ້ຮັບການພັດທະນາຕົກມາ ຮອດປີ 2015 ຈື່ງໄດ້ຕັດສິນໃຈສ້າງຮ້ານອາຫານຂື້ນ ໂດຍມີຊື່ວ່າຮ້ານອາຫານ ສົມວິໄລ ຂາຍປະເພດອາຫານແບບພື້ນບ້ານຂອງລາວ ເປັນຕົ້ນແມ່ນປະເພດກ້ອຍ, ແກງ, ທອດ, ຂົ້ວ, ເສັ້ນ ແລະ ເຄື່ອງດື່ມ, ນອກນັ້ນ ຍັງມີອາຫານຕາມສັ່ງ ແລະ ບໍລິການນອກສະຖານທີ່, ຮັບຈັດງານລ້ຽງ, ງານດອງ, ງານສ້າງສັນຕ່າງໆ ຕື່ມອີກ ຕາມຄວາມຮຽກຮ້ອງຕ້ອງການຂອງລູກຄ້າ, ລາຄາອາຫານເລິ່ມຕົ້ນແມ່ນ 50 ພັນ- 180 ພັນກີບ ສຳລັບເມນູທີ່ລູກຄ້ານິຍົມຊົມຊອບ ແລະ ເປັນເອກະລັກຂອງຮ້ານແມ່ນປະເພດກ້ອຍປາ, ແກງປາ, ເອາະອ່ອມ, ຕົ້ມໄກ່ຢາພື້ນເມືອງ ແລະ ອາຫານຕາມສັ່ງແບບພື້ນບ້ານທ້ອງຖິ່ນຂອງພວກເຮົາ, ນອກນັ້ນຍັງມີເຝີ, ເຂົ້າປຽກ ແລະ ອື່ນໆ ເຊິ່ງບອກໄດ້ເລີຍວ່າຮ້ານເຮົາມີເອກະລັກສະເພາະທ່ີບໍຄືໃຜ ຈົນສາມາດຍາດໄດ້ລາງວັນທີ 2, 3 ໃນງານເທສະການອາຫານ ແຂວງໄຊສົມບູນ ປີ 2022 ຈົນໄດ້ຮັບໃບຍ້ອງຍໍເປັນຄອບຄົວຕົວແບບ, ຄອບຄົວວັດທະນະທຳ, ຄອບຄົວ ປ້ອງກັນຊາດເຂັ້ມແຂງ, ຄອບຄົວປອດຄະດີ ແລະ ໃບຍ້ອງຍໍປະເພດຕ່າງໆຈຳນວນໜຶ່ງ.
ນາງ ວິລາພົນ ທອງສະຫວັນ ໃຫ້ຮູ້ຕື່ມວ່າ: ໃນຕໍ່ໜ້າທາງຮ້ານອາຫານ ສົມວິໄລ ຈະມີແຜນປັບປຸງສະຖານທີ່ຮ້ານອາຫານ ໃຫ້ກວ້າງຂວາງກວ່າເກົ່າ ເພື່ອອຳນວຍຄວາມສະດວກໃຫ້ແກ່ລູກຄ້າ ແລະ ຈະເນັ້ນການບໍລິການ ບໍ່ວ່າຈະເປັນເມນູອາຫານຕ່າງໆໃຫ້ວ່ອງໄວ, ເນັ້ນສະອາດ ລົດຊາດແຊບຖືກໃຈລູກຄ້າ. ນາງ ວິລາພົນ ທອງສະຫວັນ ຍັງໄດ້ເຊີນຊວນແຂກທັງພາຍໃນ ແລະ ຕ່າງປະເທດທີ່ເດີນທາງຜ່ານ ແຂວງໄຊສົມບູນ ກໍ່ມາສາມາດມາແວ່ຊິມລົດຊາດອາຫານສົມວິໄລໄດ້, ຮ້ານຕັ້ງຢູ່ບ້ານຜາສະຫງົບ ເມືອງອານຸວົງ ແຂວງໄຊສົມບູນ ເຊິ່ງເປີດບໍລິການທຸກໆວັນ ນັບແຕ່ວັນຈັນ-ວັນທິດ ເລິ່ມເວລາ 7:00 ໂມງເຊົ້າ ຫາ 23:00 ໂມງກາງຄືນ ຫລື ຢາກໂທສັ່ງຈ່ອງອາຫານໄວ້ລ່ວງໜ້າສາມາດຕິດຕໍ່ໄດ້ທີ່ເບີ: 020 2224 0983 - 020 2225 9588.
ບົດໂດຍ: ມາລີດາ
ຂໍ້ມູນຈາກ: ບິກໄຊ ສົມພູ
KPL
