*ຕາມແຫລ່ງຂ່າວສະຖິຕິໃໝ່ຈາກຜູ້ປະກອບການທຸລະກິດຂົນສົ່ງໂດຍສານ ແລະ ບຸກຄົນໃຫ້ເປີດເຜີຍໃນຕົ້ນເດືອນມິຖຸນາ 2024 ນີ້ວ່ານັກທ່ອງທ່ຽວສ່ວນໃຫຍ່ສະເລ່ຍເກືອບ 70% ເລືອກຈະເດີນທາງຜ່ານລົດ ໄຟລາວ-ຈີນ ເນື່ອງຈາກມີຄວາມສະດວກສະບາຍ, ປອດໄຟສູງ, ປະຢັດເງິນໄດ້ຫລາຍ, ປະຢັດເວລາ ຍິ່ງກວ່ານັ້ນຍັງໄດ້ລິ້ມລົດເຟີດເຟີນໄປກັບທໍາມະຊາດ ແລະ ວິຖີວິດຂອງຊາວລາວຕາມເສັ້ນທາງອີກດ້ວຍ.

   ແຫລ່ງຂ່າວດັ່ງກ່າວຍັງລະບຸຕື່ມອີກວ່າ: ນັກທ່ອງທ່ຽວທີ່ມາໃຊ້ບໍລິການຫລາຍທີ່ສຸດແມ່ນຊາວໄທ, ຈີນ, ເອີຣົບ ແລະ ຊາດອື່ນໆ. ຫລ້າສຸດກຸ່ມບໍລິສັດທາງລົດໄຟຈີນ ສາຂາຄຸນໝິງ ໃຫ້ຮູ້ວ່າ: ແຕ່ວັນທີ 1 ມັງກອນ ຫາ ວັນທີ 31 ພຶດສະພາ ຜ່ານມານີ້, ເສັ້ນທາງລົດໄຟຈີນ- ລາວ ໄດ້ແລ່ນລົດໂດຍສານລວມທັງໝົດ 10,642 ຂະບວນ, ໄດ້ຂົນສົ່ງຜູ້ໂດຍສານເຖິງ 8,723,000 ເທ່ືອຄົນ, ເພ່ີມຂຶ້ນ 17.5% ເມ່ືອທຽບໃສ່ໄລຍະດຽວກັນຂອງປີ 2023 ໂດຍໄດ້ເພີ່ມແຮງຂັບເຄື່ອນຢ່າງຫລວງຫລາຍໃຫ້ແກ່ການພັດທະນາຂອງພາກພື້ນ.  ກຸ່ມບໍລິສັດທາງລົດໄຟຈີນ ສາຂາຄຸນໝິງຍັງກ່າວວ່າ: ຂະບວນລົດໄຟໂດຍສານຕາມເສັ້ນທາງລົດໄຟຈີນ-ລາວ ມີຈຸດພິເສດຄືລາຄາຖືກ, ວ່ອງໄວ ແລະ ສະດວກສະບາຍຈຶ່ງໄດ້ກາຍເປັນທາງເລືອກຕົ້ນຕໍຂອງປະຊາຊົນທັງຫລາຍ ທ່ີຢູ່ລຽບຕາມເສັ້ນທາງລົດໄຟເພື່ອໄປທ່ອງທ່ຽວ, ສຶກສາຮ່ຳຮຽນ, ເຮັດທຸລະກິດ ແລະ ແລກປ່ຽນທາງດ້ານວັດທະນະທຳເຊິ່ງໄດ້ເສີມຂະຫຍາຍບົດບາດອັນສຳຄັນເຂົ້າໃນການຊຸກຍູ້ການແລກປ່ຽນດ້ານວັດທະນະທຳ ແລະ ການສ້າງຄວາມຈະເລີນຮຸ່ງເຮືອງດ້າເສດຖະກິດຢູ່ພາກພື້ນ.

   ແຕ່ເຖິງແນວໃດ ສປປ ລາວ ແມ່ນໜຶ່ງໃນ 10 ປະເທດສະມາຊິກອາຊຽນ ຍອມຮັບວ່າການມີເສັ້ນທາງລົດໄຟລາວ-ຈີນ ໄດ້ຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າຢ່າງແທ້ຈິງ ບໍ່ທັງການສ້າງລາຍຮັບໂດຍການກົງ ແລະ ທາງອ້ອມ ໂດຍສະເພາະພາກອຸດສາຫະກໍາທ່ອງທ່ຽວ, ຂົນສົ່ງຜູ້ໂດຍສານ, ທຸລະກິດບໍລິການ, ການຜະລິດເປັນສິນຄ້າ ແລະ ອື່ນໆ.

ໂດຍ: ເກີດຂວັນໃຈ ມາລີຈັນສີ

KPL