ຂປລ
ຂປລ. ພິທີລົງນາມ ສ້າງຕັ້ງເວັບໄຊຂ່າວສານ ແລວເສດຖະກິດລາວ-ຈີນ ລະຫວ່າງ ສໍານັກຂ່າວສານປະເທດລາວ ແລະ ບໍລີສັດຂໍ້ມູນຂ່າວສານເສດຖະກິດຈີນ ຈໍາກັດ ຈັດຂຶ້ນໃນໂອກາດດຳເນີນກອງປະຊຸມ ເວທີສົນທະນາການຮ່ວມມື ລາວ-ຈີນ ພາຍໃຕ້ຫົວຂໍ້ “ໜຶ່ງແລ້ວ ໜຶ່ງເສັ້ນທາງ” ຄັ້ງທີ 2 ໃນວັນທີ 7 ທັນວາ 2023 ຢູ່ນະຄອນຫລວງວຽງຈັນ
ຂປລ. ພິທີລົງນາມ ສ້າງຕັ້ງເວັບໄຊຂ່າວສານ ແລວເສດຖະກິດລາວ-ຈີນ ລະຫວ່າງ ສໍານັກຂ່າວສານປະເທດລາວ ແລະ ບໍລີສັດຂໍ້ມູນຂ່າວສານເສດຖະກິດຈີນ ຈໍາກັດ ຈັດຂຶ້ນໃນໂອກາດດຳເນີນກອງປະຊຸມ ເວທີສົນທະນາການຮ່ວມມື ລາວ-ຈີນ ພາຍໃຕ້ຫົວຂໍ້ “ໜຶ່ງແລ້ວ ໜຶ່ງເສັ້ນທາງ” ຄັ້ງທີ 2 ໃນວັນທີ 7 ທັນວາ 2023 ຢູ່ນະຄອນຫລວງວຽງຈັນ ໂດຍການຮ່ວມລົງນາມລະຫວ່າງ ທ່ານ ຄໍາເຜີຍ ພິລາພາ ຜູ້ອໍານວຍໃຫຍ່ສໍານັກຂ່າວສານປະເທດລາວ, ກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ ແລະ ທ່ານ ຊູ ຢູຈາງ ຫົວໜ້າບໍລິສັດ ຂໍ້ມູນຂ່າວສານ ເສດຖະກິດຈີນ ຈໍາກັດ.
ການຮ່ວມມືສ້າງເວັບໄຊດັ່ງກ່າວ, ກໍເພື່ອເປັນການໂຄສະນາເຜີຍແຜ່ ຂອບການຮ່ວມມືຍຸດທະສາດ ທີ່ສະໜິດແໜ້ນ, ຍາວນານ ແລະ ເລິກເຊິ່ງ, ຍົກລະດັບ ແລະ ເຕົ້າໂຮມທ່າແຮງຂອງຕົນ ແລະ ດຳ ເນີນການຮ່ວມມືຢ່າງເຂັ້ມແຂງທາງດ້ານທຸລະກິດ ລວມທັງການເຜີຍແຜ່ ຂໍ້ມູນຂ່າວສານ ເວັບໄຊ ໜຶ່ງແລວ ໜຶ່ງເສັ້ນທາງ ທີ່ກ່ຽວຂ້ອງກັບ “ແລວເສດຖະກິດ ຈີນ-ລາວ” ຢູ່ໃນປະເທດລາວ ເພື່ອສົ່ງເສີມທ່າແຮງ ແລະ ພັດທະນາທຸລະກິດ ຂອງທັງສອງຝ່າຍໃຫ້ເຕີບໃຫຍ່ເຂັ້ມແຂງ.
ທັງສອງຝ່າຍ ຈະຮ່ວມກັນເຜີຍແຜ່ ຂໍ້ມູນຂ່າວສານ ແລວເສດຖະກິດຈີນ-ລາວ ຜ່ານຊ່ອງທາງຂອງສອງຝ່າຍ ແລະ ການແລກປ່ຽນຂໍ້ມູນຂ່າວສານ; ຈະຕິດຕໍ່ພົວພັນກັນຢ່າງເປັນປົກກະຕິ ແລະ ແຈ້ງກ່ຽວກັບຄວາມຄືບໜ້າ ຂອງການຮ່ວມມືຢ່າງທັນສະພາບການ ເພື່ອສົ່ງເສີມການ ປະສານງານກັນ ຢ່າງເຕັມສ່ວນລະຫວ່າງສອງຝ່າຍ; ຈະແຕ່ງຕັ້ງໜ່ວຍປະສານງານທຸລະກິດ ທີ່ຮັບຜິດຊອບວຽກ ປະສານງານໃນແຕ່ລະມື້, ວຽກຕິດຕໍ່ພົວພັນ, ວຽກສະຫລຸບສັງລວມ, ວຽກເກັບກຳຫາງສຽງ ແລະ ການສືບຕໍ່ຕິດ ຕາມວຽກອື່ນທີ່ກ່ຽວຂ້ອງ.
ສຳນັກຂ່າວສານປະເທດລາວ ສ້າງຕັ້ງຂຶ້ນໃນວັນທີ 6 ມັງກອນ 1968 ທີ່ວຽງໄຊ ແຂວງຫົວພັນ, ຜະລິດຂ່າວເປັນພາສາລາວ, ອັງກິດ ແລະ ຝຣັ່ງ, ເປັນແຫລ່ງຂໍ້ມູນຂ່າວສານຫລັກຂອງ ສປປ ລາວ, ເຮັດໜ້າທີ່ເກັບກຳ ແລະ ສະໜອງຂ່າວໃຫ້ໜັງສືພິມ, ວິທະຍຸ ແລະ ໂທລະພາບໃນ ຂອບເຂດທົ່ວປະເທດ. ນອກນີ້, ຍັງໄດ້ຮ່ວມມືສອງຝ່າຍກັບສຳນັກຂ່າວຂອງຫລາຍປະເທດ ແລະ ໄດ້ເປັນສະມາຊິກຂອງ ອົງການສຳນັກຂ່າວປະເທດບໍ່ຮ່ວມກຸ່ມ ແລະ ອົງການສຳນັກຂ່າວອາຊີ-ປາຊີຟິກ (OANA).
ສ່ວນບໍລິສັດ ຂ່າວສານຂໍ້ມູນເສດຖະກິດຈີນ ຈຳກັດ, ແມ່ນຜູ້ບໍລິການຂໍ້ມູນເສດຖະກິດ ແລະ ການບໍລິການທີ່ເປັນມືອາຊີບ ຂອງສຳນັກຂ່າວສານຊິນຮວາ ເຊິ່ງແມ່ນສຳນັກຂ່າວຂອງລັດຂອງ ສປ ຈີນ. ກາຍເປັນໜຶ່ງໃນໜ່ວຍງານ ບໍລິການຂໍ້ມູນຂ່າວສານເສດຖະກິດ ທີ່ໜ້າເຊື່ອຖືທີ່ສຸດ ໃນປະເທດຈີນ, ປັດຈຸບັນ ໄດ້ບໍລິຫານເວັບໄຊ ໜຶ່ງແລວ ໜຶ່ງເສັ້ນທາງ ເຊິ່ງແມ່ນເວັບໄຊທາງການຂອງ ສປຈີນ ສຳລັບສົ່ງເສີມຂໍ້ລິເລີ່ມ ໜຶ່ງແລວໜຶ່ງເສັ້ນທາງ.
ຂ່າວ: ສຸພາສະຫວັນ
ພາບ: ເກດສະໜາ
KPL
