ຂປລ
ຂປລ. ປັດຈຸບັນ, ປະຊາຊົນເມືອງນາໝໍ້ ແຊວງອຸດົມໄຊ ໄດ້ມີຄວາມຮັບຮູ້ ແລະ ເຂົ້າໃຈກ່ຽວກັບການລ້ຽງລູກດ້ວຍນົມແມ່ ແລະ ຄວາມອັນຕະລາຍຂອງການຂາດສານອາຫານ ເຮັດໃຫ້ເດັກນ້ອຍມີສຸຂະພາບແຂງແຮງ, ອັດຕາການຕາຍກໍຫລຸດລົງເລື້ອຍໆ.
ຂປລ. ປັດຈຸບັນ, ປະຊາຊົນເມືອງນາໝໍ້ ແຊວງອຸດົມໄຊ ໄດ້ມີຄວາມຮັບຮູ້ ແລະ ເຂົ້າໃຈກ່ຽວກັບການລ້ຽງລູກດ້ວຍນົມແມ່ ແລະ ຄວາມອັນຕະລາຍ ຂອງການຂາດສານອາຫານ ເຮັດໃຫ້ເດັກນ້ອຍ ມີສຸຂະພາບແຂງແຮງ, ອັດຕາການຕາຍກໍຫລຸດລົງເລື້ອຍໆ.
ທ່ານ ຄໍາຊາຍ ພົງສະຫວັດ ຮອງຫົວໜ້າຫ້ອງການສາທາລະນະສຸກ ເມືອງນາໝໍ້ ແຂວງອຸດົມໄຊ ໄດ້ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນນີ້ວ່າ: ຖ້າສົມທຽບໃສ່ໄລຍະກ່ອນ ທີ່ໂຄງການວຽກໂພສະນາການ ແລະ ການລ້ຽງລູກດ້ວຍນົມແມ່ ຍັງບໍ່ທັນເຂົ້າເຖິງນັ້ນ, ປະຊາຊົນບັນດາເຜົ່າຈໍານວນຫລວງຫລາຍ ຍັງບໍ່ຮູ້ຈັກວິທີລ້ຽງດູລູກນ້ອຍຂອງຕົນ ໃຫ້ຖືກຫລັກໂພຊະການ, ເຮັດໃຫ້ເດັກນ້ອຍຂາດສານອາຫານ, ນໍ້າໜັກຕໍ່າເກີນມາດຕະຖານ ແລະ ການພັດທະນາສະໝອງ ຂອງເດັກກໍຫລ້າຊ້າ, ເຮັດໃຫ້ເດັກຕົວເຕ້ຍ, ສຸຂະພາບບໍ່ແຂງແຮງ ແລະ ອື່ນໆ. ແຕ່ຫລັງຈາກທີ່ໂຄງການເຂົ້າມາຈັດຕັ້ງປະຕິບັດຢູ່ເມືອງນາໝໍ້, ພວກເຮົາກໍມີຂໍ້ມູນລົງເຜີຍແຜ່ ໂຄສະນາສຸຂະສືກສາ ໃຫ້ປະຊາຊົນຮັບຮູ້ ແລະ ເຂົ້າໃຈກ່ຽວກັບການລ້ຽງລູກດ້ວຍນົມແມ່, ລວມທັງຄວາມອັນຕະລາຍ ຂອງການຂາດສານອາຫານ, ເຮັດໃຫ້ເດັກນ້ອຍມີສຸຂະພາບແຂງແຮງ ອັດຕາການຕາຍຫລຸດລົງ.
ອີງຕາມເປົ້າໝາຍທີ່ສະພາແຫ່ງຊາດວາງໄວ້ ຄື: ສູ້ຊົນເຮັດໃຫ້ເດັກນ້ອຍ ຂາດສານອາຫານຫລຸດລົງ ໃຫ້ໄດ້ 15%. ຜ່ານການຈັດຕັ້ງປະຕິບັດຕົວຈິງປະຕິບັດໄດ້ 13% ສໍາລັບລວງສູງຂອງເດັກ ຫລຸດມາດຕະຖານນັ້ນ ວາງຄາດໝາຍໄວ້ 15% ແຕ່ການຈັດຕັ້ງປະຕິບັດຕົວຈິງໄດ້ 14% ເຊິ່ງສະແດງໃຫ້ເຫັນວ່າ ການຈັດຕັ້ງປະຕິບັດວຽກງານ ໂພຊະນາການມີຄວາມຄືບໜ້າ ແລະ ປະສົບຜົນສຳເລັດດີສົມຄວນ.
ການລົງເຄື່ອນໄຫວສຳພາດ ຂອງບັນດາສື່ມວນຊົນໃນຄັ້ງນີ້, ນໍາໂດຍ ສູນສະຖິຕິ ແລະ ຂ່າວສານສາທາລະນະສຸກ ກ່ຽວກັບວຽກງານ ສຸຂະພາບຈະເລີນພັນ ຢູ່ແຂວງອຸດົມໄຊ ໃນລະຫວ່າງວັນທີ 5-7 ທັນວາ 2023 ໂດຍການສະໜັບສະໜູນ ຂອງອົງການອຸຍນີເຊບ. ຈຸດປະສົງກໍເພື່ອເກັບກຳຂໍ້ມູນ ການຈັດ ຕັ້ງປະຕິບັດວຽກງານໂພຊະນາການ ແລະ ການລ້ຽງລູກດ້ວຍນົມແມ່ ຢູ່ຂັ້ນແຂວງ, ເມືອງ ແລະ ບ້ານ ເພື່ອເປັນການໂຄສະນາ ລາຍງານຜົນການຈັດຕັ້ງປະຕິບັດ ກໍຄື ຜົນສຳເລັດ ແລະ ຂໍ້ຫຍຸ້ງຍາກ ຂໍ້ສະເໜີຕ່າງໆ ຕໍ່ວຽກງານດັ່ງກ່າວ.
ຂ່າວ-ພາບ: ມະໄລລັກ
KPL
