ໃນວັນທີ 5 ກັນຍາ 2023, ຢູ່ໂຮງແຮມແລນມາກ, ນະຄອນຫລວງວຽງຈັນ, ໄດ້ມີພິທີຖະແຫລງຂ່າວການຈັດແຂ່ງຂັນກິລາ ປິ່ງປ່ອງເຍົາວະຊົນໂລກ (WTT youth contender) ຊຶ່ງຈະຈັດຂຶ້ນ ໃນແຕ່ວັນທີ 20-23 ກັນຍາ 2023 ຢູ່ສູນການຄ້າລາວ-ໄອເຕັກ, ນະຄອນຫລວງວຽງຈັນ. ການຖະແຫລງຂ່າວນີ້, ມີທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ຄໍາແພງ ໄຊສົມແພງ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ປະທານກິດຕິມະສັກສະຫະພັນປິ່ງປ່ອງແຫ່ງຊາດລາວ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ປະທານຮ່ວມຄະນະກໍາມະການຈັດການແຂ່ງຂັນກິລາປິ່ງປ່ອງ ເຍົາວະຊົນໂລກ, ທ່ານນາງ ແສງເດືອນ ຫລ້າຈັນທະບູນ ປະທານສະຫະພັນປິ່ງປ່ອງແຫ່ງຊາດລາວ, ປະທານຄະນະກໍາມະການຈັດການແຂ່ງຂັນກິລາປິ່ງປ່ອງເຍົາວະຊົນໂລກ, ມີຜູ້ຕາງໜ້າຈາກບໍລິສັດທີ່ສະໜັບສະໜູນການແຂ່ງຂັນ, ພ້ອມດ້ວຍຜູ້ຝຶກສອນ ແລະ ນັກກິລາເຂົ້າຮ່ວມ.

ທ່ານນາງ ອໍລະໄທ ສັນຕິຄົງຄາ ຮອງປະທານສະຫະພັນກິລາ ປິ່ງປ່ອງແຫ່ງຊາດລາວ ໄດ້ໃຫ້ຮູ້ວ່າ: ການແຂ່ງຂັນກິລາປິ່ງປ່ອງເຍົາວະຊົນໂລກຄັ້ງນີ້ ຈະມີຄະນະກໍາມະການ ແລະ ນັກກິລາ ຈາກສາກົນເກືອບ 200 ຄົນ ຈາກ 16 ປະເທດເຂົ້າຮ່ວມ. ໃນນີ້, ກໍາມະການຝ່າຍເຕັກນິກການ ແຂ່ງຂັນແມ່ນມາຈາກປະເທດ ປອກຕຸຍການ, ອີຢິບ, ໂອມານ, ເຢຍລະມັນ, ໃຕ້ຫວັນ, ມາເລເຊຍ, ສິງກະໂປ ແລະ ໄທ. ສ່ວນນັກກິລາ ຈະມີ 10 ປະເທດເຂົ້າຮ່ວມ. ໂດຍຈະແຂ່ງຂັນໃນ 2 ປະເພດ ຄື: ປະ ເພດດ່ຽວ ແລະ ຄູ່ປະສົມ ແລະ ມີ 5 ລາຍການດ່ຽວຍິງ ແລະ ດ່ຽວຊາຍ ອາຍຸບໍ່ເກີນ 11, 13, 15, 17 ແລະ 19 ປີ ແລະ ອີກ 2 ລາຍການຄູ່ປະສົມ, ໂດຍລວມມີທັງໝົດ 32 ລາງວັນ.

   ພ້ອມນີ້,  ທ່ານ ຄໍາແພງ ໄຊສົມແພງ ລັດຖະມົນຕີປະຈໍາສໍານັກງານນາຍົກລັດຖະມົນຕີ ປະທານກິດຕິມະສັກສະຫະພັນ ປິ່ງປ່ອງແຫ່ງຊາດລາວ ໄດ້ມີຄໍາເຫັນວ່າ: ການແຂ່ງຂັນກິລາປິ່ງປ່ອງເຍົາວະຊົນໂລກຄັ້ງນີ້, ເປັນໂອກາດສໍາຄັນເພື່ອຮັດແໜ້ນຄວາມສາມັກຄີກັບບັນດາ ປະເທດສະມາຊິກ, ທັງຕອບສະໜອງແນວທາງນະໂຍບາຍວຽກງານຕ່າງປະເທດ, ເປັນການພັດທະນາບຸກຄະລາກອນ ແລະ ພື້ນຖານໂຄງລ່າງວຽກງານກິລາ-ກາຍະກໍາ ແລະ ທັງເປັນ ໂອກາດອັນດີ ໃນການໂຄສະນາການທ່ອງທ່ຽວຂອງລາວເຮົາອອກສູ່ສາກົນໃຫ້ກວ້າງຂວາງຕື່ມອີກ.

    ໂອກາດນີ້, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ກໍໄດ້ມີຄໍາເຫັນຕື່ມວ່າ: ການທີ່ ປະເທດລາວເຮົາ ໄດ້ຮັບກຽດເປັນເຈົ້າພາບຈັດການແຂ່ງຂັນກິລາ ລະດັບໂລກນີ້, ແມ່ນຂີດໝາຍສໍາຄັນທີ່ຢັ້ງຢືນເຖິງການຮັບຮູ້ ແລະ ເຊື່ອໝັ້ນ ຂອງ ສາກົນ ຕໍ່ປະເທດເຮົາ. ສະນັ້ນ ຂໍໃຫ້ຄະນະຮັບຜິດຊອບການແຂ່ງຂັນ ຈົ່ງດໍາເນີນການໃຫ້ໄດ້ຕາມມາດຕະຖານ ສາກົນ, ໃຫ້ຮັບປະກັນຄວາມສະຫງົບປອດໄພຮອບດ້ານ, ອັນສໍາຄັນຕ້ອງເອົາໃຈໃສ່ໃນວຽກງານໂຄ ສະນາເຜິຍແຜ່ຕໍ່ມວນຊົນ ທັງພາຍໃນ ແລະ ຕ່າງປະເທດໃຫ້ຮັບຮູ້ຢ່າງກວ້າງຂວາງ, ທັງເປັນກໍາ ລັງໃຈໃຫ້ນັກກິລາທຸກຄົນໃຫ້ເຮັດດີທີ່ສຸດ ເພື່ອຍາດໄດ້ຜົນງານໂດດເດັ່ນ ແລະ ແຂ່ງຂັນດ້ວຍໄມຕີ ຈິດມິດຕະພາບ ແລະ ຄວາມມີນໍາໃຈນັກກິລາອັນແທ້ຈິງ ເພື່ອເປັນການສົ່ງເສີມຄວາມສາມັກ ຄີຮັກແພງດ້ວຍກັນຂອງນັກກິລາໃນໂລກ.

  ໂດຍ: ສຸພາສະຫວັນ

KPL