ຂປລ
*ໃນໄລຍະນີ້ມີຂ່າວກ່ຽວກັບການລັກຂໍ້ມູນຈາກບັດ ເອອີເອັມ (ATM) ດ້ວຍການລັກຖອນເງິນອອກ ຈາກບັນຊີຜ່ານຕູ້ ATM ເປັນຈໍານວນຫລາຍໆລ້ານກີບ ຈົນເຮັດໃຫ້ຜູ້ຕົກເປັນເຫຍື່ອ ໄດ້ຮັບຜົນເສຍຫາຍຢ່າງ ຫລວງຫລາຍ ລວມເຖິງທະນາຄານທີ່ໃຫ້ບໍລິການເອງ.
*ໃນໄລຍະນີ້ມີຂ່າວກ່ຽວກັບການລັກຂໍ້ມູນຈາກບັດ ເອອີເອັມ (ATM) ດ້ວຍການລັກຖອນເງິນອອກ ຈາກບັນຊີຜ່ານຕູ້ ATM ເປັນຈໍານວນຫລາຍໆລ້ານກີບ ຈົນເຮັດໃຫ້ຜູ້ຕົກເປັນເຫຍື່ອ ໄດ້ຮັບຜົນເສຍຫາຍຢ່າງຫລວງຫລາຍ ລວມເຖິງທະນາຄານທີ່ໃຫ້ບໍລິການເອງ. ດັ່ງໃນກໍລະນີ ໃນວັນທີ 10 ມີນາ 2023 ຜູ້ໃຊ້ເຟສບຸກທີ່ຊື່ວ່າ Viyalak Vongprachanh ໄດ້ອອກມາໂພສ ເຖິງເຫດການທີ່ຕົນເອງຕົກເປັນຜູ້ເສຍຫາຍ ຖືກລັກຖອນເງິນອອກຈາກບັນຊີ ໂດຍບໍ່ຮູ້ ຕົວຫລາຍກວ່າ 57 ລ້ານກີບ.
ກ່ອນໜ້າເຫດການດັ່ງກ່າວນັ້ນ ທາງທະນາຄານການຄ້າຕ່າງປະເທດລາວ ກໍ່ໄດ້ອອກແຈ້ງການເຕືອນໄພກ່ຽວກັບກຸ່ມຄົນບໍ່ຫວັງດີ ພະຍາຍາມລັກລອບເອົາຂໍ້ມູນບັດ ໂດຍຜ່ານຕູ້ ATM ແລະ ໄດ້ຮຽກຮ້ອງໃຫ້ລູກຄ້າ ຂອງທະນາຄານ ມີຄວາມລະມັດລະວັງ ໃນການນຳໃຊ້ຕູ້ ATM ຫລາຍຂຶ້ນ ພ້ອມທັງເປັນຫູເປັນຕານໍາກັນ ໃນການແຈ້ງຄວາມຜິດປົກກະຕິທີ່ເກີດຂຶ້ນກັບຕູ້ ATM ຜ່ານທາງສາຍດ່ວນ 1555 ຕະຫລອດ 24 ຊົ່ວໂມງ. ເມື່ອມີເຫດການແບບນີ້ທາງສູນສະ ກັດ ກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ຫລື ສູນລາວເຊີດ ໄດ້ມີການເຜີຍແຜ່ຂໍ້ມູນ ແລະ ວິທີປ້ອງກັນຕົນເອງຈາກການລັກຂໍ້ມູນບັດ ໃນລັກສະນະນີ້ໄດ້ແນວໃດ. ໃນບົດຄວາມນີ້ໄດ້ອະທິບາຍ ກ່ຽວກັບໄພຄຸກຄາມດັ່ງກ່າວ ເພື່ອໃຫ້ເປັນ ຄວາມຮູ້ ແລະ ເປັນແນວທາງ ໃນການປ້ອງກັນຕົນເອງ ບໍ່ໃຫ້ຕົກເປັນເຫຍື່ອຂອງ "ATM Skimming". ກ່ອນອື່ນຕ້ອງສ້າງຄວາມເຂົ້າໃຈກ່ຽວກັບ ATM Skimming ແມ່ນຮູບແບບການດັກຂໍ້ມູນ ແລະ ດັກລະຫັດບັດ ໂດຍໃຊ້ວິທີການ ເຮັດປຸ່ມກົດປອມ ແລະ ເຄື່ອງອ່ານບັດປອມຕິດທັບກັບອຸປະກອນຂອງແທ້ເທິງເຄື່ອງ ຊຶ່ງເຄື່ອງອ່ານບັດປອມນີ້ ຈະອ່ານຂໍ້ມູນຈາກແຖບແມ່ເຫລັກເທິງບັດແລ້ວ ຄັດລອກລົງໃນໜ່ວຍຄວາມຈຳ ຊຶ່ງອຸປະກອນນີ້ຖືກດັດແປງໃຫ້ມີຂະໜາດນ້ອຍ ແລະ ໃກ້ຄຽງກັບເຄື່ອງອ່ານບັດຕົວຈິງ. ຫລັງຈາກທີ່ອ່ານຂໍ້ມູນໃນບັດຊຶ່ງເປັນຂໍ້ມູນເລກປະຈຳຕົວຂອງບັດໄດ້ແລ້ວ ກໍ່ຈະນຳມາເຮັດບັດ ATM ປອມ ຂັ້ນຕອນຕໍ່ໄປກໍ່ຈະເປັນການລັກລະຫັດຜ່ານ ໂດຍການໃຊ້ກ້ອງຮູເຂັມ ເພື່ອລັກເບິ່ງລະຫັດຜ່ານ ຊຶ່ງຈະຕິດຕັ້ງໄວ້ບໍລິເວນໃກ້ໆ ແປ້ນໃສ່ລະຫັດ ເພື່ອເບິ່ງວ່າເລກລະຫັດ 6 ຕົວ ແມ່ນຫຍັງ. ວິທີນີ້ອາດຈະບໍ່ປະສົບຜົນສຳເລັດ ເນື່ອງຈາກຄົນກົດອາດຈະເອົາມືບັງ ຫລື ມີແສງສະທ້ອນ ກໍ່ຈະເຮັດໃຫ້ພາບທີ່ໄດ້ບໍ່ຊັດເຈນ. ດັ່ງນັ້ນ, ຈຶ່ງມີການດັດແປງ ຫລື ພັດທະນາຂຶ້ນມາອີກ ດ້ວຍວິທີການດັກຂໍ້ມູນ ການກົດລະຫັດ ຫລື ທີ່ເອີ້ນວ່າ Key logger ຊຶ່ງຈະຈື່ການກົດແປ້ນພິມ ແລະ ບັນທຶກໄວ້ ໂດຍຜູ້ບໍ່ຫວັງດີຈະນຳເອົາຊັອບແວ ຕໍ່ເຂົ້າກັບແປ້ນຄີບອດປອມ ແລ້ວນຳມາປິດທັບຂອງແທ້ ວິທີນີ້ ຈະມີຄວາມແມ່ນຢຳກວ່າການຕິດກ້ອງຮູເຂັມ. ເມື່ອຜູ້ບໍ່ຫວັງດີໄດ້ທັງບັດປອມ ແລະ ລະຫັດຜ່ານ ກໍ່ຈະນຳໄປກົດເງິນອອກຈາກບັນຊີໄດ້ຢ່າງສະດວກສະບາຍ.
ສຳລັບວິທທີປ້ອງກັນນັ້ນ, ທ່ານຄວນຕັ້ງລະຫັດຜ່ານບັດ ATM ໃຫ້ເດົາຍາກ ແລະ ປ່ຽນໃໝ່ເລື້ອຍໆ; ການໃຊ້ຕູ້ ATM ທຸກຄັ້ງ ຄວນສັງເກດຄວາມຜິດປົກກະຕິຂອງຕູ້ ເຊັ່ນ: ປຸ່ມກົດນູນຂຶ້ນ ແລະ ບ່ອນສຽບບັດຜິດປົກກະຕິ, ສັງ ເກດປ້າຍໂຄສະນາຢູ່ຂ້າງຕູ້ ອາດມີການເຊື່ອງກ້ອງໄວ້; ຄວນນຳໃຊ້ຕູ້ ATM ທີ່ມີຄົນໃຊ້ຫລາຍ, ນຳໃຊ້ຕູ້ ATM ທີ່ໃຊ້ເປັນປະຈຳ ເພື່ອຈະສັງເກດຄວາມຜິດປົກກະຕິໄດ້ງ່າຍ, ໃຊ້ມືບັງເວລາກົດລະຫັດຜ່ານບັດ ATM , ຖ້າພົບສິ່ງຜິດປົກກະຕິ ໃຫ້ຍົກເລີກການໃຊ້ງານ ແລະ ແຈ້ງເຈົ້າໜ້າທີ່ທະນາຄານທັນທີ. ພ້ອມນີ້ ກໍບໍ່ຄວນຝາກບັດ ຫລື ມອບລະຫັດບັນໃຫ້ຄົນອື່ນກົດແທນ, ບໍ່ຄວນໃຊ້ຕູ້ ATM ໃນກໍລະນີພົບເຫັນບຸກຄົນ ຕ້ອງສົງໃສຢູ່ບໍລິເວນນັ້ນ, ບໍ່ຫລົງເຊື່ອບຸກຄົນອື່ນ ທີ່ຈະກົດ ບັດ ATM ໃຫ້, ກໍລະນີບັດຄ້າງ ໃນຕູ້ຄວນແຈ້ງຫາເຈົ້າໜ້າທີ່ທະນາຄານໂດຍກົງ./.
ຮຽບຮຽງໂດຍ: ສາວບ້ານໂນນ
KPL
