ຂປລ. ວັນທີ 20 ເມສາ 2023 ທີ່ສໍານັກງານປະທານປະເທດ ຫວຽດນາມ, ​ສະຫາຍ ຫວໍ ວັນ ເຖືອງ ປະທານປະເທດແຫ່ງ ສສ ຫວຽດນາມ ໄດ້​ຕ້ອນ​ຮັບ​ການ​ເຂົ້າ​ຢ້ຽມ​ຂ່ຳ​ນັບ​ຂອງຄະນະຜູ້ແທນ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ນຳ​ໂດຍ ສະຫາຍ ທອງສະຫວັນ ພົມວິຫານ ກຳມະການ​ສູນ​ກາງ​ພັກ, ຫົວໜ້າຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ​​ປະຊາຊົນ ປະຕິວັດລາວ​  ໃນໂອກາດທີ່ເດີນທາງໄປຢ້ຽມຢາມ, ເຮັດວຽກ ແລະ ເຂົ້າຮ່ວມງານພົບປະມິດຕະພາບຄັ້ງທິີ X ລະຫວ່າງ ສອງຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ລາວ-ຫວຽດນາມ ແລະ ແຂວງເທືອທຽນເຫວ ສສ ຫວຽດນາມ.

          ໂອ​ກາດນີ້, ສະຫາຍ ຫວໍ ວັນ ເຖືອງ ໄດ້​ສະ​ແດງ​ຄວາມ​​ຍິນ​ດີ​ຕ້ອນ​ຮັບ ສະຫາຍ ທອງສະຫວັນ ພົມວິຫານ ພ້ອມ​ດ້ວຍ​ຄະ​ນະທີ່​ໄດ້​ເດີນ​ທາງ​​ຢ້ຽມ​ຢາມ ສສ ຫວຽດນາມ ແລະ ເຮັດ​ວຽກ​ກັບຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກກອມມູນິດຫວຽດນາມ ເປັນຄັ້ງທໍາອິດ ພາຍຫລັງໄດ້ຮັບໜ້າທີ່ໃໝ່ ໃນບັນຍາກາດທີ່ສອງພັກ ກໍາລັງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະ ມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ. ສະຫາຍປະທານປະເທດຫວຽດນາມ ໄດ້ສະ​ແດງ​ຄວາມດີໃຈ ແລະ ຕີລາຄາສູງຕໍ່ຜົນສຳເລັດ ໃນໂອກາດຢ້ຽມຢາມລາວຢ່າງເປັນທາງການ ໃນຕົ້ນເດືອນເມສານີ້ ແລະ ຝາກຄວາມຂອບໃຈຕໍ່ການຕ້ອນຮັບຂອງການນໍາລາວ ຢ່າງອົບອຸ່ນ ຖານມິດສະຫາຍ ແລະ ສົມກຽດ; ສະແດງຄວາມຊົມເຊີຍ​ຕໍ່​ຜົນ​ສຳ​ເລັດ​ທີ່​ ສປປ ລາວ ຍາດ​ມາ​ໄດ້​ໃນ​ການປົກປັກຮັກສາ​ ແລະ ສ້າງ​ສາພັດ​ທະ​ນາ​ປະ​ເທດ, ສືບຕໍ່ຍາດໄດ້ບັນດາຜົນສໍາເລັດອັນໃໝ່ໃຫຍ່ຫລວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດ. ສະຫາຍປະທານປະເທດ ຍັງໄດ້ມີຄໍາເຫັນເປັນທິດນໍາໃຫ້ແກ່ ສອງຄະນະພົວພັນຕ່າງ ປະເທດສູນກາງພັກ ລາວ ແລະ ຫວຽດນາມ ສືບຕໍ່ເພີ່ມທະວີການປະສານສົມທົບ ແລະ ຮ່ວມມືເພື່ອຊຸກຍູ້ການຜັນຂະຫຍາຍບັນດາຂໍ້ຕົກລົງທີ່ ສອງພັກ, ສອງລັດຖະບານ ໄດ້ຕົກລົງກັນໃຫ້ໄດ້ຮັບຜົນສໍາເລັດ, ພ້ອມທັງຢືນຢັນວ່າ ​ສສ ຫວຽດນາມ ຈະ​ສືບ​ຕໍ່ຮ່ວມກັບ ສປປ ລາວ ເພື່ອເພີ່ມພູນຄູນສ້າງສາຍພົວພັນມິດຕະພາບອັນ​ຍິ່ງ​ໃຫ​ຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ​ໃຫ້​ເກີດດອກ​ອອກ​ຜົນ ​ແລະ ຍືນ​ຍົງ​ຕະຫລອດໄປ.

ສະຫາຍ ທອງສະຫວັນ ພົມວິຫານ ກໍ​ໄດ້ສະແດງຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ນໍາພາ​ຄະນະມາຢ້ຽມຢາມ ແລະ ເຮັດ​ວຽກ ຢູ່ ສສ ຫວຽດນາມ ​ແລະ ໄດ້ສະແດງຄວາມຂອບອົກຂອບໃຈຢ່າງຈິງໃຈ ມາຍັງສະຫາຍ ຫວໍ ວັນ ເຖືອງ ປະທານປະເທດແຫ່ງ ສສ ຫວຽດນາມ ທີ່ໄດ້​ໃຫ້​ການຕ້ອນຮັບ​ອັນ​ອົບ​ອຸ່ນ​, ສະແດງຄວາມຊົມເຊີຍຕໍ່ ສະຫາຍ ຫວໍ ວັນ ເຖືອງ ທີ່ໄດ້ຮັບການແຕ່ງຕັ້ງເປັນປະທານປະເທດແຫ່ງ ສສ ຫວຽດນາມ ແລະ ໄດ້ລາຍງານວ່າ ຝ່າຍລາວ ຕີລາຄາສູງຕໍ່ຜົນສໍາເລັດໃນການຢ້ຽມຢາມລາວຂອງສະຫາຍ ໃນຕົ້ນເດືອນເມສາ ຜ່ານມາ ເຊິ່ງເປັນປະເທດທຳອິດ ພາຍຫລັງຮັບຕໍາແໜ່ງເປັນປະທານປະເທດ; ຂໍນຳເອົາຄໍາຢື້ຢາມຖາມຂ່າວຈາກ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ ມາ​ຍັງ ສະຫາຍ ຫວໍ ວັນ ເຖືອງ, ປະທານປະເທດແຫ່ງ ສສ ຫວຽດນາມ. ສະຫາຍ ທອງສະຫວັນ ພົມວິຫານ ໄດ້ລາຍງານໂດຍສັງເຂບກ່ຽວ​ກັບຈຸດປະສົງການມາຢ້ຽມຢາມ ຫວຽດນາມ ໃນຄັ້ງນີ້,  ເປັນການສືບຕໍ່ປະຕິບັດ ກົນໄກການຮ່ວມມື-ແລກປ່ຽນການຢ້ຽມຢາມ ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຫວຽດນາມ ແລະ ທັງເປັນກິດຈະກໍາ ສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ ປີ 2022 ຜ່ານມາ. ສະຫາຍ ໄດ້ຢືນຢັນວ່າ ພັກ, ລັດ ແລະ ປະຊາຊົນລາວ ພ້ອມກັບ ປະຊາຊົນຫວຽດນາມ ອ້າຍນ້ອງ ຈະ​ສືບ​ຕໍ່ປົກປັກຮັກສາ ແລະ ເສີມ​ຂະ​ຫຍາຍສາຍພົວພັນມິດຕະພາບອັນ​ຍິ່ງ​ໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

ຕອນແລງຂອງວັນດຽວກັນ, ສະຫາຍ ນາງ ເຈືອງ ຖິ ມາຍ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ໄດ້ຕ້ອນຮັບການຢ້ຽມຂໍ່ານັບຂອງຄະນະເຊັ່ນກັນ. ສະຫາຍ ນາງ ເຈືອງຖິມາຍ ໄດ້ຕີລາຄາສູງຕໍ່ການຢ້ຽມຢາມ ແລະ ເຮັດວຽກຂອງຄະນະຢູ່ ສສ ຫວຽດນາມ ໃນຄັ້ງນີ້, ເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນພິເສດຫວຽດນາມ-ລາວ; ຕີລາສູງການພົວພັນຮ່ວມມື ລະຫວ່າງ ສອງພັກ, ສອງລັດ ກໍຄືສອງ ຄະນະພົວພັນຕ່າງປະເທດສູນກາງພັກ ຂອງສອງພັກ ໃນໄລຍະທີ່ຜ່ານມາ; ຕີລາຄາສູງທີ່ສອງຝ່າຍໄດ້ພ້ອມກັນຈັດຕັ້ງການສະເຫລີມສະຫລອງປີສາມັກຄີມິດຕະພາບ ຫວຽດນາມ-ລາວ ປະຈຳປີ 2022 ທີ່ຜ່ານມາດ້ວຍຜົນສໍາເລັດຢ່າງຈົບງາມ;  ຕີລາຄາສູງທີ່ສອງຝ່າຍໄດ້ປະສານສົມທົບກັນໃນການຈັດຕັ້ງຜັນຂະຫຍາຍ ບັນດາຂໍ້ຕົກລົງຮ່ວມມືຂອງການນຳຂັ້ນສູງຂອງສອງພັກ, ສອງລັດໃນໄລຍະທີ່ຜ່ານມາ; ຝາກຄວາມຢ້ຽມຢາມຖາມຂ່າວເຖິງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ; ສະແດງຄວາມອວຍພອນໃຫ້ແກ່ຄະນະຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ໃນຄັ້ງນີ້ປະສົບຜົນສຳເລັດຢ່າງຈົບງາມ.

ສະຫາຍ ທອງສະຫວັນ ພົມວິຫານ ໄດ້ສະແດງຄວາມຂອບໃຈຢ່າງຈິງໃຈຕໍ່ ສະຫາຍ ນາງ ເຈືອງຖິມາຍ  ທີ່ໄດ້​ໃຫ້​ການຕ້ອນຮັບ​ອັນ​ອົບ​ອຸ່ນ​ແກ່ຄະນະ, ພ້ອມ​ທັງສະແດງຄວາມຊົມເຊີຍຕໍ່ ສະຫາຍ ນາງ ເຈືອງຖິມາຍ ທີ່ໄດ້ຮັບການແຕ່ງຕັ້ງເປັນ ຜູ້ປະຈຳການຄະນະເລຂາທິການ ສູນກາງພັກກອມມູນິດຫວຽດນາມ ແລະ ເຊື່ອໝັ້ນວ່າດ້ວຍບົດຮຽນອັນດົມສົມບູນ ແລະ ດ້ວຍມູນເຊື້ອແຫ່ງຄວາມສາມັກຄີຮັກແພງອັນສະໜິດສະໜົມ ແລະ ການພົວພັນຮ່ວມມືຢ່າງໃກ້ຊິດຂອງສະຫາຍທີ່ມີຕໍ່ ສປປ ລາວ, ສະຫາຍ ນາງ ເຈືອງຖິມາຍ ຈະສືບຕໍ່ຊີ້ນໍາ, ຊຸກຍູ້ໃນການເສີມຂະຫຍາຍສາຍພົວພັນມິດຕະພາບພິເສດ ລາວ-ຫວຽດນາມ ໃຫ້ນັບມື້ໄດ້ຮັບການຂະ ຫຍາຍຕົວຍິ່ງໆຂຶ້ນ; ຂໍນຳເອົາຄໍາຢື້ຢາມຖາມຂ່າວຈາກ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວມາ​ຍັງ ສະຫາຍ ເຈືອງຖິມາຍ; ສະຫາຍ ທອງສະຫວັນ ພົມວິຫານ ຍັງໄດ້ລາຍງານໃຫ້ຊາບກ່ຽວກັບສະພາບການພົ້ນເດັ່ນພາຍໃນປະເທດຂອງລາວ; ຕີລາຄາສູງຕໍ່ກັບການພົວພັນຮ່ວມມືລະຫວ່າງສອງພັກ, ສອງລັດໃນໄລຍະທີ່ຜ່ານມາ; ສະແດງຄວາມຮູ້ບຸນຄຸນຕໍ່ການສະໜັບສະໜູນ ແລະ ຊ່ວຍເຫລືອອັນລໍ້າຄ່າແກ່ ພັກ, ລັດ ແລະ ປະຊາຊົນລາວ ໃນສະໄໝຕໍ່ສູ້ກູ້ຊາດ ກໍຄື ສະໄໝປົກປັກຮັກສາປະເທດຊາດໃນປັດຈຸບັນ; ສະແດງຄວາມຢືນຢັນຈະຮ່ວມກັບຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເພີ່ມພູນຄູນສ້າງສາຍພົວພັນມິດຕະພາບ ລາວ-ຫວຽດນາມ ໃຫ້ນັບມື້ໄດ້ຮັບການຂະຫຍາຍຕົວຍິ່ງໆຂຶ້ນ.

ຂ່າວ-ພາບ: ຄຕພ

KPL