ຂປລ. ຄະນະພົວພັນຕ່າງປະເທດສູນກາງພັກ (ຄຕພ) ສະຫລຸບວຽກງານຈັດຕັ້ງ ແລະ ວຽກງານກວດກາ ປະຈໍາປີ 2022 ແລະ ວາງທິດທາງແຜນການ ໃນປີ 2023 ໃນວັນທີ 16 ມີນາ 2023 ພາຍໃຕ້ການເປັນປະທານຂອງ ສະຫາຍ ທອງສະຫວັນ ພົມວິຫານ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີຄະນະພັກ, ຄະນະກົມ ແລະ ພະນັກງານ-ສະມາຊິກພັກ ພາຍໃນຄະນະພົວພັນຕ່າງປະເທດສູນກາງພັກ ເຂົ້າຮ່ວມ.
   ໃນກອງປະຊຸມ, ໄດ້ເຜີຍແຜ່ເນື້ອໃນຈິດໃຈຂອງກອງປະຊຸມວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ຄັ້ງທີ XI, ເນື້ອໃນກອງປະຊຸມວຽກງານກວດກາ ທົ່ວປະເທດ ຄັ້ງທີ IV  ເພື່ອໃຫ້ພະນັກງານ-ລັດຖະກອນ ຂອງ ຄຕພ ມີຄວາມເຂົ້າໃຈຢ່າງເລິກເຊິ່ງ ໂດຍຖືເອົາວຽກງານກວດກາເປັນວຽກໜຶ່ງທີ່ສໍາຄັນໄປຄຽງຄູ່ກັບການນໍາພາ-ຊີ້ນໍາເຄື່ອນໄຫວວຽກງານຕາມພາລະບົດບາດ, ຂອບເຂດ, ສິດ ແລະ ໜ້າທີ່ຄວາມຮັບ ຜິດຊອບ ແລະ ນໍາເອົາເນື້ອໃນຈິດໃຈຂອງ ສອງກອງປະຊຸມດັ່ງກ່າວ ໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ ຢູ່ບັນດາໜ່ວຍພັກ, ບັນດາກົມ ໃຫ້ໄດ້ຮັບຜົນສໍາເລັດ.
   ຈາກນັ້ນ, ກອງປະຊຸມ ຍັງໄດ້ຮັບຟັງການຜ່ານບົດສະຫລຸບວຽກງານຈັດຕັ້ງ ແລະ ວຽກງານກວດກາ ປະຈໍາປີ 2022 ແລະ ທິດທາງໃນປີ 2023 ຂອງ ຄຕພ ສະເໜີໂດຍ ສະຫາຍ ເກີລໍ່ ຢາງກໍ່, ກໍາມະການຄະນະພັກ, ຮອງປະທານກວດກາພັກ, ຫົວໜ້າກົມຈັດຕັ້ງ-ພະນັກງານ ໂດຍໄດ້ຍົກໃຫ້ເຫັນຜົນງານດ້ານດີ ທີ່ຈະໄດ້ເສີມຂະຫຍາຍ, ດ້ານອ່ອນຄົງຄ້າງ ທີ່ຈະຕ້ອງໄດ້ປັບປຸງແກ້ໄຂ, ສາເຫດ ແລະ ບົດຮຽນທີ່ຖອດຖອນໄດ້ ເຊິ່ງໃນປີຜ່ານມາ, ຄະນະພັກ ໄດ້ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ໂດຍໄດ້ຈັດຕັ້ງເຊື່ອມຊືມແນວທາງນະໂຍບາຍຂອງພັກ, ລະບຽບ, ກົດໝາຍຂອງລັດ, ບັນດາມະຕິ, ຄໍາສັ່ງ ຂອງຂັ້ນເທິງວາງອອກ; ເອົາໃຈ ໃສ່ ນໍາພາ-ຊີ້ນໍາຕໍ່ການປັບປຸງການຈັດຕັ້ງ ໃຫ້ສອດຄ່ອງຕາມນິຕິກໍາ ທີ່ຂັ້ນເທິງວາງອອກ; ໄດ້ສໍາເລັດແຜນກໍານົດພະນັກ ງານນໍາພາຄຸ້ມຄອງ ຂັ້ນ ຄຕພ ຄຸ້ມຄອງ ແລະ ສູນກາງຄຸ້ມຄອງ; ເອົາໃຈໃສ່ຊີ້ນໍາຄະນະກວດກາ ແຕ່ລະຂັ້ນເຄື່ອນໄຫວ ຕິດຕາມ, ກວດກາການຈັດຕັ້ງປະຕິບັດພາລະບົດບາດຂອງ ຄະນະໜ່ວຍພັກ, ການກໍ່ສ້າງໜ່ວຍພັກ ປອດໃສ, ເຂັ້ມ ແຂງ, ໜັກແໜ້ນ;  ຕິດຕາມການເຄື່ອນໄຫວ 3 ອົງການຈັດຕັ້ງມະຫາຊົນ, ການຈັດຕັ້ງປະຕິບັດ 2 ວາລະແຫ່ງຊາດ ແລະ ປະຕິບັດຂໍ້ແຂ່ງຂັນຮັກຊາດ-ພັດທະນາ ທີ່ຕິດພັນກັບວຽກງານວິຊາສະເພາະ ຂອງ ຄຕພ.
   ໂອກາດນີ້, ສະຫາຍ ທອງສະຫວັນ ພົມວິຫານ ໄດ້ເນັ້ນໜັກໃຫ້ ຄະນະພັກ, ຄະນະນໍາ, ຄະນະກວດກາແຕ່ລະຂັ້ນ, ຄະນະກົມ ຂອງ ຄຕພ ຈົ່ງພ້ອມກັນເປັນເຈົ້າການໃນການຈັດຕັ້ງຜັນຂະຫຍາຍບັນດາມະຕິ, ຄໍາສັ່ງແນະນໍາ, ຂໍ້ກໍານົດ, ກົດລະບຽບຂອງພັກ ແລະ ກົດໝາຍຂອງລັດ ໃຫ້ເຂັ້ມງວດ; ເອົາໃຈໃສ່ວຽກກໍ່ສ້າງພັກ-ພະນັກງານ ທາງດ້ານການເມືອງ-ແນວຄິດເປັນກົກ, ສ້າງພະນັກງານໃຫ້ມີຄຸນທາດການເມືອງໜັກແໜ້ນ, ມີຄວາມອຸ່ນອ່ຽນທຸ່ນທ່ຽງ, ມີຈັນຍາບັນ, ຈັນຍາທໍາ ໃນການປະຕິບັດໜ້າທີ່ວຽກງານ; ໃຫ້ສືບຕໍ່ເອົາໃຈໃສ່ການຕິດຕາມ-ກວດກາ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການຈັດຕັ້ງປະຕິບັດ 2 ວາລະແຫ່ງຊາດ,  ການປະຕິບັດຂໍ້ແຂ່ງຂັນຮັກຊາດ-ພັດທະນາ ຕິດພັນກັບວຽກງານວິຊາສະເພາະໃຫ້ແທດເຖິງຕົວຈິງ, ຕ້ານ ແລະ ແກ້ໄຂແບບແຜນອາດຍາສິດຫ່າງເຫີນຈາກຕົວຈິງ, ຊອກໃຫ້ເຫັນດ້ານຕັ້ງໜ້າ ເພື່ອເສີມຂະຫຍາຍ, ເຫັນໄດ້ດ້ານອ່ອນຄົງຄ້າງ ເພື່ອດັດແປງແກ້ໄຂໃຫ້ທັນເວລາ. 

ຂ່າວ: ຄຕພ

ພາບ: ອ່າຍຄຳ

KPL