ຂປລ. ວັນທີ  12 ມີນາ 2023 ນີ້, ບໍລິສັດ ພັດທະນາ ແຫລ່ງທ່ອງທ່ຽວ ຕາດເຍືອງ ຫລັກ 40 ເມືອງປາກຊ່ອງຈໍາກັດ ຮ່ວມກັບ ບໍລິສັດ ກວາງໂຈວຫົວຟູ ບໍລິການ ແລະ ລົງທຶນ ຈໍາກັດ ຈັດພິທີເປີດ ຮ້ານກາເຟຕາດເຍືອງ ຢ່າງເປັນທາງການຢູ່ມົນທົນກວາງໂຈວ ສປ ຈີນ ໂດຍມີ ທ່ານນາງ ວັນເພັງ ໄຊສົມພູ ກົງສູນໃຫຍ່ແຫ່ງ ສປປ ລາວ ປະຈຳມົນທົນກວາງຕຸງ, ທ່ານ ລີ້ຕາວເຄີ ປະທານ ບໍລິສັດ ກວາງໂຈວຫົວຟູ ບໍລິການ ແລະ ລົງທຶນ ຈໍາກັດ, ທ່ານ ນາງ ສຸດທິດາ ອຸນາພົມ ຮອງຜູ້ອໍານວຍການ ບໍລິສັດ ພັດທະນາ ແຫລ່ງທ່ອງທ່ຽວ ຕາດເຍືອງ ຫລັກ40 ເມືອງປາກຊ່ອງຈໍາກັດ ແລະ ພາກສ່ວນກ່ຽວຂ້ອງ ຈາກຝ່າຍລາວ ແລະ ສປ ຈີນ ເຂົ້າຮ່ວມ.
          ໃນພິທີ, ທ່ານ ລີ້ຕາວເຄີ ໄດ້ໃຫ້ຮູ້ວ່າ: ຢູ່ທາງພາກໃຕ້ຂອງ ສປປ ລາວ ມີນ້ຳຕົກຕາດທີ່ສວຍງາມໃນນັ້ນລວມເຖິງ ສະຖານທີ່ທ່ອງທ່ຽວນໍ້າຕົກຕາດເຍືອງ, ມີຮ້ານກາເຟ ແລະ ຮ້ານອາຫານ ທີ່ເປັນເອກະ ລັກຂອງທ້ອງຖິ່ນ ແບບປະຊາຊົນມີສ່ວນຮ່ວມ ເພື່ອຮອງຮັບບັນດານັກທ່ອງທ່ຽວ ທັງພາຍໃນ ແລະ ຕ່າງປະເທດ ແລະ ຈາກທົ່ວໂລກໃນແຕ່ລະປີ, ຍ້ອນການບໍລິການທີ່ໃສ່ໃຈ, ອາຫານທີ່ມີຄຸນນະພາບ ແລະ ໄດ້ຮັບຄໍາຍ້ອງຍໍຈາກລູກຄ້າທີ່ມາໃຊ້ບໍລິການ, ລວມທັງໄດ້ຮັບຫລາຍລາງວັນໃນລະດັບຊາດ ແລະ ລະດັບອາຊຽນ ໂດຍເຫັນໄດ້ເຖິງດັ່ງກ່າວ, ບໍລິສັດ ກວາງໂຈວຫົວຟູ ບໍລິການ ແລະ ລົງທຶນ ຈໍາກັດ ຈຶ່ງໄດ້ຮ່ວມກັບ ບໍລິສັດ ພັດທະນາ ແຫລ່ງທ່ອງທ່ຽວ ຕາດເຍືອງ ຫລັກ40 ເມືອງປາກຊ່ອງຈໍາກັດ ນໍາເອົາຜະລິດຕະພັນກາເຟຕາດເຍືອງ ມາຈໍາໜ່າຍ ເຂົ້າສູ່ຕະຫລາດຂອງ ສປ ຈີນ.
          ທ່ານ ລີ້ຕາວເຄີ ຍັງໃຫ້ຮູ້ອີກວ່າ: ຮ້ານກາເຟຕາດເຍືອງ ເປັນການຮ່ວມລົງທຶນ ທີ່ສ້າງຕັ້ງຂຶ້ນບົນພື້ນຖານ ແນວທາງຮ່ວມຊະຕາກຳ ລາວ-ຈີນ ແລະ ເປັນໂຄງການຕົວແບບຂອງການຮ່ວມມືຊາວໜຸ່ມສາກົນຍຸກໃໝ່. ບໍລິສັດພວກເຮົາ ໄດ້ຮັບການສະໜັບສະໜູນຈາກ ສະຖານທູດ ແລະ ສະຖານກົງສູນລາວປະຈຳ ສປ ຈີນ, ເຊິ່ງປັດຈຸບັນ ໄດ້ດຳເນີນທຸລະກິດທາງດ້ານອາຫານ, ການຄ້າ ແລະ ການທ່ອງ ທ່ຽວ. ນອກຈາກການເປີດຮ້ານຕາມສະຖານທີ່ຕ່າງໆແລ້ວ, ພວກເຮົາຍັງມີຜະລິດຕະພັນຮ້ານຄ້າອອນໄລນ ຈີງຕົງ  ເພື່ອໃຊ້ເວທີນີ້ໃນການສົ່ງເສີມຜະລິດຕະພັນລາວສູ່ຕະຫລາດຈີນ ແລະ ສົ່ງເສີມການທ່ອງ ທ່ຽວ ແລະ ວັດທະນະທໍາລາວ ໄປພ້ອມໆກັນ. ໃນປີນີ້, ຂ້າພະເຈົ້າຈະນໍາພາທີມງານຂະຫຍາຍຮ້ານໃນກວາງໂຈວໃຫ້ສຳເລັດ 10 ຮ້ານ ແລະ ໃນປີໜ້າຄາດຄະເນວ່າ ຈະຂະຫຍາຍຮ້ານໃຫ້ໄດ້ທົ່ວທຸກແຂວງໃນ ສປ ຈີນ, ຂ້າພະເຈົ້າຫວັງວ່າ ຊາວຈີນທຸກຄົນສາມາດດື່ມກາເຟລາວ ທີ່ມີຄຸນນະພາບທຽບເທົ່າກັບກາເຟສາກົນ ແລະ ໃນເວລາດຽວກັນກໍໄດ້ແລກປ່ຽນເອກະລັກ ທາງດ້ານວັດທະນະທຳການກິນຂອງລາວ ໄປພ້ອມໆກັນ.
  ໂອກາດນີ້, ທ່ານ ນາງ ສຸດທິດາ ອຸນາພົມ ຮອງຜູ້ອໍານວຍການ ບໍລິສັດ ພັດທະນາ ແຫລ່ງທ່ອງທ່ຽວ ຕາດເຍືອງ ຫລັກ40ເມືອງປາກຊ່ອງຈໍາກັດ ໄດ້ສະແດງ ຄວາມຂອບໃຈມາຍັງ ຄູ່ຮ່ວມລົງທຶນ ທີ່ສ້າງຕັ້ງຂຶ້ນບົນພື້ນຖານ ແນວທາງຮ່ວມຊະຕາກຳ ລາວ-ຈີນ ແລະ ເປັນໂຄງການຕົວແບບຂອງການຮ່ວມມືຊາວໜຸ່ມສາກົນຍຸກໃໝ່. ບໍລິສັດພວກເຮົາ ໄດ້ຮັບການສະໜັບສະໜູນຈາກ ສະຖານທູດ ແລະ ສະຖານກົງສູນລາວປະຈຳ ສປ ຈີນ ແລະ ບໍລິສັດ ກວາງໂຈວຫົວຟູ ບໍລິການ ແລະ ລົງທຶນ ຈໍາກັດ ທີ່ໄດ້ສະໜັບສະໜູນໃນການນໍາເອົາຜະລິດຕະພັນກາເຟ ຂອງ ສປປ ລາວ ເຂົ້າມາສູ່ຕະຫລາດໃນນະຄອນກວາງໂຈວ ເຊິ່ງເປັນບາດກ້າວທຳອິດ ທີ່ຈະເປີດສັງກາດໃໝ່ແຫ່ງການຂະ ຫຍາຍກິດຈະການຮ້ານກາເຟລາວ ຢູ່ ສປ ຈີນ.

KPL