ຂປລ.ຕາມຂ່າວຈາກ ວິທະຍຸ ສາກົນ ແຫ່ງ ສປ ຈີນ ,ວັນ​ທີ3​ ກຸມພາ​ນີ້, ເຈົ້າໜ້າທີ່ ກ່ຽວຂ້ອງ ຂອງກະຊວງ ການຄ້າຈີນ ກ່າວໃນ ກອງປະຊຸມ ຖະແຫລງຂ່າວ ຂອງ ຫ້ອງການ ຖະແຫລງຂ່າວ ຄະນະລັດຖະບານ ສປ ຈີນ ວ່າ: ການປະຕິບັດ ສັນຍາ ການພົວພັນ ຄູ່ຮ່ວມມື ເສດຖະກິດ ແບບຮອບດ້ານ ໃນພາກພື້ນ (RCEP) ໄດ້ເປີດກວ້າງ ການຮ່ວມມື ດ້ານການຄ້າ ແລະ ການລົງທຶນ ລະຫວ່າງ ສປ ຈີນ ກັບສະມາຊິກ RCEP ໄດ້ປະສົບຜົນສຳເລັດ ຢ່າງຕັ້ງໜ້າ. ຂະນະ​ທີ່ ຍອດມູນຄ່າ ການຄ້າ ຂາເຂົ້າ-ຂາອອກ ລະຫວ່າງ ສປ ຈີນ ກັບສະມາຊິກອື່ນໆ ຂອງ RCEP ໃນປີ 2022 ໄດ້ບັນລຸເຖິງ 12.950 ຕື້ຢວນ, ເພີ່ມຂຶ້ນ 7,5% ເມື່ອທຽບໃສ່ປີ 2021, ກວມ​ເອົາ 30,8% ຂອງຍອດມູນຄ່າ ການຄ້າ ກັບຕ່າງປະເທດຂອງສປ ຈີນ. ໃນນັ້ນ, ຈັງຫວະ ການເຕີບໂຕ ດ້ານການຄ້າ ຂາເຂົ້າ-ຂາອອກ ຕໍ່ 8 ສະມາຊິກ RCEP ຂອງ ສປ ຈີນ ມີຫລາຍກວ່າ 10%.​ໃນປີ 2022, ການລົງທຶນ ໂດຍກົງ ປະເພດ ບໍ່ແມ່ນ ການທະນາຄານ ຂອງ ສປຈີນ ຕໍ່ສະມາຊິກອື່ນໆ ຂອງ RCEP ໄດ້ບັນລຸ ມູນຄ່າ ເຖິງ 17,96 ຕື້ໂດລາ ສະຫະລັດ, ເພີ່ມຂຶ້ນ 18,9%, ສປ ຈີນ ໄດ້ດຶງດູດ ການລົງທຶນ ຈາກບັນດາ ສະມາຊິກ RCEP ມີມູນຄ່າເຖິງ 23,53 ຕື້ໂດລາ ສະຫະລັດ, ເພີ່ມຂຶ້ນ 23,1%, ຈັງຫວະ ການເຕີບໂຕ ດ້ານການລົງທຶນ ລະຫວ່າງ ສອງຝ່າຍ ລ້ວນແຕ່ ສູງກວ່າ ລະດັບທົ່ວໄປ./.

(ບັນນາທິການຂ່າວ: ຕ່າງປະເທດ), ຮຽບຮຽງຂ່າວໂດຍ: ສະໄຫວ ລາດປາກດີ

KPL