ຂປລ
ການໃຫ້ຄວາມຊ່ວຍເຫລືອແກ່ຜູ້ປະສົບໄພພິບັດທາງທໍາມະຊາດ, ໂດຍສະເພາະໄພນໍ້າຖ້ວມທີ່ ແຂວງອຸດົມ ໄດ້ສືບຕໍ່ດໍາເນີນ ດ້ວຍຄວາມຂຸ້ນຂ້ຽວ ຈາກທຸກພາກສ່ວນໃນສັງຄົມ ເພື່ອຫລຸດຜ່ອນຜົນກະທົບ ແລະ ບັນເທົາ ຄວາມຍາກລໍາບາກຂອງພໍ່ແມ່ປະຊາຊົນ.
* ການໃຫ້ຄວາມຊ່ວຍເຫລືອແກ່ຜູ້ປະສົບໄພພິບັດທາງທໍາມະຊາດ, ໂດຍສະເພາະໄພນໍ້າຖ້ວມທີ່ ແຂວງອຸດົມ ໄດ້ສືບຕໍ່ດໍາເນີນ ດ້ວຍຄວາມຂຸ້ນຂ້ຽວ ຈາກທຸກພາກສ່ວນໃນສັງຄົມ ເພື່ອຫລຸດຜ່ອນຜົນກະທົບ ແລະ ບັນເທົາ ຄວາມຍາກລໍາບາກຂອງພໍ່ແມ່ປະຊາຊົນ. ໃນນັ້ນ, ສະມາຄົມສິລະປິນແຫ່ງຊາດລາວ ກໍກຽມຈັດກິດຈະກໍາ ຄອນເສີດການກຸສົນ ທີ່ເປັນການລວມໂຕ ຂອງສິລະປິນລາວທີ່ມີຊື່ສຽງ ເພື່ອເປັນການລະດົມ ທຶນຮອນ, ວັດຖຸອຸປະກອນ, ເຄື່ອງນຸ່ງຫົ່ມ.
ທ່ານ ບົວເງິນ ຊາພູວົງ ປະທານສະມາຄົມສິລະປິນແຫ່ງຊາດລາວ ໄດ້ກ່າວໃນງານຖະແຫລງ ຂ່າວທີ່ຈັດຂຶ້ນໃນວັນທີ່ໃນວັນທີ 20 ກັນຍາ 2022 ວ່າ: ດັ່ງທີ່ເຮົາຮູ້ນໍາກັນວ່າປັດຈຸບັນ ປະເທດເຮົາ ໂດຍສະເພາະແຂວງອຸດົມໄຊກຳລັງປະສົບໄພພິບັດ ທາງທໍາມະຊາດນໍ້າຖ້ວມ ເຊິ່ງສ້າງຄວາມເສຍຫາຍ ຕໍ່ອາຄານບ້ານເຮືອນ, ຊັບສິນ, ເນື້ອທີ່ການຜະລິດຢ່າງໜັກໜ່ວງ ໂດຍຫລາຍພາກສ່ວນ ທັງພາກລັດ ແລະ ເອກະຊົນ ກໍາລັງຂຸ້ນຂຽວໃຫ້ຄວາມຊ່ວຍເຫລືອ ເພື່ອບັນເທົາທຸກໃນເບື້ອງຕົ້ນ. ສະເພາະສະມາຄົມສິລະປິນລາວ ເມື່ອເຫັນປະຊາຊົນເດືອນຮ້ອນ ກໍມີການເຕົ້າໂຮມ, ປຶກສາຫາລືກັນ ເພື່ອຈັດກິດຈະກໍາ ຄອນເສີດການກຸສົນ ທີ່ເປັນການລວມໂຕຂອງສິປະປິນລາວ ທີ່ມີຊື່ສຽງ ທັງອາຊີບ ແລະ ສະໝັກຫລິ້ນ ບໍ່ວ່າຈະເປັນ ໝໍຂັບ, ໝໍລໍາ, ນັກຮ້ອງສະຕິງ, ລູກທຸງ, ການສະແດງມາຍາກົນ ຊຶ່ງງານດັ່ງກ່າວຈະຈັດເປັນເວລາ 3 ຊົ່ວໂມງ ໃນວັນທີ 23 ກັນຍາ 2022 ທີ່ກອງສິລະປະກອນແຫ່ງຊາດ ເພື່ອລະດົມທຶນຮ້ອນ, ວັດຖຸອຸປະກອນ ແລະ ເຄື່ອງນຸ່ງຫົ່ມ ຊຶ່ງການຮັບບໍລິຈາກແມ່ນເລີ່ມ ແຕ່ເວລາ 8:00 ໂມງເປັນຕົ້ນໄປ ສ່ວນຄອນເສີດແມ່ນເລີ່ມແຕ່ເວລາ 16:00-18:00 ໂມງແລງ; ການຈັດງານຄັ້ງນີ້ຫວັງວ່າປະຊາຊົນຈະສະລະເວລາມາຮ່ວມງານ ເພື່ອແບ່ງປັນນໍ້າໃຈຊ່ວຍເຫລືອກັນໃນຍາມຫຍຸ້ງຍາກ.
ພ້ອມນີ້, ທ່ານ ສຸລິຍະ ຕະນຸວັນ ຍັງເຜີຍຄວາມຮູ້ສຶກວ່າ: Newgen Entertainment ເປັນທັງຄ້າຍເພງ ແລະ ສູນລວມໄວໜຸ່ມ ສໍາລັບງານນີ້ສະໜັກໃຈເຂົ້າຮ່ວມ ເພາະເຫັນເຖິງ ຄວາມເສຍຫາຍ ຂອງອຸທົກກະໄພທີ່ພີ່ນ້ອງລາວ ທາງພາກເໜືອທີ່ໄດ້ຮັບ ແລະ ໃນນາມທີ່ເປັນໂຕແທນສິລະປິນ ໄວໜໜຸ່ມກໍຂໍເຊີນຊວນ ທຸກໆຄົນຂົ້າເຂົ້າຮ່ວມງານນີ້ ເພື່ອຮ່ວມແບ່ງປັນນໍ້າໃຈ ວັດຖຸສິ່ງຂອງຕ່າງໆ ສົ່ງຕໍ່ໃຫ້ປະຊາຊົນ ທີ່ກໍາລັງລໍາບາກຄອຍຖ້າການຊ່ວຍເຫລືອຈາກສັງຄົມ.
ສໍາລັບທ່ານໃດມີຄວາມສົນໃຈ ຢາກຮ່ວມບໍລິຈາກ ກໍສາມາດຕິດຕໍ່ສອບຖາມຂໍ້ມູນເພີ່ມທີ່ເບີ 020 59998198, 020 55616405./.
KPL