ຂປລ. ​ສູນບໍລິການ ວິສາຫະກິດ ຂະຫນາດນ້ອຍ ແລະ ຂະໜາດກາງ (SME) ຈະໄດ້ເປີດການບໍລິການ ຢູ່ແຂວງອຸດົມໄຊ ໃນວັນທີ 1 ກັນຍາ 2022 ນີ້ ໂດຍກຳນົດເອົາສຳນັກງານຂອງ ສະພາການຄ້າ ແລະ ອຸດສາຫະກຳແຂວງ ເປັນຈຸດບໍລິການ ໂດຍຕິດພັນກັບການ ເປີດສູນພັດທະ ນາຜະລິດຕະພັນ ແລະ ສົ່ງເສີມການຕະຫລາດ (PMC) ຢູ່ໃນຈຸດດຽວກັນ.

 ​​ເມື່ອ​ບໍ່​ດົນ​ມາ​ນີ້, ສະພາການຄ້າ ແລະ ອຸດສາຫະກຳ ແຂວງອຸດົມໄຊ ສົມທົບກັບ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ກົມສົ່ງເສີມ ວິສາຫະກິດຂະຫນາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ ແລະ ພະແນກ ອຸດສາຫະກຳ ແລະ ການຄ້າແຂວງອຸດົມໄຊ ຈັດກອງປະຊຸມ ເຜີຍແຜ່ພາລະບົດບາດ, ໜ້າທີ່ ຂອງສູນບໍລິການດັ່ງກ່າວ ຢູ່ແຂວງອຸດົມ​ໄຊ ໂດຍການເປັນປະທານຮ່ວມຂອງທ່ານ ສົມຈິດ ອິນທະມິດ ປະທານກິດຕິມະສັກ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ທ່ານ ບຸນເພັງ ສີບຸນເຮືອງ ຫົວໜ້າກົມສົ່ງເສີມ ວິສາຫະກິດຂະໜາາດນ້ອຍ ແລະ ກາງ ກະຊວງ ອຸດສາຫະກຳ ແລະ ການຄ້າ ແລະ ທ່ານ ສອນທະນູ ສິງດາລາ ຫົວໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊ ​ແລະ ພາກສ່ວນ​ກ່ຽວຂ້ອງ ເຂົ້າຮ່ວມ.

ການເຜີຍແຜ່ບົດບາດຂອງສູນ ບໍລິການ ວິສາຫະກິດຂະຫນາດນ້ອຍ ແລະ ກາງ ໃນຄັ້ງນີ້, ກໍເພື່ອເຮັດໃຫ້ທຸກພາກສ່ວນຮັບຮູ້, ເຂົ້າໃຈ ຢ່າງກວ້າງຂວາງ ຕໍ່ກັບສູນບໍລິການດັ່ງກ່າວ ແລະ ພ້ອມກັນ ປະກອບສ່ວນເຂົ້າໃນການ ເຄື່ອນໄຫວວຽກງານ ການບໍລິການຂອງສູນ ປະກອບສ່ວນເຮັດໃຫ້ເສດຖະກິດ ຂອງແຂວງອຸດົມໄຊ ໄດ້ຮັບການພັດທະນາ ແລະ ຂະຫຍາຍຕົວ ຢ່າງຕໍ່ເນື່ອງ.

ສູນ​ບໍລິການ ວິສາຫະກິດ ຂະຫນາດນ້ອຍ ແລະ ກາງ ເປັນຫົວໜ່ວຍວິຊາການ ໃນການໃຫ້ຄຳປຶກສາ, ການຈັດງານສຳມະນາ ພົບປະນັກທຸລະກິດ, ການຝຶກອົບຮົມ, ການສົ່ງເສີມ ວິສາຫະກິດຂະຫນາດນ້ອຍ ແລະ ກາງໃຫ້ເຂົ້ເຖິງແຫລ່ງທຶນ ແລະ ນະວັດຕະກຳໃໝ່ໆ ເພື່ອປັບປຸງ ດ້ານການພັດທະນາສິນຄ້າ ແລະ ການບໍລິການ ແນໃສ່ເຮັດໃຫ້ ວິສາຫະກິດ ຂະຫນາດນ້ອຍ ແລະ ກາງ ເຕີບໂຕແບບຍືນຍົງ, ສາມາດເຊື່ອມໂຍງ ແລະ ແຂ່ງຂັນໄດ້ທັງຕະຫລາດພາຍໃນ ແລະ ສາກົນ.

ຂ່າວ: ຄານມະນີ

KPL