ຂປລ
ດັ່ງທີ່ເຮົາຮູ້ແລ້ວວ່າສະພາບເສດຖະກິດໃນປັດຈຸບັນໄດ້ສ້າງຄວາມເດືອດຮ້ອນຕໍ່ການດໍາລົງຊີວິດຂອງປະຊົນຢ່າງຫລວງຫລາຍ ໃນຂອບເຂດທົ່ວປະເທດ.
ດັ່ງທີ່ເຮົາຮູ້ແລ້ວວ່າສະພາບເສດຖະກິດໃນປັດຈຸບັນ ໄດ້ສ້າງຄວາມເດືອດຮ້ອນ ຕໍ່ການດໍາລົງຊີວິດ ຂອງປະຊົນ ຢ່າງຫລວງຫລາຍ ໃນຂອບເຂດທົ່ວປະເທດ. ສະນັ້ນ, ໃນກອງປະຊຸມ ສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ດຳເນີນເປັນມື້ທີ 2 ໃນວັນທີ 14 ມິຖຸນາ 2022 ບັນດາສະມາຊິກ ສະພາແຫ່ງຊາດ (ສສຊ) ໄດ້ສະເໜີລັດຖະບານ ເລັ່ງແກ້ໄຂບັນຫາ ທີ່ສົ່ງຜົນກະທົບ ດ້ານເສດຖະກິດ ເປັນຕົ້ນ: ໄພເງິນເຟີ້ ແລະ ລາຄານໍ້າມັນແພງ ໃຫ້ປາຜົນເປັນຈິງຢ່າງ ເລັ່ງດ່ວນ ເພື່ອແກ້ໄຂຊີວິດ ການເປັນຢູ່ ຂອງປະຊາຊົນ ໃຫ້ນັບມື້ດີຂຶ້ນ.
ດັ່ງທີ່ທ່ານ ສາຍທອງ ໄຊຍະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈໍາປາສັກ ໄດ້ມີຂໍ້ສະເໜີວ່າ: ມີຄວາມເປັນເອກະພາບ ຕໍ່ບົດລາຍງານ ຂອງລັດຖະບານ ແລະ ຂໍສະເໜີ 2 ບັນຫາເລັ່ງດ່ວນ ທີ່ສົ່ງຜົນກະທົບຕໍ່ການດໍາລົງຊີວິດ ຂອງປະຊາຊົນ ກໍຄືບັນຫາເງິນເຟີ້ ຫລື ເງິນກີບອ່ອນຄ່າ ແລະ ບັນຫານໍ້າມັນ ທີ່ເກີດຈາກຫລາຍປັດໄຈ ທັງພາຍນອກ ແລະ ພາຍໃນ ເປັນຕົ້ນ ແມ່ນການຄຸ້ມຄອງລັດ ດ້ວຍກົດໝາຍ ຍັງບໍ່ສາມາດ ຈັດຕັ້ງປະຕິບັດ ໄດ້ ຢ່າງເຂັ້ມງວດ ຈຶ່ງພາໃຫ້ເກີດ ມີປາກົດການ ແລກປ່ຽນເງິນຕາ ຕ່າງປະເທດ ແບບຊະຊາຍ, ກັກຕຸນ ແລະ ຂຶ້ນລາຄາສິນຄ້າ ຕາມລຳພັງໃຈ, ການຊື້ຂາຍສິນຄ້າ ໃນໄລຍະຜ່ານມາ ແລະ ປັດຈຸບັນ ທີ່ຍັງຊື້ຂາຍ ເປັນເງິນຕາ ຕ່າງປະເທດ ແລະ ບັນຫາ ການສົ່ງອອກ-ນໍາເຂົ້າ ກໍຍັງບໍ່ທັນ ເປັນລະບົບ ເຂັ້ມງວດ, ຂາດຂອດການຕິດຕາມ ຢ່າງຈິງຈັງ ໃນການຄຸ້ມຄອງເງິນຕາ ແລະ ການຜະລິດ ເປັນສິນຄ້າ ຖ້າບໍ່ພ້ອມກັນ ເຮັດແທ້ທໍາຈິງ ມີແຕ່ວ່າປະຕິບັດ ແຕ່ບໍ່ກວດກາ ວ່າປະຕິບັດແລ້ວໝາກຜົນ ເປັນແນວໃດ ອັນນີ້ກໍຖືວ່າ ເປັນຂໍ້ຄົງຄ້າງ. ສ່ວນບັນຫາ ນໍ້າມັນແພງ, ຂາດເຂີນນໍ້າມັນ, ບາງປໍ້າກັກຕຸນນໍ້າມັນ, ບາງປໍ້າກໍ່ຂາຍແພງ ກວ່າລາຄາ ທີ່ລັດວາງອອກ ກໍໃຫ້ຮີບຮ້ອນ ແກ້ໄຂຢ່າງເລັ່ງດ່ວນ ເຊິ່ງບັນຫານີ້ ມັນໄດ້ສ້າງ ຄວາມຫຍຸ້ງຍາກ ຕໍ່ການດໍາລົງຊີວິດ, ການຜະລິດກະສິກໍາ ແລະ ອື່ນໆ.
ພ້ອມນີ້, ທ່ານ ວົງສະຫວັນ ທິບພະຈັນ ສະມາຊິກສະພາແຫ່ງຊາດ ເຂດເລືອກຕັ້ງທີ 6 ແຂວງຫລວງພະບາງ ກໍໄດ້ສະເໜີ ບັນຫາດັ່ງກ່າວວ່າ: ບັນຫານໍ້າມັນແພງ ແລະ ບັນຫາເງິນເຟີ້ ກໍາລັງຟົດເດືອດ ໃນສັງຄົມເພາະ ປະຊາຊົນສະເໜີຫລາຍ ໄປທາງໃດ ກໍ່ມີຫາງສຽງ ຕໍ່ບັນຫານີ້ ຈຶ່ງສະເໜີ ໃຫ້ລັດຖະບານ ເລັ່ງແກ້ໄຂ ໂດຍສະເພາະໃນ 6 ເດືອນທ້າຍປີນີ້ ຈະມີວິທີການໃດທີ່ຈະເຮັດ ໃຫ້ສະພາບ ການກັບມາຄົງທີ່, ບໍ່ໃຫ້ເໜັງຕີງ ຫລາຍກວ່າເກົ່າ ເພາະຖ້າເປັນ ແນວນີ້ ກໍເຫັນໃຈປະຊາຊົນ ທີ່ມີລາວຮັບໜ້ອຍ ແຕ່ຄ່າຄອງຊີບສູງ ຖ້າເປັນແບບນີ້ ຕໍ່ໄປຢ້ານເກີດ ຜົນກະທົບຕາມມາ ເປັນຕົ້ນ: ການຂາດເຂົ້າກິນ ເພາະປະຊາຊົນ ບໍ່ສາມາດເຮັດການຜະລິດໄດ້ ເນື່ອງຈາກຂາດນໍ້າມັນ ແລະ ລາຄາປຸຍທີ່ສູງຂຶ້ນ ຈາກເມື່ອກ່ອນເປົາລະ 4-5 ແສນກີບ ແຕ່ມາປີນີ້ ເປົາລະ 1 ລ້ານກີບແລ້ວ ຊຶ່ງນີ້ກໍເປັນອີກບັນຫາ ທີ່ຈະສົ່ງຜົນກະທົບ ຕໍ່ການການຜະລິດ ກະສິກຳຂອງປະຊາຊົນ. ສ່ວນບັນຫາເງິນເຟີ້ ຈະເປັນໄປໄດ້ບໍ່? ຖ້າມີການກໍານົດ ຫົວໜ່ວຍອັດຕາແລກປ່ຽນຊື້ໄດ້ ແຕ່ບໍ່ໃຫ້ຂາຍ ເພື່ອເປັນການດູນເງິນ ນອກລະບົບ ໃຫ້ເຂົ້າສູ່ທະນາຄານ.
ທຸກຄຳສະເໜີທີ່ບັນດາ ສສຊ ຕໍ່ລັດຖະບານນັ້ນແມ່ນບັນຫາເລັ່ງດ່ວນ ທັງສົ່ງຜົນກະທົບ ໂດຍກົງຕໍ່ການດຳລົງຊີວິດ ປະຈຳວັນ ຂອງປະຊາຊົນລາວ ບັນດາເຜົ່າ ແລະ ອາດສົ່ງຜົນກະທົບ ໄລຍະຍາວ ເປັນຕົ້ນ ເຮັດໃຫ້ຂາດ ສະບຽງອາ ຫານ ເນື່ອງຈາກປະຊາຊົນ ບໍ່ສາມາດທຳການຜະລິດ ໄດ້ເຕັມເມັດເຕັມໜ່ວຍ. ຖ້າລັດຖະບານ ແກ້ໄຂໄດ້ ກໍຈະເຮັດໃຫ້ ຊີວິດການເປັນຢູ່ ຂອງປະຊາຊົນດີຂຶ້ນ, ເຮັດໃຫ້ສັງຄົມ ມີຄວາມສະຫງົບ ແລະ ບໍ່ເກີດປາກົດການ ຫຍໍ້ທໍ້ຕ່າງໆ./.
ໂດຍ: ມາລີດາ
KPL
