ຂປລ. ໃນວັນທີ 18 ກຸມພາ 2021 ນີ້, ກະຊວງແຜນການ ແລະ ການລົງທຶນ ຮ່ວມກັບອົງການການເງິນສາກົນ (IFC) ຈັດກອງປະຊຸມເຜີຍແຜ່ບົດລາຍງານແຜນປະຕິຮູບການສົ່ງເສີມການລົງທຶນສຳລັບ ສປປ ລາວ ສະບັບໃໝ່ ແນໃສ່ເຮັດໃຫ້ ເສດຖະກິດຂອງ ສປປ ລາວ ມີການຂະຫຍາຍຕົວ​, ມີການສ້າງວຽກເຮັດງານທຳຫລາຍຂຶ້ນ ແລະ ນຳເອົາຄວາມຈະເລີນຮຸ່ງເຮືອງມາສູ່ທົ່ວປວງຊົນ.

ໃນບົດລາຍງານສະບັບໃໝ່ຂອງອົງການການເງິນສາກົນ ລະບຸວ່າ: ການສ້າງຍຸດທະສາດການລົງ ທຶນແບບກວມລວມ ໄປຄຽງຄູ່ການປັບປຸງລະບຽບການແບບຕໍ່ເນື່ອງ ຈະຊ່ວຍໃຫ້ ສປປ ລາວ ສາມາດດຶງດູດການລົງທຶນຈາກຕ່າງປະເທດ ໄດ້ຫລາກຫລາຍ ແລະ ມີຄຸນນະພາບຈາກຕ່າງປະເທດ, ​ເຊິ່ງບົດລາຍງານດັ່ງກ່າວ ແມ່ນແນວທາງສຳລັບການວາງຍຸດທະສາດດ້ານນະໂຍບາຍ ແລະ ການສົ່ງເສີມການລົງທຶນແບບໃໝ່, ສ້າງຂຶ້ນພາຍໃຕ້ການສະໜັນສະໜູນຈາກລັດຖະບານຍີ່ປຸ່ນ ເຊິ່ງໄດ້ສະເໜີແຜນປະຕິບັດງານສຳລັບການປັບປຸງທີ່ມີເປົ້າໝາຍ ເພື່ອເຮັດໃຫ້ການລົງທຶນຈາກຕ່າງປະເທດ ນຳເອົາຜົນປະໂຫຍດມາສູ່ເສດຖະກິດຂອງ ສປປ ລາວ. 

ຕະຫລອດໄລຍະ 15 ປີຜ່ານມາ, ການລົງທຶນຈາກຕ່າງປະເທດ ໄດ້ປະກອບສ່ວນຢ່າງສຳຄັນໃນການເຮັດໃຫ້ເສດຖະກິດຂອງ ສປປ ລາວ ມີການເຕີບໂຕທີ່ເຂັ້ມແຂງ. ແຕ່ເຖິງຢ່າງໃດກໍຕາມ, ບົດລາຍງານ​ໄດ້ຊີ້ໃຫ້ເຫັນວ່າ ການລົງທຶນເກືອບທັງໝົດເນັ້ນໃສ່ແຕ່ຂະແໜງຊັບພະຍາກອນທຳມະຊາດ ​ເຊິ່ງສ້າງວຽກເຮັດງານແບບຈຳກັດ ແລະ ບໍ່ສາມາດຂຸດຄົ້ນທ່າແຮງຂອງການລົງທຶນ ຈາກຕ່າງປະເທດໄດ້ຢ່າງເຕັມສ່ວນ. ສ່ວນຂະແໜງການອື່ນໆ ແມ່ນມີບໍລິມາດການລົງທຶນຕໍ່າ, ຄວາມຈິງແລ້ວຂະແໜງການເຫລົ່ານັ້ນ ມີທ່າແຮງສູງໃນການສ້າງວຽກເຮັດງານທຳ.

ໂອກາດ​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະ ມົນຕີກະຊວງແຜນການ ແລະ ການລົງທຶນ ກ່າວວ່າ: “ບົດລາຍງານສະບັບໃໝ່ນີ້ ແມ່ນສະໜອງຂໍ້ມູນການວິໄຈແບບເລິກເຊິ່ງ ກ່ຽວກັບສະພາບການລົງທຶນຂອງພາກເອກະຊົນຢູ່ ສປປ ລາວ ໄດ້ທັນກັບສະພາບການ ແລະ ຈະເປັນແນວທາງໃຫ້ແກ່ຜູ້ວາງນະໂຍບາຍ ໃນການກຳນົດທີ່ຕັ້ງເສດຖະກິດຂອງປະເທດໃນປັດຈຸບັນ ແລະ ອະນາຄົດ ພາຍໃຕ້ສະພາບການເຊື່ອມໂຍງກັບພາກພື້ນ ແລະ ສາກົນ. ແຜນປະຕິບັດງານການປັບປຸງທີ່ສະເໜີໃນບົດລາຍງານສະບັບນີ້ ຍັງເປັນຄຳແນະນຳກ່ຽວກັບ ການປັບປຸງທີ່ເປັນບຸລິມະ ສິດຂອງລັດຖະບານ ເພື່ອຍາດ​ແຍ່ງໂອກາດນຳເອົາການລົງທຶນຈາກຕ່າງປະເທດເຂົ້າມາ ເພື່ອສ້າງຄວາມຫລາກຫລາຍດ້ານເສດຖະກິດ ແລະ ສົ່ງເສີມສະມັດຕະພາບ ແລະ ປະສິດທິພາບ. ນອກຈາກນັ້ນ, ບົດລາຍງານຍັງສະເໜີ ໃຫ້ຫັນປ່ຽນການລົງທຶນຈາກຕ່າງປະເທດ ທີ່ເປັນຍຸດທະສາດຈາກການລົງທຶນທີ່ເນັ້ນໃສ່ຊັບພະຍາກອນທຳມະຊາດ ໄປສູ່ການລົງທຶນທີ່ເນັ້ນປະສິດທິພາບ ເພື່ອຊ່ວຍໃຫ້ເສດຖະກິດກ້າວເຂົ້າສູ່ອຸດສາຫະກຳທີ່ນຳໃຊ້ຄວາມຮູ້ເປັນຕົ້ນຕໍ ແລະ ຫລຸດຜ່ອນສິ່ງກີດຂວາງທີ່ບໍ່ຈຳເປັນ.

ທ່ານ ຄາຍ ແຄວໂຮເຟີ ຜູ້ຕາງຫນ້າອາວຸໂສ ອົງການການເງິນສາກົນ ປະຈຳພາກພື້ນ ສຳລັບ ສສ ຫວຽດນາມ, ກຳປູເຈຍ ແລະ ສປປ ລາວ ກ່າວວ່າ: ຈຸດປະສົງຂອງບົດລາຍງານສະບັບນີ້ ແມ່ນເພື່ອຍົກໃຫ້ເຫັນວ່າເຮັດແນວໃດການປັບປຸງທີ່ເປັນເປົ້າໝາຍນັ້ນ ຈະສ້າງສະພາບແວດລ້ອມທີ່ເອື້ອອຳນວຍແກ່ການລົງທຶນ ແລະ ສະໜັບສະໜູນຄວາມສາມາດດ້ານການແຂ່ງຂັນຂອງ ສປປ ລາວ ໃນການດຶງດູດການລົງທຶນຈາກຕ່າງປະເທດທີ່ມີຄຸນນະພາບສູງ. ອັນນີ້ຈະຊ່ວຍສ້າງວຽກເຮັດງານທຳ, ຖ່າຍທອດຄວາມຮູ້ ໃຫ້ແກ່ທຸລະກິດພາຍໃນ ແລະ ຊຸກຍູ້ໃຫ້ທຸລະກິດພາຍໃນສາມາດເຊື່ອມໂຍງກັບຕ່ອງໂສ້ມູນຄ່າໂລກ, ສ້າງຄວາມຫລາກຫລາຍໃຫ້ເສດຖະກິດ ເພື່ອການເຕີບໂຕແບບຍືນຍົງ ແລະ ກວມລວມ.

ຂ່າວ: ສິງຄຳ, ພາບ: ສຸກທະວີ

ຮູບ: 6598,6599

KPL