ຂປລ
ໃນໂອກາດບຸນອອກພັນສາ ປະຈຳປີ 2026 ນີ້, ຕະຫຼາດສົດໂນນຄໍ້ ເມືອງໄຊເສດຖາ ນະຄອນຫຼວງວຽງຈັນ ໄດ້ກະກຽມຄວາມພ້ອມຮອບດ້ານໃນການສະໜອງສິນຄ້າປະເພດຕ່າງໆ ເພື່ອຮອງຮັບຄວາມຕ້ອງການຂອງປະຊາຊົນໃນໄລຍະບຸນປະເພນີອອກພັນສາ, ພ້ອມທັງວາງມາດຕະການຄຸ້ມຄອງລາຄາສິນຄ້າ ແລະ ຄຸນນະພາບສິນຄ້າຢ່າງເຂັ້ມງວດ ເພື່ອສ້າງຄວາມໝັ້ນໃຈໃຫ້ແກ່ຜູ້ບໍລິໂພກ.
ທ່ານ ວຽງຄຳ ລໍວັນໄຊ ຫົວໜ້າຈັດສັນຕະຫຼາດສົດໂນນຄໍ້ ໄດ້ໃຫ້ຮູ້ວ່າ: ໃນໄລຍະບຸນອອກພັນສາ ປະຈຳປີ 2026 ນີ້, ຕະຫຼາດໄດ້ກະກຽມສິນຄ້າເຄື່ອງອຸປະໂພກ-ບໍລິໂພກຫຼາຍປະເພດ ໃຫ້ມີປະລິມານພຽງພໍຮອງຮັບຄວາມຕ້ອງການຂອງປະຊາຊົນທີ່ຈະຈັບຈ່າຍຊື້-ຂາຍສິນຄ້າ ເພື່ອກະກຽມອາຫານການກິນ ແລະ ຮ່ວມກິດຈະກຳບຸນປະເພນີຕາມຮີດຄອງປະເພນີລາວ. ພ້ອມນີ້, ຕະຫຼາດຍັງໄດ້ວາງມາດຕະການຄຸ້ມຄອງລາຄາສິນຄ້າຢ່າງເຂັ້ມງວດ ໂດຍຫ້າມຜູ້ຄ້າຂາຍສວຍໂອກາດຂຶ້ນລາຄາ ຫຼື ກັກຕຸນສິນຄ້າຕາມອຳເພີໃຈ, ພ້ອມກຳນົດໃຫ້ຜູ້ຄ້າຂາຍຕິດປ້າຍລາຄາສິນຄ້າໃຫ້ຊັດເຈນ ເພື່ອໃຫ້ຜູ້ບໍລິໂພກສາມາດກວດສອບລາຄາໄດ້ ແລະ ໄດ້ຮັບຄວາມເປັນທຳໃນການຊື້-ຂາຍ, ພ້ອມທັງວາງມາດຕະການຢ່າງເຂັ້ມງວດ ໂດຍຫ້າມຊາວຄ້າຂາຍນຳເອົາວັດຖຸລະເບີດ ແລະ ອຸປະກອນຈຸດລະເບີດທຸກປະເພດ ເຊັ່ນ: ບັ້ງໄຟດອກ, ບັ້ງພຸ, ກະໂພດ ແລະ ອື່ນໆ ມາວາງຈຳໜ່າຍພາຍໃນບໍລິເວນຕະຫຼາດໂດຍເດັດຂາດ. ຖ້າກວດພົບຜູ້ຄ້າຂາຍລະເມີດຂໍ້ຫ້າມດັ່ງກ່າວ ຈະຖືກດຳເນີນການຕາມລະບຽບການທີ່ກ່ຽວຂ້ອງຢ່າງເຄັ່ງຄັດ.
ສຳລັບສິນຄ້າທີ່ໄດ້ຂາຍດີໃນໄລຍະບຸນອອກພັນສານີ້ ແມ່ນສິນຄ້າປະເພດເຄື່ອງເຮັດກິດຈະກຳທາງສາສະໜາ ເຊັ່ນ: ທູບ, ທຽນ, ເຄື່ອງສັງຄະທານ, ລວມທັງເຂົ້າປຸ້ນ, ຊີ້ນ, ປາ, ຜັກ ແລະ ອື່ນໆ.
ຕະຫຼາດສົດໂນນຄໍ້ ເປີດໃຫ້ບໍລິການທຸກວັນ ເລີ່ມແຕ່ເວລາ 5:00-18:30 ໂມງ ເພື່ອອຳນວຍຄວາມສະດວກໃຫ້ແກ່ປະຊາຊົນໃນການຈັບຈ່າຍຊື້-ຂາຍສິນຄ້າ ໃນໄລຍະບຸນອອກພັນສາໃຫ້ເປັນໄປຢ່າງສະດວກ ແລະ ຮຽບຮ້ອຍ.
ຂ່າວ-ພາບ: ທະນູທອງ
KPL
