ຂປລ
ໃນວັນທີ 26 ຕຸລາ 2026, ກົງກັບຂຶ້ນ 15 ຄໍ່າ ເດືອນ 11 ລາວ ພສ 2569, ເປັນບຸນອອກພັນສາປະ ວໍຣະນາ, ທ່ານ ສອນໄຊ ສີພັນດອນ ກຳມະ ການກົມການເມືອງສູນກາງພັກ, ປະທານສະພາແຫ່ງຊາດ, ທ່ານ ນາງ ປານີ ຢາທ່ໍຕູ້ ອະດີດກຳມະການກົມການເມືອງສູນກາງພັກ, ອະດີດຮອງປະທານປະເທດ, ອະດີດຜູ້ຊີ້ນຳວຽກງານຮອບດ້ານ ແຂວງຈຳປາສັກ, ພ້ອມດ້ວຍທ່ານ ອາລຸນໄຊ ສູນນະລາດ ກໍາມະການ ສູນກາງພັກ, ເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຈໍາປາສັກ ພ້ອມດ້ວຍການນໍາແຂວງ, ການນໍາພະແນກການກົມກອງອ້ອມຂ້າງແຂວງ, ການນໍານະຄອນປາກເຊ ໄດ້ຮ່ວມໃສ່ບາດນໍາພໍ່ແມ່ປະຊາຊົນຄົນລາວ ຊາວພຸດຢູ່ວັດຫລວງປາກເຊ.
ຂປລ.ໃນພິທີເຂົ້າຮ່ວມເປັນປະທານຝ່າຍສົງມີພະອາຈານ ມະຫາ ສຸວັນ ຈັນທະຣາຊ ປະທານອົງການພຸດທະສາສະໜາສຳພັນລາວ ແຂວງ ຈຳປາສັກ ພ້ອມດ້ວຍພະເຖລານຸເຖລະ ເຂົ້າຮ່ວມ. ການທຳບຸນໃສ່ບາດຄັ້ງນີ້, ເປັນການສືບທອດຮີດຄອງປະເພນີບຸນອອກພັນສາປະວໍຣະນາ ກໍຄືວັດທະນະທຳອັນດີງາມຂອງຊາດທ່ີຄົນລາວຊາວພຸດສືບທອດຈັດຕັ້ງ ປະຕິບັດມາແຕ່ບູຮານນະການໃຫ້ຍືນຍົງຄົງຢູ່ຄຽງຄູ່ກັບຄົນລາວຕະຫລອດໄປ ໂດຍໄດ້ມີການໃສ່ບາດ, ຖວາຍທານ ແລະ ຢາດນ້ໍາເພ່ືອອຸທິດສ່ວນບຸນກຸສົນໃຫ້ແກ່ບັນພະບູລຸດ ຜູ້ທີ່ລ່ວງລັບໄປແລ້ວ ແລະ ເປັນສີລິມຸງຄຸນໃຫ້ແກ່ຕົນເອງ-ຄອບຄົວໃຫ້ຢູ່ເຢັນເປັນສຸກ, ທັງເປັນການເຜີຍແຜ່ວັດທະນະທຳອັນດີງາມຂອງຊາດອີກດ້ວຍ.
ຕອນທ້າຍພິທີ, ພະອາຈານມະຫາ ສຸວັນ ຈັນທະຣາຊ ປະທານອົງການພຸດທະສາສະໜາສຳພັນລາວແຂວງ ກໍໄດ້ເທສະໜາໃຫ້ອອກຕົນຍາດໂຍມໃຫ້ຍຶດໝັ້ນໃນການທຳຄວາມດີ, ມີຄວາມສາມັກຄີເປັນປຶກແຜ່ນ, ພ້ອມກັນຮັກສາສິນ, ຮັກສາກາຍວາຈາ ແລະ ເຮືອນຊານບ້ານຊ່ອງຂອງຕົນໃຫ້ມີຄວາມສະອາດສວຍງາມ ໂດຍສະເພາະແມ່ນໃຫ້ເອົາໃຈໃສ່ຮັກສາອະນາໃນໄລຍະບຸນອອກພັນສາ ແລະ ຊ່ວງເຮືອປະເພນີປະຈໍາ 2026 ຢູ່ນະຄອນປາກເຊ. ນອກນີ້, ກໍໃຫ້ປະພຶດປະຕິບັດຕົນໃຫ້ສອດຄ່ອງຕາມທຳນອງຄອງທຳ ແລະ ລະບຽບກົດໝາຍບ້ານເມືອງ.
ຂ່າວ-ພາບ: ທູນທອງໃຈ
KPL
