ຂປລ. ຊຸດຝຶກອົບຮົມໃຫ້ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V ເພື່ອກຽມຄວາມພ້ອມລົງສູ່ສະໜາມການເລືອກຕັ້ງຕົວຈິງ ກໍຄື ການກະກຽມໂຄສະນາຫາສຽງ ໃນເວລາລົງພົບປະກັບປະຊາຊົນຜູ້ມີສິດເລືອກຕັ້ງໄດ້ປິດ ລົງດ້ວຍຜົນສຳເລັດພາຍຫລັງຈັດເປັນເວລາ 2 ມື້ ແຕ່ວັນທີ 2-3 ກຸມພາ 2026 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ກຳມະການສູນກາງພັກ, ຄະນະປະຈຳສະພາແຫ່ງຊາດ, ປະທານຄະນະສະມາຊິກສະພາແຫ່ງຊາດເພດຍິງ, ໃຫ້ກຽດເຂ້ົາຮ່ວມໂດຍ ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ຜູ້ປະຈຳການເລືອກຕັ້ງລະດັບຊາດມີບັນດາຜູ້ສະໝັກຮັບເລືອກຕັ້ງເປັນສະມາຊິກ ສສຊ ແລະ ສສຂ ທີ່ເປັນເພດຍິງ ຈາກສູນກາງ ແລະ ບັນດາແຂວງພາກເໜືອຄື: ແຂວງ ຜົ້ງສາລີ, ຫລວງນ້ຳທາ, ອຸດົມໄຊ, ບໍ່ແກ້ວ, ຫລວງພະບາງ, ໄຊຍະບູ ລີ, ຫົວພັນ, ວຽງຈັນ ແລະ ແຂວງ ໄຊສົມບູນ ເຂົ້າຮ່ວມ.

     ການຝຶກອົບຮົມຄັ້ງນີ້, ບັນດາຜູ້ເຂົ້າຮ່ວມ ໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງເປັນຕົ້ນ ພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ, ຄວາມຮູ້ພື້ນຖານກ່ຽວກັບມາລະຍາດທາງສັງຄົມ, ທັກສະການເວົ້າ, ພາສາ ກາຍ, ການນຸ່ງຖືໃນການລົງພົບປະກັບປະຊາຊົນຜູ້ມີສິດເລືອກຕັ້ງ ແລະ ວິທີການສ້າງຄວາມໝັ້ນໃຈ ໃນການໃຫ້ສຳພາດຕໍ່ສື່ມວນຊົນ ພ້ອມທັງສາທິດການໃຫ້ສຳພາດຕ່ໍສ່ືມວນຊົນ, ຖາມ-ຕອບຄຳຖາມ, ແລກປ່ຽນບົດຮຽນ, ຄຳຄິດຄຳເຫັນເຊິ່ງກັນ ແລະ ກັນ ຢ່າງສ້າງສັນ ແລະ ອື່ນໆ. 

     ໂອກາດນີ້, ທ່ານ ນາງ ສູນທອນ ໄຊຍະຈັກ ໄດ້ເນັ້ນເຖິງຄວາມໝາຍຄວາມສໍາຄັນຂອງການເລືອກຕັ້ງ ລວມທັງການໂຄສະນາ ຂອງຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ຊຶ່ງເປັນບັນຫາທີ່ມີຄວາມໝາຍສໍາຄັນເລິກເຊິ່ງເປັນທິດ ເຍືອງທາງໃຫ້ແກ່ເພດຍິງນໍາໄປຄົ້ນຄວ້າພິຈາລະນາ, ພັດທະນາຕົນເອງໃຫ້ມີຄຸນຄ່າ, ມີຄຸນນະພາບ ໂດດເດັ່ນຂຶ້ນເພື່ອສ້າງແຮງຈູງໃຈ ແລະ ຄວາມເຊື່ອໝັ້ນ ຂອງມະຫາຊົນ ແລະ ການຈັດຕັ້ງທຸກຂັ້ນ.

     ການຝຶກອົບຮົມ ໃນຄັ້ງນີ້, ແນໃສ່ເຮັດໃຫ້ຜູ້ສະໝັກຮັບເລືອກຕັ້ງເປັນ ສສຊ-ສສຂ ທີ່ເປັນເພດຍິງ ກໍາໄດ້ເນື້ອໃນຈິດໃຈ ແລະ ບົດຮຽນທີ່ຖອດຖອນໄດ້ໄປໝູນໃຊ້ໃຫ້ເກີດປະໂຫຍດ ເພື່ອກຽມຄວາມພ້ອມລົງໂຄສະນາຫາສຽງ ເພື່ອກ້າວເຂົ້າສູ່ສະໜາມການເລືອກຕັ້ງຕົວຈິງ ໃນວັນທີ 22 ກຸມພາ 2026 ທີ່ຈະ ມາເຖິງນີ້.

ຂ່າວ-ພາບ: ທະນູທອງ

KPL