ຂປລ
ທ່ານ ອັນວາ ອີບຣາຮິມ, ນາຍົກລັດຖະມົນຕີ ມາເລເຊຍ ໄດ້ກ່າວຕຳນິ ຢ່າງຮ້າຍແຮງ ຕໍ່ຂໍ້ຕົກລົງ ເພີ່ມພາສີຕໍ່ສິນຄ້າທີ່ນຳເຂົ້າ ຈາກມາເລເຊຍ ຂອງ ສ.ອາເມລິກາ ແລະ ກ່າວວ່າ ນີ້ໄດ້ “ຝືນກັບຫລັກການ ການຄ້າຍຸຕິທຳ” ແລະ ເປັນການກົດໜີບ ຕໍ່ປະເທດ ພວມພັດທະນາ ທີ່ບໍ່ສົມເຫດສົມຜົນ.
ຂປລ.ວິທະຍຸສາກົນແຫ່ງ ສປ ຈີນ, ໃນກອງປະຊຸມ ວິສາມັນ ຂອງສະພາແຫ່ງຊາດ ທີ່ຈັດຂຶ້ນ ໃນວັນທີ 5 ພຶດສະພານີ້, ທ່ານ ອັນວາ ອີບຣາຮິມ, ນາຍົກລັດຖະມົນຕີ ມາເລເຊຍ ໄດ້ກ່າວຕຳນິ ຢ່າງຮ້າຍແຮງ ຕໍ່ຂໍ້ຕົກລົງ ເພີ່ມພາສີ ຕໍ່ສິນຄ້າ ທີ່ນຳເຂົ້າ ຈາກມາເລເຊຍ ຂອງ ສ.ອາເມລິກາ ແລະ ກ່າວວ່າ ນີ້ໄດ້ “ຝືນກັບຫລັກການ ການຄ້າຍຸຕິທຳ” ແລະ ເປັນການກົດໜີບ ຕໍ່ປະເທດ ພວມພັດທະນາ ທີ່ບໍ່ສົມເຫດສົມຜົນ. ທ່ານ ອັນວາ ອີບຣາຮິມ ໄດ້ຕອບໂຕຖ້ອຍຄຳຂອງ ສ.ອາເມລິກາທີ່ວ່າ ມາເລເຊຍ ໄດ້ເກັບພາສີ ສະເລ່ຍ ຕໍ່ສິນຄ້າ ອາເມລິກາ ເປັນ 47% ແລະ ຊີ້ອອກວ່າ ອັດຕາພາສີຕົວຈິງ ມີພຽງແຕ່ 5,6%.ຂະນະທີ່ ລັດຖະບານ ມາເລເຊຍ ຈະປົກປ້ອງ ຜົນປະໂຫຍດ ຂອງຕົນ ຢ່າງເດັດດ່ຽວ, ຊຸກຍູ້ ການຮ່ວມມື ດ້ານການຄ້າກັບ ອາຊຽນ, ສປ ຈີນ ແລະ ເພື່ອນມິດສາກົນ, ປ່ອຍເງິນກູ້ໃຫ້ແກ່ ວິສາຫະກິດຂະໜາດກາງ-ນ້ອຍ ຢູ່ມາເລເຊຍ, ເປີດກວ້າງ ຊ່ອງທາງ ສົ່ງອອກ ແລະ ສະແຫວງຫາ ການສົນທະນາ ໂດຍກົງກັບ ສ.ອາເມລິກາ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
