ຂປລ. ໃນວັນທີ 4 ເມສາ 2025 ຜ່ານມາ, ຢູ່ນະຄອນຫລວງຮ່າໂນ້ຍ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ຫວຽດນາມ ໄດ້ຕ້ອນຮັບຄະນະຜູ້ແທນຂັ້ນສູງພັກ, ລັດຖະບານແຫ່ງ ສສ ຫວຽດນາມເຂົ້າວາງພວງມາລາ ແລະ ເຊັນປຶ້ມໄວ້ອາໄລຕໍ່ການຈາກໄປຂອງ ສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ ຊຶ່ງນຳໂດຍ ສະຫາຍ ເລືອງ ເກື່ອງກຳມະການກົມການເມືອງສູນກາງພັກ, ປະທານປະເທດແຫ່ງ ສສ ຫວຽດນາມ ໂດຍການຕ້ອນຮັບຂອງ ສະຫາຍ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມພ້ອມຄະນະ.

ໃນບົດຂຽນໄວ້ອາໄລ, ສະຫາຍຫົວໜ້າຄະນະຜູ້ແທນຂັ້ນສູງພັກ, ລັດຖະບານຫວຽດນາມ ໄດ້ສະແດງຄວາມຮູ້ສຶກວ່າ: ສຸດອາໄລອາວອນ ສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກປະຊາຊົນປະຕິວັດລາວ, ອະດີດປະທານປະເທດ ແຫ່ງ ສປປ ລາວ ຊຶ່ງເປັນຜູ້ນຳທີ່ດີເລີດ, ລູກຫລານອັນປະເສີດຂອງປະຊາຊົນລາວບັນດາເຜົ່າ, ນັກຮົບປະຕິວັດທີ່ກ້າແກ່ນ, ເສຍສະລະຕະຫລອດຊີວິດ ເພື່ອຄວາມອິດສະຫລະພາບ, ປະຊາທິປະໄຕ, ຄວາມຜາສຸກຂອງປະຊາຊົນ ແລະ ການພັດທະນາຂອງປະເທດລາວ. ສະຫາຍ ພົນເອກ ຄຳໄຕ ສີພັນດອນ ຈາກໄປ ແມ່ນການສູນເສຍ ອັນໃຫຍ່ຫລວງຕໍ່ພັກ, ລັດຖະບານ, ປະຊາຊົນລາວບັນດາເຜົ່າ ແລະ ຄອບຄົວ. ພັກ, ລັດຖະບານ ແລະ ປະຊາຊົນຫວຽດນາມ ສູນເສຍເພື່ອນສະຫາຍຜູ້ຍິ່ງໃຫຍ່, ສະຫາຍເປັນອ້າຍນ້ອງທີ່ສະໜິດສະໜົມທີ່ສຸດ, ຜູ້ມີຜົນງານອັນໃຫຍ່ຫລວງ ແລະ ສຳຄັນປະກອບສ່ວນເຂົ້າໃນການກໍ່ສ້າງ, ປັບປຸງ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວ. ຕໍ່ການສູນເສຍອັນໃຫຍ່ຫລວງນີ້, ຕາງໜ້າພັກ, ລັດຖະບານ, ປະຊາຊົນຫວຽດນາມ, ພວກຂ້າພະເຈົ້າຂໍສົ່ງ ຄວາມເສົ້າສະຫລົດໃຈຢ່າງສຸດຊຶ້ງ ມາຍັງພັກ, ລັດຖະບານ, ປະຊາຊົນລາວບັນດາເຜົ່າ ແລະ ຄອບຄົວ ສະຫາຍ ພົນເອກ ຄຳໄຕ ສີພັນດອນ.

ໃນວັນດຽວກັນ, ຄະນະການນຳ ບັນດາອົງການ ພັກ-ລັດ, ອົງການຈັດຕັ້ງມະຫາຊົນ ນະຄອນຫລວງຮ່າໂນ້ຍ, ບັນດາແຂວງ ກໍໄດ້ເຂົ້າເຊັນປຶ້ມໄວ້ອາໄລ, ໃນນັ້ນມີ: ສະຫາຍ ເຈິ່ນ ເກິມ ຕູ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການ ສູນກາງພັກກອມມູນິດ ຫວຽດນາມ, ສະຫາຍ ຫງວຽນ ດັກ ດິງ ຮອງປະທານສະພາແຫ່ງຊາດ, ສະຫາຍ ບຸຍ ທິ ມິງ ຮວາຍ ເລຂາຄະນະພັກນະຄອນຫລວງຮ່າໂນ້ຍ, ສະຫາຍ ນາງ ຫວູ ຫວຽດ ຈາງ ຜູ້ອຳນວຍການໃຫຍ່ສຳນັກຂ່າວສານຫວຽດນາມ, ສະຫາຍ ບຸ່ຍກວ່າງຮຸຍ ເລຂາຊາວໜຸ່ມກອມມູນິດຫວຽດນາມ, ສະຫາຍ ຫງວຽນ ທິ ຕວຽນ ປະທານສູນກາງສະຫະພັນແມ່ຍິງຫວຽດນາມ. ພ້ອມນີ້, ຍັງມີສະມາຄົມມິດຕະພາບຫວຽດນາມ-ລາວ, ສະຫະພັນອົງການຈັດຕັ້ງມິດຕະພາບຫວຽດນາມ, ສະຫະພັນອົງການຈັດຕັ້ງມິດຕະ ພາບນະຄອນຫລວງຮ່າໂນ້ຍ, ບັນດາການນຳກະຊວງ, ການນຳແຂວງ, ສະຖາບັນການສຶກສາ, ຄະນະປະສານງານອະດີດທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ, ບັນດາສະຖານທູດຕ່າງປະເທດ ປະຈຳ ສສ ຫວຽດນາມ 25 ປະເທດ ກໍໄດ້ເຂົ້າວາງພວງມາລາ ແລະ ເຊັນປຶ້ມໄວ້ອາໄລ ສະຫາຍ ພົນເອກ ຄຳໄຕ ສີພັນດອນ ຢູ່ສະຖານເອກ ອັກຄະລັດຖະທູດລາວ ປະຈຳ ສສ ຫວຽດນາມ ຕື່ມອີກ.

ສະຖານເອກອັກຄະລັດຖະທູດລາວ ປະຈຳ ສສ ຫວຽດນາມ ຍັງຈະໄດ້ສືບຕໍ່ຮັບການມາໄວ້ອາໄລ ສະຫາຍ ພົນເອກ ຄຳໄຕ ສີພັນດອນ ຈົນຮອດວັນທີ 6 ເມສາ 2025.

ຂ່າວ-ພາບ: ສະຖານທູດລາວທີ່ຮ່າໂນ້ຍ

KPL