ຂປລ. ​ເມື່ອ​ບໍ່​ດົນ​ມາ​ນີ້, ຢູ່ສູນຝຶກອົບຮົມເຕັກນິກກະສິກໍາ ແລະ ພັດທະນາຊົນນະບົດລາວ-ເກົາ ຫລີ ​ໄດ້​ສໍາ​ເລັດ​ການຝຶກອົບຮົມ ການສ້າງຄວາມເຂັ້ມແຂງ ໃຫ້ແກ່ກຸ່ມປູກມັນຕົ້ນ ພາຍໃຕ້ໂຄງການສ້າງແຜນກິດຈະກໍາ ແລະ ພັດທະນາຊົນນະບົດ ຂອງແຂວງພາກເໜືອ ແລະ ພາກກາງ ຂອງ ສປປ ລາວ ໂດຍໄດ້ຮັບການສະໜັບສະໜູນ ຈາກລັດຖະບານແຫ່ງ ສ ເກົາຫລີ ໂດຍຜ່ານອົງການ KOICA ໂດຍມີຜູ້ເຂົ້າຮ່ວມຝຶກອົບຮົມທັງໝົດ 25 ຄົນ, ຍິງ 16 ຄົນ ທີ່ມາຈາກ ບ້ານນໍ້າແຜນ ເມືອງແມດ ແຂວງວຽງຈັນ ຊຶ່ງນອນໃນພື້ນທີ່ໂຄງການ ສ້າງແຜນກິດຈະກໍາ ແລະ ພັດທະນາຊົນນະບົດ ຂອງແຂວງພາກເໜືອ ແລະ ພາກກາງ ຂອງ ສປປ ລາວ.

ຫລັກສູດຝຶກອົບຮົມຄັ້ງນີ້, ມີເປົ້າໝາຍເພື່ອສ້າງຄວາມເຂັ້ມແຂງ ໃຫ້ແກ່ກະສິກອນກຸ່ມຜູ້ປູກມັນຕົ້ນ ໂດຍສະເພາະ ການໃຫ້ຄວາມຮູ້ໃນດ້ານກອບແນວຄວາມຄິດ ແລະ ບັນດາເຕັກນິກການນໍາໃຊ້ ເຄື່ອງກົນຈັກເຂົ້າໃນການປູກມັນຕົ້ນ ໂດຍຜູ້ເຂົ້າຮ່ວມໄດ້ຮຽນຮູ້ຫລາຍເນື້ອໃນເຊັ່ນ: ການເຊື່ອມໂຍງແຊມາອຶນດົງ ກັບນະໂຍບາຍສາມສ້າງ, ການສ້າງຕັ້ງກຸ່ມ ແລະ ສະຫະກອນ, ການຄວບຄຸມແມງໄມ້-ສັດຕູພືດ ແລະ ພະຍາດຂອງມັນຕົ້ນ, ການວາງແຜນພັດທະນາແບບມີສ່ວນຮ່ວມ, ການຕະຫລາດ, ເຕັກນິກການນໍາໃຊ້ເຄື່ອງປະສົມ ແລະ ການນໍາໃຊ້ຝຸ່ນ, ເຕັກນິກການນໍາໃຊ້ເຄື່ອງຈັກປັ່ນ-ເຄື່ອງຈັກຊອຍ ແລະ ບັນດາຂໍ້ຄວນລະວັງໃນການນໍາໃຊ້. ນອກນີ້, ສໍາມະນາກອນຍັງໄດ້ຮ່ວມກັນ ຈັດກິດຈະກໍາແບ່ງກຸ່ມເພື່ອຄົ້ນຄວ້າ ແລະ ແລກປ່ຽນຄວາມຄິດໃນ 3 ຫົວຂໍ້ຄື: ການວາງແຜນກິດຈະກໍາໃນການກະກຽມດິນ, ການຄວບຄຸມຫຍ້າ ແລະ ພະຍາດແມງໄມ້ໃນສວນມັນຕົ້ນ, ການສ້າງແຜນການຄຸ້ມຄອງ ແລະ ການຈັດການຫລັງການເກັບກ່ຽວ ແລະ ການວາງແຜນໃນຂັ້ນຕອນ ການສ້າງຕັ້ງກຸ່ມດໍາເນີນທຸລະກິດ ຂອງກະສິກອນຜະລິດມັນຕົ້ນ.

​ໂອກາດ​ນີ້, ທ່ານ ນາງ ແວວມະນີ ເທບພະວົງ ຮອງຫົວໜ້າກົມພັດທະນາຊົນນະບົດ ແລະ ທ່ານ ວົງສະຫວັນ ວົງໄກສອນ ຫົວໜ້າສູນຝຶກອົບຮົມເຕັກນິກກະສິກໍາ ແລະ ພັດທະນາຊົນນະບົດລາວ-ເກົາຫລີ ​ໄດ້ຮຽກຮ້ອງມາ​ຍັງສໍາມະນາກອນ ຈົ່ງນໍາເອົາຄວາມຮູ້ທີ່ໄດ້ຮັບ ຈາກການຝຶກອົບຮົມໃນຄັ້ງນີ້ ໄປສືບຕໍ່ຈັດຕັ້ງປະຕິບັດ ໃນກິດຈະກໍາການຜະລິດ ໃນທ້ອງຖິ່ນຕົນ ເພື່ອໃຫ້ກາຍເປັນກຸ່ມບ້ານຕົວແບບ ສ້າງໃຫ້ກຸ່ມມີຄວາມເຂັ້ມແຂງ ແລະ ສ້າງລາຍຮັບຈາກ ການປູກມັນຕົ້ນ ໃຫ້ນັບມື້ນັບຫລາຍຂຶ້ນເປັນກ້າວໆ.

ຂໍ້​ມູນ-ພາບ: ຂ່າວສານ​ກະສິກໍາ-ປ່າ​ໄມ້

KPL