ຂປລ
ສະໜາມບິນສາກົນ ປັກກິ່ງຕ້າຊິງ ໃນນະຄອນຫລວງ ປັກກິ່ງ ປະເທດ ສປຈີນ ໄດ້ເປີດຈຸດບໍລິການ ຄົບວົງຈອນ ໃນພື້ນທີ່ ຜູ້ໂດຍສານ ລະຫວ່າງ ປະເທດ ຂາເຂົ້າ ໂດຍໃຫ້ການບໍລິການ ທີ່ຈຳເປັນ ຫລາຍກວ່າ 20 ລາຍການ
ຂປລ.ສຳນັກຂ່າວ ຊິນຮວາ ລາຍງານ ຈາກ ນະຄອນຫລວງ ປັກກິ່ງ ສປຈີນ ເມື່ອບໍ່ດົນມານີ້, ສະໜາມບິນສາກົນ ປັກກິ່ງຕ້າຊິງ ໃນນະຄອນຫລວງ ປັກກິ່ງ ປະເທດ ສປຈີນ ໄດ້ເປີດຈຸດບໍລິການ ຄົບວົງຈອນ ໃນພື້ນທີ່ ຜູ້ໂດຍສານ ລະຫວ່າງ ປະເທດ ຂາເຂົ້າ ໂດຍໃຫ້ການບໍລິການ ທີ່ຈຳເປັນ ຫລາຍກວ່າ 20 ລາຍການ ເຊັ່ນ: ການເງິນ, ການສື່ສານ, ການຂົນສົ່ງ, ວັດທະນະທຳ ແລະ ການທ່ອງທ່ຽວ ເພື່ອໃຫ້ຊາວ ຕ່າງປະເທດ ເດີນທາງມາພັກຜ່ອນ , ຮໍ່າຮຽນ ຫລື ເຮັດທຸລະກິດ ມີຄວາມສະດວກ ຫລາຍຂຶ້ນ.
ໂດຍຊາວຕ່າງປະເທດ ສາມາດ ຖອນເງິນສົດ ດ້ວຍບັດທະນາຄານ, ການແລກປ່ຽນເງິນຕາ ຕ່າງປະເທດ ແລະ ຂໍຄວາມຊ່ວຍເຫລືອ ໃນການ ດາວໂຫລດແອບພີເຄຊັນ ໃນການຊໍາລະເງິນ ຜ່ານໂທລະສັບ ມືຖື ຂອງ ສປຈີນ ລວມເຖິງ ການຊື້ຊິມກາດ ເຂົ້າເຖິງ ອິນເຕີເນັດ ບໍ່ມີສາຍ ຫລື ໄວຟາຍ, ປັບແຜນ ການເດີນທາງ ແລະ ການຈອງປີ້ເຂົ້າຊົມສະຖານທີ່ ທ່ອງທ່ຽວ ບໍລິເວນ ຈຸດບໍລິການ ຄົບວົງຈອນແຫ່ງນີ້.
ນອກນີ້ ນັກເດີນ ທາງສາມາດຊື້ ປັກກິ່ງພາສ (Beijing Pass) ບັດອະເນກປະສົງ ສໍາລັບຊໍາລະຄ່າເດີນທາງ , ຄ່າເຂົ້າຊົມສະຖານທີ່ ທ່ອງທ່ຽວ ແລະ ໄປຊື້ເຄື່ອງ, ລວມເຖິງ ຂໍຄວາມ ຊ່ວຍເຫລືອ ແລະ ຄຳແນະນຳ ກ່ຽວກັບ ການຊື້ປີ້ ໂດຍສານ ລົດໄຟໃຕ້ດິນ ຫລື ລົດຮັບ-ສົ່ງພາຍໃນ ສະໜາມບິນ ແລະ ທຸລະກິດບໍ່ເສຍຄ່າ ທີ່ຈຸດບໍລິການ ຄົບວົງຈອນອື່ນໆ./
KPL
