ຂປລ
ທະນາຄານກາງ ກຳປູເຈຍ ອະນຸມັດໃຫ້ ທະນາຄານການຄ້າ ແລະ ສະຖາບັນບໍລິການ ຊຳລະເງິນ ດຳເນີນທຸລະກຳ ທີ່ກ່ຽວຂ້ອງ ກັບຊັບສິນ ດິຈິຕອນ ເພື່ອບໍລິຫານຈັດການ ທຸລະກຳ ແລະ ກິດຈະກຳ ທາງທຸລະກິດ ທີ່ກ່ຽວຂ້ອງກັບ ຊັບສິນປະເພດດັ່ງກ່າວ.
ຂປລ.ສຳນັກຂ່າວ ຊິນຮວາຂອງ ສປຈີນ ລາຍງານວ່າ: ທະນາຄານກາງ ກຳປູເຈຍ ອະນຸມັດໃຫ້ ທະນາຄານການຄ້າ ແລະ ສະຖາບັນບໍລິການ ຊຳລະເງິນ ດຳເນີນທຸລະກຳ ທີ່ກ່ຽວຂ້ອງ ກັບຊັບສິນ ດິຈິຕອນ ເພື່ອບໍລິຫານຈັດການ ທຸລະກຳ ແລະ ກິດຈະກຳ ທາງທຸລະກິດ ທີ່ກ່ຽວຂ້ອງກັບ ຊັບສິນປະເພດດັ່ງກ່າວ.
ໂດຍທ່ານ ເຈຍ ສະເຣຍ ຜູ້ວ່າການທະນາຄານກາງ ກຳປູເຈຍ ລົງນາມໃນປະກາດດັ່ງກ່າວ ທີ່ມີສາລະສຳຄັນວ່າ ຜູ້ໃຫ້ບໍລິການຊັບສິນ ດີຈິຕອນ ຕ້ອງໄດ້ຮັບ ການອະນຸມັດຈາກ ທະນາຄານກາງ ການຄ້າກ່ອນ ໂດຍທະນາຄານຈະແຈ້ງຜົນການ ອະນຸມັດເປັນລາຍລັກ ອັກສອນພາຍໃນ 60 ວັນ ນັບຈາກວັນທີ່ ໄດ້ຮັບສະໝັກ ພ້ອມເອກະສານປະກອບທີ່ຄົບຖ້ວນ.
ການປະກາດດັ່ງກ່າວ ລະບຸວ່າ: ຊັບສິນດິຈິຕອນ ໝາຍເຖິງໜ່ວຍເອເລັກໂຕຣນິກ ທີ່ສະແດງມູນຄ່າ ຊຶ່ງຂຶ້ນຢູ່ກັບ ການເຂົ້າລະຫັດຂໍ້ມູນ ແລະ ການຈັດເກັບຂໍ້ມູນ ແບບກະຈາຍສູນ ຫລື ເຕັກໂນໂລຊີ ທີ່ຄ້າຍຄືກັນ, ໂດຍສາມາດ ຊື້ຂາຍ ຫລື ໂອນ ໃຊ້ໃນການຊໍາລະເງິນ ແລະ ການລົງທຶນ ຫລື ເພື່ອເຂົ້າເຖິງ ສິນຄ້າຫລື ບໍລິການ ທາງດິຈິຕອນໄດ້.
ຂະນະທີ່ ຊັບສິນດິຈິຕອນ ປະກອບດ້ວຍ ຊັບສິນດັ່ງເດີມ ໃນຮູບແບບ ໂທເຄນ, ຊັບສິນດິຈິຕອນທີ່ບໍ່ມີ ຊັບສິນອື່ນໆ ຊຸກຍູ້ຫລັງ, ສະກຸນເງິນ ດິຈິຕອນ ມູນຄ່າຄົງທີ່, ຢູທີລິຕິ, ໂທເຄນ ຊີຄີວຣີຕີສ ໂທເຄນ. ຢ່າງໃດກໍ່ຕາມ ບໍ່ນັບລວມ ໜ່ວຍເອເລັກໂຕຣນິກ ສະແດງມູນຄ່າ ໃນຮູບແບບ ສະກຸນເງິນເຟຍ ຊຶ່ງເປັນສະກຸນເງິນ ດິຈິຕອນຂອງທະນາຄານກາງ.
KPL
