*ຄໍລຳຊີວິດ ແລະ ກົດໝາຍ ມື້ນີ້ຂໍນຳສະເໜີກົດໝາຍວ່າດ້ວຍປະກັນໄພສະບັບປັບປຸງປີ 2019 ໂດຍກົດໝາຍສະບັບນີ້ໄດ້ກໍານົດຫລັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ ແລະ ຕິດຕາມກວດກາວຽກງານປະກັນໄພ ເພື່ອໃຫ້ດໍາເນີນຖືກຕ້ອງ, ມີປະສິດທິພາບ, ປະສິດທິຜົນ, ໝັ້ນຄົງ ແລະ ປອດໄພ, ຮັບປະກັນໃຫ້ວຽກງານດັ່ງກ່າວມີຄວາມເຕີບໃຫຍ່ເຂັ້ມແຂງ, ທັນສະໄໝ, ວ່ອງໄວ, ໂປ່ງໃສ ແລະ ຍຸຕິທໍາ ແນໃສ່ປົກປ້ອງສິດ ແລະ ຜົນປະໂຫຍດຂອງຜູ້ປະກັນໄພ, ຜູ້ຊື້ປະກັນໄພ, ຫລຸດຜ່ອນຄວາມສ່ຽງຕໍ່ລະບົບການເງິນແຫ່ງຊາດ, ຊຸກຍູ້ໃຫ້ສັງຄົມ ແລະ ປະຊາຊົນ ເຂົ້າໃນການປະກັນໄພ, ສາມາດເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.

   ໃນກົດໝາຍໄດ້ໃຫ້ນິຍາມກ່ຽວກັບການປະກັນໄພ ແມ່ນການບໍລິຫານຄວາມສ່ຽງທີ່ອາດຈະເກີດຂຶ້ນກັບຜູ້ຊື້ປະກັນໄພ ຫລື ຜູ້ໄດ້ຮັບການປະກັນໄພທີ່ໄດ້ຈ່າຍຄ່ປະກັນໄພ ຊ່ຶງຜູ້ປະກັນໄພຕ້ອງຈ່າຍສິນປະກັນໄພຕາມທີ່ໄດ້ຕົກລົງກັນໄວ້ໃນສັນຍາປະກັນໄພ. ໃນມາດຕາ 3 ຂອງກົດໝາຍຍັງໄດ້ອະທິບາຍຄໍາສັບຄໍາສັບທີ່ນໍາໃຊ້ໃນກົດໝາຍ ສະບັບນີ້ ດັ່ງນີ້: ຜູ້ປະກັນໄພໝາຍເຖິງ ບໍລິສັດປະກັນໄພ ແລະ ບໍລິສັດປະກັນໄພຕໍ່ຊຶ່ງແມ່ນສະຖາ ບັນການເງິນຮູບແບບໜຶ່ງທີ່ຖືກສ້າງຕັ້ງຂຶ້ນ ແລະ ດໍາເນີນທຸລະກິດ ໂດຍສອດຄ່ອງກັບກົດໝາຍສະບັບນີ້ ແລະ ກົດໝາຍອື່ນທີ່ກ່ຽວຂ້ອງ ຂອງ ສປປ ລາວ;  ຜູ້ຊື້ປະກັນໄພໝາຍເຖິງບຸກຄົນ, ນິຕິບຸກຄົນ ຫລື ການຈັດຕັ້ງທີ່ເຮັດສັນຍາປະກັນໄພກັບຜູ້ປະກັນໄພ ແລະ ຈ່າຍຄ່າປະກັນໄພຄົບຖ້ວນຕາມສັນຍາ, ຜູ້ຊື້ປະກັນໄພອາດແມ່ນຜູ້ໄດ້ຮັບການປະກັນໄພ ຫລື ຜູ້ໄດ້ຮັບຜົນປະໂຫຍດ; ຜູ້ໄດ້ຮັບການປະກັນໄພໝາຍເຖິງບຸກຄົນ, ນິຕິບຸກຄົນ ຫລື ການຈັດຕັ້ງທີ່ມີຄວາມສ່ຽງຕໍ່ຊັບສິນ, ຄວາມຮັບຜິດຊອບທາງແພ່ງ ຫລື ຊີວິດທີ່ມາເຮັດປະກັນໄພ ໂດຍຖືກຕ້ອງ ແລະ ສອດຄ່ອງກັບສັນຍາປະກັໄພ, ຜູ້ໄດ້ຮັບການປະກັນໄພອາດແມ່ນຜູ້ໄດ້ຮັບຜົນປະໂຫຍດ; ຜູ້ໄດ້ຮັບຜົນປະໂຫຍດໝາຍເຖິງບຸກຄົນ, ນິຕິບຸກຄົນ ຫລື ການຈັດຕັ້ງທີ່ຖືກເລືອກໂດຍຜູ້ຊື້ປະກັນໄພເພື່ອຮັບເອົາສິນປະກັນໄພຕາມທ່ີໄດ້ກໍານົດໄວ້ໃນສັນຍາປະກັນໄພ; ສັນຍາປະກັນໄພສ່ວນບຸກຄົນໝາຍເຖິງສັນຍາປະກັນຄວາມສ່ຽງຕໍ່ຊີວິດ, ສຸຂະພາບ ແລະ ອຸບັດເຫດດ້ານຮ່າງກາຍ; ສັນຍາປະກັນໄພຊັບສິນ ໝາຍເຖິງສັນຍາປະກັນໄພຄວາມສ່ຽງຕໍ່ຊັບສິນທີ່ນໍາໄປປະກັນໄພ; ສັນຍາປະກັນໄພຄວາມຮັບຜິດຊອບທາງແພ່ງ ໝາຍເຖິງສັນຍາປະກັນໄພ ທີ່ພົວພັນເຖິງຄວາມຮັບຜິດຊອບຂອງຜູ້ປະກັນໄພຕໍ່ບຸກຄົນທີສາມທ່ີໄດ້ຮັບຄວາມເສຍຫາຍຈາກ ຜູ້ຊື້ປະກັນໄພໃນໄລຍະສັນຍາປະກັນໄພ; ຄ່າປະກັນໄພໝາຍເຖິງຈໍານວນເງິນທີ່ຜູ້ຊ້ືປະກັນໄພ ຕ້ອງຈ່າຍໃຫ້ບໍລິສັດປະກັນໄພ ຕາມທ່ີໄດ້ກໍານົດໄວ້ໃນສັນຍາປະກັນໄພ;  ສິນປະກັນໄພໝາຍເຖິງ ມູນຄ່າທົດແທນຄວາມເສຍຫາຍຊຶ່ງຜູ້ປະກັນ ໄພຕ້ອງຊໍາລະໃຫ້ແກ່ຜູ້ຊື້ປະກັນໄພ ຫລື ຜູ້ໄດ້ຮັບຜົນປະໂຫຍດຕາມທີ່ໄດ້ກໍານົດໄວ້ໃນສັນຍາປະກັນໄພ;  ນັກຄະນິດສາດປະກັນໄພໝາຍເຖິງຜູ້ຄິດໄລ່ທີ່ມີຄຸນວຸດທິດ້ານຄະນິດສາດປະກັນໄພຊຶ່ງມີຄວາມຊ່ຽວຊານ ໃນການຄິດໄລ່ຄ່າປະກັນໄພ, ສິນປະກັນໄພ, ປະເມີນຄວາມສ່ຽງ ແລະ ຜົນກະທົບທາງການເງິນ ຈາກຄວາມບໍ່ແນ່ນອນໃນປັດຈຸບັນ ແລະ ເຫດການທີ່ອາດຈະເກີດຂຶ້ນໃນອະນາຄົດຂອງຜູ້ປະກັນໄພ; ບໍລິສັດໃນກຸ່ມໝາຍເຖິງ ບໍລິສັດ ທີ່ຜູ້ປະກັນໄພຖືຮຸ້ນທີ່ສາມາດລົງຄະແນນສຽງໄດ້ ແຕ່ຫ້າສິບສ່ວນຮ້ອຍຂຶ້ນໄປ; ການຄວບທຸລະກິດໝາຍເຖິງ ການຕົກລົງຂອງສອງ ຫລື ຫລາຍວິສາຫະກິດໂດຍໂອນເອົາຊັບສິນ, ສິດ, ພັນທະ ແລະ ຜົນປະໂຫຍດ ທີ່ຖືກຕ້ອງຕາມກົດໝາຍທັງໝົດຄວບເຂົ້າກັນເພື່ອກາຍເປັນ ວິສາຫະກິດເດີມໃດໜຶ່ງ ຫລື ເປັນວິສາຫະກິດໃໝ່; ການປະກັນໄພຈຸນລະພາກ ໝາຍເຖິງການບໍລິ ການດ້ານການປະກັນໄພຊຶ່ງຕອບສະໜອງຄວາມຕ້ອງການໃນການປະກັນຄວາມສ່ຽງໃຫ້ແກ່ປະຊາຊົນທີ່ມີລາຍຮັບຕໍ່າ, ຜູ້ດ້ອຍໂອກາດ, ຢູ່ຫ່າງໄກສອກຫລີກ.

KPL