*ບໍ່ວ່າຈະອາຊີບໃດລ້ວນແຕ່ນໍາທາງຊີວິດຂອງທ່ານໄປເຖິງເປົ້າໝາຍແນ່ນອນ ຖ້າຜູ້ປະກອບອາຊີບນັ້ນບໍ່ຂີ້ຄ້ານບໍ່ມັກງ່າຍດັ່ງທີ່ຮູ້ນໍາ ກັນບາງຄັ້ງຄວາມຂີ້ຄານມັກຈະຄວບງຳຈົນເງີຍຫົວບໍ່ຂຶ້ນກໍເປັນເລື່ອງຍາກທີ່ຈະມືນຕາອ້າປາກຮັບເອົາກິ່ນອາຍຂອງຄວາມສຸກຄວາມມັ່ງມີໄດ້ ເໝືອນດັ່ງນາງ ພິດສະໄໝ  ສີເມືອງ, ຕົວແບບການປູກຝັງ-ລ້ຽງສັດ ປະຊາຊົນ ບ້ານນາສ້ານ, ເມືອງຫົງສາ, ແຂວງໄຊຍະບູລີ ທີ່ໃຊ້ເວລາຫວ່າງນອກໂມງທາງລັດຖະການເຮັດອາຊີບເສີມ ເພື່ອສ້າງເສດຖະກິດຄອບຄົວດ້ວຍການປູກຝັງສາມາດສ້າງລາຍຮັບ 84 ລ້ານກີບຕໍ່ປີ.

      ນາງ ພິດສະໄໝ ສີເມືອງ,  ຕົວແບບການປູກຝັງ-ລ້ຽງສັດໄດໃຫ້ຮູ້ວ່າ: ຕົນເອງເປັນພະນັກງານຄູສອນຢູ່ໂຮງຮຽນມັດທະຍົມສົມບູນບ້ານຫານ, ຄອບຄົວມີສະມາຊິທັງໝົດ 5 ຄົນ, ຍິງ 2 ຄົນ, ມີແຮງ ງານຕົ້ນຕໍ 2 ຄົນ, ຍິງ 1 ຄົນ  ໄດ້ໃຊ້ເວລາຫວ່າງນອກໂມງທາງລັດຖະການເຮັດອາຊີບເສີມເພື່ອສ້າງເສດຖະກິດຄອບຄົວ ດ້ວຍການປູກຝັງ, ລ້ຽງສັດ ຍ້ອນພື້ນຖານຄອບຄົວພໍ່ແມ່ເຮັດກະສິກໍາມາກ່ອນ ແລະ ມີທ່າແຮງທີ່ອຳນວຍຄວາມສະດວກເປັນຕົ້ນແມ່ນມີທີ່ດິນຜະລິດທີ່ເໝາະສົມ, ມີໜອງປາທີ່ສາມາດເກັບນໍ້າໄວ້ໃຊ້ໄດ້ຕະລອດປີບວກກັບຄວາມມັກຮັກໃນການປູກຝັງ- ລ້ຽງສັດມາແຕ່ນ້ອຍ ຈຶ່ງໄດ້ຕັດສິນໃຈລ້ຽງໝູລາດ ແລະ ປູກພືດລົ້ມລຸກໃນລະດູແລ້ງມາໄດ້ 4 ປີ ເຊິ່ງເລີ່ມປູກພືດແຕ່ເດືອນທັນວາ ຫາ ເດືອນພຶດສະພາ ຂອງທຸກໆປີຫລັງ ຈາກເກັບກ່ຽວເຂົ້ານາປີເຊັ່ນ: ປູກຜັກທຽມ, ຜັກບົ່ວ, ໝາກແຕງ, ໝາກເຜັດ, ຖົ່ວຝັກຍາວ, ໝາກກະດອມ, ໝາກອຶ, ມັນດ້າງ, ໝາກນໍ້າເຕົ້າ, ກະລໍ່າປີ,  ຫອມປ້ອມ, ຫອມຊີເພື່ຶອຂາຍສົ່ງເຂົ້້າຕະຫລາດ ແລະ ນັ່ງຂາຍເອງໃນເວລາຫວ່າງໃຊ້ຕົ້ນທຶນປະມານ 12 ລ້ານກີບ ໃນ 1 ລະດູແລ້ງປູກຜັກໄດ້ 2 ຮອບ ມີຜົນກໍາໄລສະເລ່ຍປະມານ 40 ລ້ານກີບ.

    ນອກຈາກປູກພືດລະດູແລ້ງຍັງໄດ້ປູກໝາກເຜັດຂາຍໃນລະດູຝົນສາມາດສ້າງລາຍໄດ້ຈາກການ ຂາຍໝາກເຜັດປະມານ 14 ລ້ານກີບ ແລະ ໄດ້ເຮັດສວນມັນຕົ້ນ ແລະ ສວນໝາກເດືອຍຕິດພັນກັບການປູກພືດນອກຈາກນີ້ຍັງໄດ້ລ້ຽງໝູລາດ ເຊິ່ງໄດ້ໃຊ້ທຶນເລີ່ມຕົ້ນແມ່ນ 3 ລ້ານກີບ ຊື້ໝູພໍ່ພັນ, ແມ່ພັນມາປະສົມພັນເອງໃນ 1 ປີ ສາມາດເພາະລູກໝູນ້ອຍໄດ້  50 ໂຕ, ໃນ 1 ປີສາມາດຂາຍໝູນ້ອຍ-ໃຫຍ່ອອກປະມານ 50  ໂຕ ໄດ້ກໍາໄລປະມານ 30 ລ້ານກີບສະຫລຸບລວມແລ້ວໃນ 1 ປີສາມາດສ້າງລາຍຮັບເພີ່ມຈໍາປະມານ 84 ລ້ານກີບ.

    ນາງ ພິດສະໄໝ ເວົ້າຕື່ມວ່າ:  ພາຍຫລັງທີ່ເຮັດອາຊີບນີ້ມາເຮັດໃຫ້ຊີວິດການເປັນຢູ່ດີຂຶ້ນກວ່າເກົ່າ ກໍຍ້ອນພັກ-ລັດ  ມີນະໂຍບາຍນການສ້າງເສດຖະກິດຄອບຄົວ  ເຊິ່ງຈຸດນີ້ເປັນສິ່ງທີ່ດີທີ່ຕ້ອງສືບຕໍ່ເສີມຂະຫຍາຍ  ເພື່ອຍົກລະດັບຊີວິດການເປັນຢູ່ເທື່ອລະກ້ວ.

ບົດໂດຍ: ມາລີດາ

KPL