*ກອງປະຊຸມສະຫລຸບປີດໂຄງການ, ໂຄງການສຳຫລວດ ແລະ ເກັບກູ້ລະເບີດບໍ່ທັນແຕກທີ່ຕົກຄ້າງ ໄລຍະ VI ຂອງອົງການຊ່ວຍເຫລືອລ້າ ຈາກປະຊາຊົນນອກແວ ຫລ NPA ໄດ້ມີຂຶ້ນໃນວັນທີ 12 ທັນວາ 2024 ນີ້ ທີ່ີແຂວງເຊກອງ, ໂດຍການເປັນປະທານຂອງ ທ່ານ ນາງ ບຸນຮຽງ ບຸນຈິດ ກຳມະການປະຈຳພັກແຂວງ, ປະທານແນວລາວສ້າງຊາດແຂວງເຊກອງ ແລະ ເປັນປະທານຮ່ວມຂອງ ທ່ານ ບຸນເສີດ ເສດທິລາດ ກຳມະການປະຈຳພັກແຂວງ ຮອງເຈົ້າແຂວງອັດຕະປື, ມີຕາງໜ້າກະຊວງການຕ່າງປະເທດ, ຕາງໜ້າອົງການຊ່ວຍເຫລືອລ້າ ປະຊາຊົນນອກແວ ຫລື NPA ແຂກຮັບເຊີນຈາກຂະແໜງການກ່ຽວຂ້ອງ 4 ແຂວງພາກໃຕ້ ແລະ ບັນດາເມືອງເປົ້າໝາຍເຂົ້າຮ່ວມ.

      ທ່ານ ຈັນທະນູສອນ ຈັນທະວົງ ວິຊາການອົງການຊ່ວຍເຫລືອລ້າ ປະຊາຊົນນອກແວ ຫລື NPA ລາຍ ງານວ່າ: ໂດຍປະຕິບັດຕາມບົດບັນ ທຶກຄວາມເຂົ້າໃຈລະຫວ່າງ ຄະນະ ກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ, ຕາງໜ້າໃຫ້ແກ່ລັດຖະບານແຫ່ງ ສປປ ລາວ ແລະ ອົງການ NPA ຄັ້ງວັນທີ 13 ກໍລະກົດ 2023, ເຊິ່ງໄດ້ຮັບການສະໜັບສະໜູນທຶນຈາກ ກະຊວງການຕ່າງປະເທດສະຫະລັດອາເມລິກາ ແລະ ກະຊວງການຕ່າງປະເທດນອກແວລວມທັງໝົດ 18 ລ້ານກວ່າໂດລາສະຫະລັດ, ໂຄງການສຳຫລວດ ແລະ ເກັບກູ້ ລະເບີດໄດ້ເຄື່ອນໄຫວຈັດຕັ້ງປະຕິບັດຢູ່ 4 ແຂວງພາກໃຕ້ຄື: ຈຳປາສັກ, ສາລະວັນ, ອັດຕະປື ແລະ ເຊກອງ, ໃນນັ້ນ ມີ 4 ກິດຈະກຳທີ່ປະຕິບັດຕົວຈິງຄື: ກິດຈະກຳວຽກພົວພັນຊຸມຊົນ ປະເມີນຜົນກະທົບພື້ນທີ່ ແລະ ໂຄສະນາສຶກສາຄວາມສ່ຽງໄພຈາກລະເບີດບໍ່ທັນແຕກ ຫລື ລບຕ, ເຊິ່ງທິມງານໄດ້ລົງບ້ານພື້ນທີ່ເປົ້າໝາຍໄດ້ 103 ບ້ານ, 21 ເມືອງ ຂອງ 4 ແຂວງພາກໃຕ້ຈຳນວນ 1.247 ຄັ້ງ, ກິດຈະກຳສຳຫລວດຊອກຫາວົງກະຈາຍ ຂອງລະເບີດລູກຫວ່ານແບບວິຊາການປະຕິບັດໄດ້ 5 ເມືອງ, 23 ບ້ານ, ພົບເຫັນຈຳນວນ 6 ຈຸດ ແລະ ທຳລາຍລະເບີດລູກຫວ່ານ ຈຳນວນ 6 ລູກ, ສຳຫລວດແບບວິຊາການ ມີ 4 ແຂວງ 19 ເມືອງ 103 ບ້ານມີເນື້ອທີ່ສຳຫລວດທັງໝົດ 13.650.000 ຕາແມັດ, ກຳນົດພື້ນທີ່ຢືນຢັນວ່າອັນຕະລາຍຈຳນວນ 86 ສະໜາມມີເນື້ອ ທີ່ 4.910.480 ຕາແມັດ, ພົບເຫັນ ແລະ ທຳລາຍລະເບີດໄດ້ທັງໝົດ 570 ລູກ, ໃນນີ້ລະເບີດລູກ ຫວ່ານຈຳນວນ 536 ລູກ, ບົມໃຫຍ່ 3 ລູກ ແລະ ລະເບີດອື່ນໆອີກ 31 ລູກ, ວຽກງານທຳລາຍເຄື່ອນທີ່ໄດ້ປະຕິບັດຕົວຈິງໃນ 4 ແຂວງ ມີ 18 ເມືອງ, 79 ບ້ານ, ທຳລາຍລະເບີດໄດ້ທັງໝົດ 1.186 ລູກ, ໃນນີ້ລະເບີດລູກຫວ່ານ 921 ລູກ, ບົມໃຫຍ່ 8 ລູກ, ມິນ 6 ລູກ ແລະ ລະ ເບີດອື່ນໆ 251 ລູກ, ກິດຈະກຳວຽກງານກວດກາຄຸນນະພາບພາຍໃນ ມີທິມງານຄຸ້ມຄອງຄຸນນະພາບ 1 ທິມ, ໄດ້ລົງກວດກາ ແລະ ຄາດຄະເນເປົ້າໝາຍທຸກເປົ້າໝາຍ ມາຮອດປັດຈຸບັນປະຕິບັດໄດ້ທັງໝົດ 2.884 ຄັ້ງ ແລະ ກິດຈະກຳກວດກູ້ພື້ນທີ່, ສາມາດປະຕິບັດກວດກູ້ລະເບີດອອກຈາກພື້ນທີ່ໄດ້ທັງໝົດ 191 ພື້ນທີ່ສະໜາມ, ໃນຂອບເຂດ 85 ບ້ານ, 21 ເມືອງຂອງ 4 ແຂວງ, ສັງລວມເນື້ອທີ່ໄດ້ທັງໝົດ 17.912.671 ຕາແມັດ, ພົບເຫັນ ແລະ ທຳລາຍລະເບີດໄດ້ທັງໝົດ 15.860 ລູກ, ໃນນີ້ມີລະເບີດລູກຫວ່ານ 15.786 ລູກ, ບົມໃຫຍ່ 9 ລູກ, ມິນ 4 ລູກ ແລະ ລະເບີດອື່ນໆ 1.061 ລູກ.

      ທ່ານ ຈັນທະນູສອນ ຈັນທະວົງ ວິຊາອົງການຊ່ວຍເຫລືອລ້າປະຊາຊົນນອກແວ ຫລື NPA ໃຫ້ຮູ້ອີກວ່າ: ຜ່ານການຈັດຕັ້ງປະຕິບັດວຽກງານດັ່ງກ່າວມາຮອດ ວັນທີ 31 ຕຸລາ 2024 ໄດ້ນຳໃຊ້ງົບປະມານການການປະຕິບັດວຽກງານທັງໝົດ 15.755.123 ໂດລາ ສະຫະລັດ, ເທົ່າກັບ 84.87%, ງົບປະມານຍັງເຫລືອຕົວຈິງ 2.809.223 ໂດລາສະຫະລັດ, ເທົ່າກັບ 15.13%, ພ້ອມທັງສະເໜີສືບຕໍ່ໂຄງການໄລຍະ 3 ເດືອນ ເລີ່ມແຕ່ວັນທີ 11 ທັນ ວາ 2024-11 ມັງກອນ 2025 ໂດຍນຳໃຊ້ງົບປະມານທີ່ຍັງເຫລືອ, ພ້ອມນີ້, ໃນກອງປະຊຸມຍັງໄດ້ປະກອບຄຳຄິດຄຳເຫັນໃສ່ຮ່າງບົດບັນທຶກຄວາມເຂົ້າໃຈລະຫວ່າງ ກະຊວງການຕ່າງປະເທດ ຕາງໜ້າໂດຍຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ ແລະ ອົງການຊ່ວຍເຫລືອລ້າປະຊາຊົນນອກແວ ຫລື NPA ເພື່ອໃຫ້ມີເນື້ອໃນທີ່ຄົບຖ້ວນ ແລະ ກະກຽມສືບຕ່ໍໂຄງການສຳຫລວດ ແລະ ເກັບກູ້ລະເບີດບໍ່ທັນແຕກທີ່ຕົກຄ້າງໄລຍະ VII ເຊິ່ງ ຈະມີໄລຍະການຈັດຕັ້ງປະຕິບັດໂຄງການຮອດວັນທີ 31 ຕຸລາ 2026, ເຊິ່ງໄດ້ຮັບການສະໜັບສະໜູນທຶນຈາກໂຄງການຫລຸດຜ່ອນອາວຸດຄັງແສງ ກະຊວງການຕ່າງປະເທດສະຫະລັດອາເມລິກາ ແລະ ອົງການຮ່ວມມືເພື່ອການພັດທະນາປະເທດນອກແວທັງໝົດ 20.621.124 ໂດລາສະຫະລັດ.

KPL