ຂປລ
ເກີດອຸບັດ ເຮືອບິນໂດຍສານ ເຊຈູແອຣ ເສຍຫລັກ ແລ່ນອອກນອກເສັນທາງ (ລັນເວຍ) ທີ່ສະໜາມບິນ ທາງພາກໃຕ້ຂອງ ສ.ເກົາຫລີ ເຮັດໃຫ້ມີຜູ້ເສຍຊີວິດ 179 ຄົນ ແລະ ບາດເຈັບ 2 ຄົນ ຈາກຈຳນວນ ມີຜູ້ໂດຍສານທັງໝົດ 181 ຄົນ
ຂປລ.ສຳນັກຂ່າວ ຢອນຮັບຂອງສ.ເກົາຫລີ,ວັນທີ 29 ທັນວານີ້, ເກີດອຸບັດ ເຮືອບິນໂດຍສານ ເຊຈູແອຣ ເສຍຫລັກ ແລ່ນອອກນອກເສັນທາງ (ລັນເວຍ) ທີ່ສະໜາມບິນ ທາງພາກໃຕ້ຂອງ ສ.ເກົາຫລີ ເຮັດໃຫ້ມີຜູ້ເສຍຊີວິດ 179 ຄົນ ແລະ ບາດເຈັບ 2 ຄົນ ຈາກຈຳນວນ ມີຜູ້ໂດຍສານທັງໝົດ 181 ຄົນ ເປັນຊາວ ສ.ເກົາຫລີ 173 ຄົນ, ຄົນໄທ 2 ຄົນ ແລະ ຈຸບິນອີກ 6 ຄົນ.
ເຮືອບິນໂດຍສານຂອງ ເຊຈູແອຣ ຖ້ຽວບິນ 7ຊີ 2216 ໃຊ້ເຮືອບິນໂບອີ້ງ 737-800 ເດີນທາງຈາກສະໜາມບິນ ສາກົນສຸວັນນະພູມ ຂອງໄທ ໄດ້ເສຍຫລັກແລ່ນອອກນອກ ທາງແລ່ນ (runway) ແລ້ວ ຕຳໃສ່ຮົ້ວກັ້ນ ທີ່ສະໜາມບິນ ສາກົນມູອັນ ໃນແຂວງຊໍລລາໃຕ້ ຂອງ ສ.ເກົາຫລີ. ສຳລັບ ການສືບສວນສອບສວນ ໃນເບື້ອງຕົ້ນພົບວ່າ: ເຮືອບິນລຳດັ່ງກ່າວ ປະສົບບັນຫາຖານລໍ້ ລົງຈອດຂັດຂ້ອງ ເຮັດໃຫ້ຄວາມພະຍາຍາມ ລົງຈອດ ບໍ່ສຳເລັດ. ຢ່າງໃດກໍ່ຕາມ ເມື່ອລົງຈອດຄັ້ງທີສອງ ນັກບິນບໍ່ສາມາດ ຫລຸດຜ່ອນຄວາມໄວຂອງ ເຮືອບິນໄດ້ ສົ່ງຜົນໃຫ້ເຮືອບິນແລ່ນໄປຈົນເຖິງທ້າຍ ລັນເວຍ ແລະ ຕຳເຂົ້າກັບໂຄງສ້າງ ທີ່ເປັນຮົ້ວກັ້ນ ສ້າງຄວາມເສຍຫາຍຢ່າງໜັກ ໃຫ້ກັບ ເຮືອບິນ ແລະ ສົ່ງຜົນໃຫ້ເກີດໄຟລຸກໄໝ້ ເຮືອບິນໝົດລຳ./.
KPL
