ຂປລ
ຂປລ. ພິທີມອບ-ຮັບອາຄານຮຽນຖາວອນ ຢູ່ບ້ານພູແຊວ ເມືອງພູກູດ ແຂວງຊຽງຂວາງ ຈັດຂຶ້ນໃນລະຫວ່າງວັນທີ 22-23 ທັນວາ 2024 ຜ່ານມາ ໂດຍເປັນກຽດເຂົ້າຮ່ວມ ຂອງ ທ່ານ ບຸນທອງຈິດມະນີ ຮອງປະທານປະເທດ, ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ມີການນຳມາຈາກສູນກາງ, ຄອບຄົວການນຳຂັ້ນສູງ, ການນຳຂັ້ນແຂວງ, ເມືອງ, ພໍ່ແມ່ປະຊາຊົນ ແລະ ນ້ອງນັກຮຽນພາຍໃນບ້ານ ເຂົ້າຮ່ວມ.
ຂປລ. ພິທີມອບ-ຮັບອາຄານຮຽນຖາວອນ ຢູ່ບ້ານພູແຊວ ເມືອງພູກູດ ແຂວງຊຽງຂວາງ ຈັດຂຶ້ນໃນລະຫວ່າງວັນທີ 22-23 ທັນວາ 2024 ຜ່ານມາ ໂດຍເປັນກຽດເຂົ້າຮ່ວມ ຂອງ ທ່ານ ບຸນທອງຈິດມະນີ ຮອງປະທານປະເທດ, ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ມີການນຳມາຈາກສູນກາງ, ຄອບຄົວການນຳຂັ້ນສູງ, ການນຳຂັ້ນແຂວງ, ເມືອງ, ພໍ່ແມ່ປະຊາຊົນ ແລະ ນ້ອງນັກຮຽນພາຍໃນບ້ານ ເຂົ້າຮ່ວມ.
ໂຄງການກໍ່ສ້າງອາຄານຮຽນດັ່ງກ່າວ, ປະກອບມີ 5 ຫ້ອງຮຽນ, 1 ຫ້ອງການຄູ ແລະ 2 ຫ້ອງນ້ຳພ້ອມເຄື່ອງເຟີນີເຈີຄົບຊຸດ, ອາຄານຮຽນມີຂະໜາດກວ້າງ 8 ແມັດ, ຍາວ 35 ແມັດ ໂດຍແມ່ນບໍລິສັດ ເອັສເອັສ ສຳຫລວດອອກແບບກໍ່ສ້າງ-ຂົວທາງ ແລະ ຊົນລະປະທານຈຳກັດ, ລວມມູນຄ່າການກໍ່ສ້າງທັງໝົດ 1,8 ຕື້ກວ່າກີບ, ເປັນອາຄານຮຽນຖາວອນ, ໃຊ້ເວລາໃນການກໍ່ສ້າງສໍາເລັດ 100% ພາຍໃນ 5 ເດືອນ ເຊິ່ງຖືກຕ້ອງຕາມມາດຖານ ທີ່ກະຊວງສຶກສາທິການ ແລະ ກິລາວາງອອກ ໂດຍແມ່ນ ທ່ານ ນາງ ໄຫລ ຈິດມະນີ ຄອບຄົວ ທ່ານ ບຸນທອງ ຈິດມະນີ ຮວບຮວມທຶນກໍ່ສ້າງ.
ໂອກາດດັ່ງກ່າວ, ຄອບຄົວການນຳຂັ້ນສູງ ແລະ ນັກທຸລະກິດ ກໍໄດ້ມອບເງິນຊ່ວຍເຫລືອ ໃຫ້ແຂວງຊຽງຂວາງ 4,5 ຕື້ກວ່າກີບ ແລະ ເຄື່ອງອຸປະໂພກ-ບໍລິໂພກມູນຄ່າ 300 ລ້ານກວ່າກີບ, ມອບລົດຈັກຮອນດາເວບ 100 ຈຳນວນ 1 ຄັນ ແລະ ເງິນສົດຈຳນວນໜຶ່ງ ໃຫ້ກອງເສຍອົງຄະ 194 ບ້ານຄັງໄຂ ເມືອງແປກ ແລະ ກອງເສຍອົງຄະ 294 ບ້ານລ້ອງໄກ່ ເມືອງຄຳ.
ໃນໂອກາດດຽວກັນ, ທ່ານຮອງປະທານປະເທດ ພ້ອມຄະນະ ກໍໄດ້ໄປຢ້ຽມຢາມຟາມງົວນົມລາວຈັງໂກ, ການປູກມັນດ້າງສາຍພັນຍີ່ປຸ່ນ ຂອງປະຊາຊົນບ້ານສີຊູ ແລະ ການທອມງົວ ຂອງປະຊາຊົນບ້ານຄອງ ເມືອງແປກ ແຂວງຊຽງຂວາງ ຕື່ມອີກ.
ຂ່າວ: ບຸນມີແສງທຸມມີ
KPL
