ປະ​ເທດ​ລາຊະ​ອານາຈັກ​ໄທ(The Kingdom of Thailand)ມີ​ນະຄອນຫລວງຊື່ວ່າ: ບາງກອກ(Bangkok)​, ຊຶ່ງ​ເປັນ​ປະ​ເທດ​ເພື່ອນ​ບ້ານ ຮັກ​ແພງ​ຊ່ວຍ​ເຫລືອ​​ເຊິ່ງກັນ ​ແລະ ກັນ​ມາ​ໂດຍ​ຕະຫລອດ​ກັບສປປ ​ລາວແລະໄດ້​ສ້າງ​ຕັ້ງສາຍ​ພົວ​ພັນ​ທາງ​ການ​ທູດ ​ຮ່ວມກັນກັບ ສປປລາວ ເມື່ອ​ວັນ​ທີ 19.12.1950 ເປັນ​ຕົ້ນ​ມາ.ປະເທດໄທ ໂດຍຕັ້ງ​ຢູ່​ແຫລມມະຫາ​ສະໝຸດ ອິນ​ດູ​ຈີນແລະ​ມາ​ລາ​ຢູ ​ໃນ​ພາກ​ພື້ນ ​ອາຊີ​ຕາ​ເວັນ​ອອກ​ສຽງໃຕ້(ອາຊຽນ), ມີ​ຊາຍ​ແດນ​ທິດຕາ​ເວັນ​ອອກ​ ຕິດ​ກັບສປປ ​ລາວ ​ແລະ ກຳປູ​ເຈຍ, ທິດ​ໃຕ້ ​ຕິດ​ກັບ​ມາ​ເລ​ເຊຍ ​ແລະ ອ່າວ​ໄທ, ທິດຕາ​ເວັນ​ຕົກ​ ຕິດ​ກັບ ທະ​ເລອັນ​ດາ​ມັນແລະມຽນມາ, ທິດ​ເໜືອ​ຕິດ​ກັບມຽນມາ​ແລະສປປ ລາວ. ມີ​​ເນື້ອ​ທີ່​ທັງ​ໝົດ 513.120 ກິ​ໂລ​ຕາ​ແມັດ, ກວມ​ເອົາ​ປະຊາກອນປະມານ 66.05 ລ້ານ​ຄົນ(​ໃນ​ປີ2023), ​ໃຊ້​ພາສາ​ທາງ​ການ​ຄື ​ພາສາ​ໄທ, ປະຊາຊົນ​ສ່ວນ​ໃຫຍ່​ 90% ຖື​ສາສະໜາພຸດ; ​ໃຊ້ສະ​ກຸນ​ເງິນ​​ບາດ(THB). ​ສ່ວນວັນຊາດ​ແມ່ນວັນທີ5 ​ເດືອນ​ທັນວາ.

       ໄທ ມີເສດຖະກິດ​ແບບປະສົມ, ​ເປັນ​ປະ​ເທດ​ອຸດສາຫະກຳ​ໃໝ່ ​ໂດຍມີລາຍໄດ້ຫລັກຈາກ ອຸດສາຫະກຳການສົ່ງອອກສິນຄ້າ, ການທ່ອງທ່ຽວ, ການບໍລິການແລະອື່ນໆ ລວມຍອດຜະລິດ ຕະພັນພາຍໃນປະ​ເທດ (GDP) ບັນລຸ ບັນລຸ 536,16 ຕື້​ໂດ​ລາ​ສະຫະລັດ (​ໃນ​ປີ2022); ລາຍໄດ້ສະເລ່ຍຕໍ່ຫົວຄົນ 7.651 ກວ່າໂດລາສະຫະລັດຕໍ່​ປີ; ອັດຕາ ການຂະຫຍາຍຕົວ ດ້ານເສດຖະກິດ 1,6%ຕໍ່​ປີ.ສິນຄ້າທີ່​ສົ່ງອອກສຳຄັນ​ເຊັ່ນ: ​ເຄື່ອງ​ຄອມ​ພີ​ວ​ເຕີ, ອຸປະກອນ, ປະເພດອາຫານ,​ສິນຄ້າອຸດສາຫະກຳ ​ແລະ ອື່ນໆ; ສິນຄ້າ​ທີ່​ນຳ​ເຂົ້າ ຄື: ນ້ຳມັນ​ ແລະ ເຊື້ອໄຟ, ​ເຄື່ອງກົນ​ຈັກ, ຜະລິດຕະພັນເຄມີ. ສ່ວນປະເທດຄູ່ຮ່ວມ​ມື ການຄ້າທີ່​ສຳຄັນ​ເປັນ​ຕົ້ນ: ສ.ອາ​ເມ​ລິ​ກາ, ຍີ່ປຸ່ນ, ​ເອີຣົບ, ສປ ຈີນ, ສິງກະ​ໂປ ຕາມ​ລຳດັບ.ນອກນີ້ ຍັງມີຄວາມ​ສວຍ​ງາມ ດ້ານ​ທຳ​ມະ​ຊາດ ແລະ ​ແຫລ່ງທ່ອງທ່ຽວຕ່າງໆເຊັ່ນ: ​ພັດທະຍາ, ພູ​ເກັດ, ກຸງ​ເທບ​ມະ​ຫາ​ນະຄອນ (ບາງກອກ), ຊຽງ​ໃໝ່, ​ເພັດ​ສະບູ​ນ ແລະ ແຫ່ງອື່ນໆ ​ສາມາດ​ດຶງ​ດູດ​ເອົາ​ນັກ​ທ່ອງ​ທ່ຽວ​ ທັງ​ພາຍ​ໃນ ​ແລະ ຕ່າງປະ​ເທດ​ ໄດ້ຈຳນວນ​ຫລວງຫລາຍ​ ໃນ​ແຕ່ລະ​ປີ.

ນອກ​ນີ້ ຄວາມ​ສຳພັນ​ລະຫວ່າງ​ສປປ ລາວ ​ແລະ ​ໄທ ​ໃນ​ປັດຈຸບັນ ຍັງ​ດຳ​ເນີນ​ຢ່າງ​ໃກ້​ສິດ​​ບົນ​ພື້ນຖານ​ຂອງ​ການ​ເຄົາລົບເຊິ່ງກັນ ​ແລະ ກັນ ​ແລະ ມີຜົນ​ປະ​ໂຫຍ​ດຮ່ວມ​ກັນ, ພັດທະນາ ​ເຊິ່ງທາງ​ບວກຢ່າງ​ຕໍ່​ເນື່ອງ ຊຶ່ງ​ມີ​ ປັດ​ໄຈ ​ເອື້ອ​ເຟື້ອ​ເພື່ອ​ແຜ່ ຄວາມ​ໃກ້​ຊິດ ທາ​ງ​ເຊື້ອ​ຊາດ ແລະສາສະໜາ, ພາສາແລະວັດທະນາ​ທຳ, ປະຊາຊົນ ທັງ​ສອງ​ປະ​ເທດ ​ໄປມາຫາສູ່ກັນ ໃນ​ການ​ດຳລົງ​ຊີວິດ​ປະຈຳ​ວັນ. ​ທັງສອງຝ່າຍຍັງສະແດງຄວາມມຸ້ງໝັ້ນທີ່ຈະສົ່ງເສີມຄວາມຮ່ວມມື ທີ່ຄວບຄຸມຮອບດ້ານທັງໃນລະດັບທະວີພາຄີ ແລະ ພະຫຸພາຄີ ເພື່ອກ້າວໄປສູ່ ຄວາມເປັນຫຸ້ນສ່ວນ ທາງຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາ ແບບຍືນຍົງ./.

ໂດຍ: ດາວັນ

KPL