ຂປລ. ໃນວັນທີ 24 ທັນວາ 2024 ນີ້, ທ່ານ ບຸນເຫລືອ ພັນດານຸວົງ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂ່ຳນັບອໍາລາ ຂອງ ທ່ານ ໂອຣຮັນ ອືເຊີກ (Orhan Isik) ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ຕວັກກີ ປະຈໍາ ສປປ ລາວ.

ໂອກາດດັ່ງກ່າວ, ທ່ານ ບຸນເຫລືອ ພັນດານຸວົງ ໄດ້ສະແດງຄວາມຍິນດີ ຕ້ອນຮັບອັນອົບອຸ່ນ ແລະ ຊົມເຊີຍ ຕໍ່ທ່ານທູດ ໃນການສໍາເລັດການປະຕິບັດໜ້າທີ່ຂອງຕົນຢູ່ ສປປ ລາວ ຕະຫລອດໄລຍະ 4 ປີ ໂດຍໄດ້ປະກອບສ່ວນສໍາຄັນ ເຂົ້າໃນການເສີມຂະຫຍາຍ ການພົວພັນຮ່ວມມື ລະຫວ່າງ ສປປ ລາວ ແລະ ສ ຕວັກກີ ແລະ ຕີລາຄາສູງ ຕໍ່ສາຍພົວພັນມິດຕະພາບ, ການຮ່ວມມືອັນດີ ລະຫວ່າງ ສອງປະເທດ ຕະຫລອດໄລຍະກວ່າຫົກທົດສະວັດ ຜ່ານມາ. ພ້ອມທັງ ສະແດງຄວາມຂອບໃຈ ຕໍ່ລັດຖະ ບານ ແລະ ປະຊາຊົນຕວັກກີ ທີ່ໃຫ້ການສະໜັບ ສະໜູນຊ່ວຍເຫລືອ ສປປ ລາວ ໃນຫລາຍດ້ານ ເປັນຕົ້ນ ດ້ານສາທາລະນະສຸກ, ການສຶກສາ, ການສົ່ງເສີມທັກສະ ແລະ ຄວາມກ້າວໜ້າຂອງຊາວໜຸ່ມ-ແມ່ຍິງ ແລະ ເຊື່ອໝັ້ນວ່າ ສ ຕວັກກີ ຈະສືບຕໍ່ໃຫ້ການສະໜັບສະໜູນ ຂະແໜງການຕ່າງໆຂອງ ສປປ ລາວ ເພື່ອສົ່ງເສີມການພົວພັນ ແລະ ການຮ່ວມມື ລະຫວ່າງ ສອງປະເທດ. ພ້ອມທັງ ອວຍພອນໃຫ້ທູດ ຈົ່ງປະສົບຜົນສຳເລັດໃໝ່ ໃນໜ້າທີ່ວຽກງານໃນຕໍ່ໜ້າ ແລະ ເດີນທາງກັບຄືນປະເທດໂດຍສະຫວັດ ດີພາບ.

ທ່ານ ໂອຣຮັນ ອືເຊີກ ກໍໄດ້ສະແດງຄວາມຂອບໃຈຢ່າງຈິງໃຈຕໍ່ ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງ ຊົມເຊີຍ ຕໍ່ການເຂົ້າຮັບໜ້າທີ່ໃໝ່ຂອງ ທ່ານ ບຸນເຫລືອ ພັນດານຸວົງ ແລະ ຕີລາຄາສູງຕໍ່ຜົນສຳເລັດຂອງ ສປປ ລາວ ໃນການເປັນເຈົ້າພາບ ຈັດກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມສຸດຍອດ ທີ່ກ່ຽວຂ້ອງອື່ນໆ. ພ້ອມນັ້ນ, ທ່ານທູດ ຍັງໄດ້ຢືນຢັນວ່າ ຈະສືບຕໍ່ຊຸກຍູ້ ເປັນຂົ້ວຕໍ່ ໃນການສະໜັບສະໜູນຊ່ວຍເຫລືອ ສປປ ລາວ ແລະ ເພີ່ມທະວີຮ່ວມມືກັບພາກສ່ວນຕ່າງໆຂອງລາວ ເພື່ອປະກອບສ່ວນເຂົ້າໃນການ ເສີມຂະຫຍາຍ ການພົວພັນ ລະຫວ່າງ ສປປ ລາວ ແລະ ສ ຕວັກກີ ໃຫ້ນັບມື້ແໜ້ນແຟ້ນຍິ່ງຂຶ້ນ.

ຂ່າວ: ຄຕພ

KPL