ຂປລ. ກອງປະຊຸມ ຄົບຄະນະບໍລິຫານງານພັກ ຄັ້ງທີ 11 ອົງການໄອຍະການປະຊາຊົນສູງສຸດ ສະໄໝທີ V ຈັດຂຶ້ນໃນວັນທີ 25 ທັນວາ 2024 ພາຍ​ໃຕ້​ການເປັນປະທານຂອງ ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ, ມີສະຫາຍຮອງເລຂາ, ຄະນະປະຈໍາພັກ ແລະ ບັນດາ ສະຫາຍຄະນະບໍລິຫານງານພັກ ເຂົ້າຮ່ວມ ເພື່ອສະຫລຸບຕີລາຄາຄືນ ການຈັດຕັ້ງປະຕິບັດວຽກງານຊີ້ນໍາ-ນໍາພາຮອບດ້ານ ຂອງຄະນະບໍລິ ຫານງານພັກໃນ 3 ເດືອນຜ່ານມາ, ພ້ອມທັງ ວາງທິດທາງແຜນການການ ເຄື່ອນໄຫວວຽກງານໃນ3ເດືອນຕໍ່ໜ້າ.

ກອງປະຊຸມ ໄດ້ພ້ອມກັນປຶກສາຫາລື ຄົ້ນຄວ້າປະກອບຄໍາຄິດຄໍາເຫັນ, ຕີລາຄາຄວາມຮັບຜິດ ຊອບການເມືອງ ຂອງຄະນະພັກຂັ້ນຕ່າງໆ ໃນໄລຍະ 3 ເດືອນຜ່ານມາ ເພື່ອໃຫ້ເຫັນ ໄດ້ດ້ານດີ, ຜົນໄດ້ຮັບ, ດ້ານອ່ອນ, ຂໍ້ຄົງຄ້າງ, ຂໍ້ຂາດຕົກບົກຜ່ອງ ແລະ ສາເຫດໃນການນໍາພາຂອງຄະນະພັກແຕ່ລະຂັ້ນ, ຈາກນັ້ນ ຈະໄດ້ຮັບຟັງບົດສະຫລຸບ ຕີລາຄາການນໍາພາ-ຊີ້ນໍາ ວຽກງານຮອບດ້ານ ໃນໄລຍະ 3 ເດືອນຕົ້ນປີ ແລະ ວາງທິດທາງວຽກງານຈຸດສຸມ 3 ເດືອນຕົ້ນປີ 2025 ຂອງຄະນະບໍລິຫານງານພັກ ກ່ຽວກັບວຽກງານກົງຈັກການຈັດຕັ້ງ-ພະນັກງານ, ແບ່ງປັນຄວາມຮັບຜິດຊອບຊີ້ນໍາ ອົງການໄອຍະການປະຊາ ຊົນທ້ອງຖິ່ນ ໃຫ້ບັນດາສະຫາຍຄະນະບໍລິຫານງານພັກ, ຫົວໜ້າຫ້ອງການ, ຫົວໜ້າກົມເອົາໃຈໃສ່ ວຽກງານສຶກສາອົບຮົມ ການເມືອງ-ນໍາພາແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ຂັ້ນສູນກາງ ເເລະ ທ້ອງຖີ່ນຢ່າງໜັກແໜ້ນ ໂດຍຖືເອົາການຈັດຕັ້ງຜັນຂະຫຍາຍວາລະແຫ່ງຊາດ ເປັນວຽກງານ ປຸກລະດົມດ້ານ ທັດສະນະແນວຄິດຂອງສະມາຊິກພັກ, ພະນັກງານ ແລະ ໄດ້ຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI, ມະຕິກອງປະຊຸມໃຫຍ່ ຄັ້ງທີ V ຂອງອົງການໄອຍະການປະຊາຊົນສູງສຸດ, ມະຕິກອງປະຊຸມໃຫຍ່ຂອງບັນດາໜ່ວຍພັກ ຂອງ 3 ອົງການຈັດຕັ້ງມະຫາຊົນ ໃຫ້ບຸກລະທຸ; ປັບປຸງກົງຈັກ ການຈັດຕັ້ງຢຸ່ອົງການໄອຍະການປະຊາຊົນ ຂັ້ນສູນກາງ ຮອດທ້ອງຖິ່ນ ໃນການບັນຈຸສັບຊ້ອນພະນັກງານຂັ້ນຕ່າງໆ; ການສ້າງກົນໄກຄົ້ນຄວ້າແກ້ໄຂຄະດີ ແລະ ຄຳຮ້ອງໃຫ້ໄດ້ທັງຈຳນວນ ແລະ ຄຸນນະພາບ; ວຽກງານການປະກາດອະໄພຍະໂທດ ປະຈຳປີ 2024 ໃນຂອບເຂດທົ່ວປະເທດ ແລະ ການປັບປຸງລັດຖະບັນຍັດຂອງປະທານປະເທດ; ວຽກງານປະສານງານ ກົນໄກການດຳເນີນຄະດີ ກັບພາກສ່ວນຕ່າງໆ, ການຂຽນປື້ມຄູ່ມືດຳເນີນຄະດີປົກຄອງ, ປັບປຸງຮ່າງບົດບັນທຶກຮ່ວມກັບພາກສ່ວນອື່ນໆ; ວຽກງານລົງຕິດຕາມ ແລະ ຊຸກຍູ້ໂຄງການ ສ້າງຕັ້ງອົງ ການໄອຍະການເຂດປະຈໍາເມືອງ. ພ້ອມນັ້ນ, ຍົກໃຫ້ເຫັນການນໍາພາ-ຊີ້ນໍາວຽກງານຮອບດ້ານ ຂອງ ຄະ ນະບໍລິຫານງານພັກ ອົງການໄອຍະການປະຊາຊົນສູງສຸດ ໃນສາມເດືອນ ຜ່ານມາ ແມ່ນມີຜົນສໍາເລັດຢ່າງໜ້າເພິ່ງພໍໃຈ; ຄະນະບໍລິຫານງານພັກ, ສະມາຊິກພັກ ແລະ ພະນັກງານ-ລັດຖະກອນ ທົ່ວລະບົບອົງການໄອຍະການປະຊາຊົນ ມີຄວາມອຸ່ນອຽນທຸ່ນທ່ຽງ, ມີຄວາມສາມັກຄີເປັນປຶກແຜ່ນ ພາຍໃຕ້ການນຳພາຂອງອົງຄະນະພັກ ແລະ ເປັນກຳລັງແຮງປະກອບສ່ວນໃຫ້ອົງຄະນະພັກ ນຳພາຍາດເອົາຜົນສຳ ເລັດໃໝ່ ຍິ່ງໃຫຍ່ກວ່າເກົ່າ.

ໂອກາດດັ່ງກ່າວ, ໄຊຊະນະ ໂຄດພູທອນ ໄດ້ມີທິດຊີ້ນໍາໃຫ້ເພີ່ມທະວີຄວາມຮັບຜິດຊອບໃນການນຳພາ-ຊີ້ນຳ ປັບປຸງກົງຈັກການຈັດຕັ້ງ, ປັບປຸງແບບແຜນ ວິທີນຳພາ-ແບບແຜນ ວິທີເຮັດວຽກ, ວຽກງານແຂ່ງຂັນ-ຍ້ອງຍໍ, ເພີ່ມທະວີວຽກງານກວດກາ, ວຽກງານວິຊາສະເພາະ, ສ້າງກົນໄກປະສານງານໃຫ້ໂລ່ງລ່ຽນ ແລະ ມີປະສິດທິຜົນ. ພ້ອມທັງຮຽກຮ້ອງໃຫ້ບັນດາ ສະຫາຍຄະນະ ບໍລິຫານງານພັັກ ຈົ່ງຍົກສູງຄວາມຮັບຜິດຊອບຂອງຕົນ ໃນການນໍາພາ-ຊີ້ນໍາ ເຊິ່ງກ່ອນອື່ນໝົດ ຕ້ອງເພີ່ມທະວີການເຊື່ອມຊຶມ, ກໍາແໜ້ນແນວທາງແຜນນະໂຍບາຍ ຂອງພັກ, ກົດໝາຍຂອງລັດ ໂດຍສະເພາະ ກົດໝາຍວ່າດ້ວຍອົງ ການໄອຍະການປະຊາຊົນ, ກົດໝາຍອື່ນໆທີ່ກ່ຽວຂ້ອງ, ເປັນແກນນໍາໃນລະບົບການເມືອງ ຢູ່ອົງການໄອຍະການ ປະຊາຊົນ, ເປັນແບບຢ່າງຕັ້ງໜ້າ ໃນການປະຕິບັດ ສິດ ແລະ ໜ້າທີ່ ຕາມຄວາມຮັບຜິດຊອບຂອງຕົນ ໃຫ້ມີຜົນສໍາເລັດ, ເຮັດໃຫ້ອົງການໄອຍະການ ປະຊາຊົນນັບມື້ມີການພັດທະນາ, ຍົກສູງຄຸນນະພາບ ຂອງການດໍາເນີນຄະດີ ຕາມຂະບວນການຍຸຕິທໍາ, ເພີ່ມທະວີວຽກງານຕິດຕາມກວດກາຂອງອົງ ການໄອຍະການປະຊາຊົນ, ປະກອບສ່ວນເຮັດໃຫ້ປະເທດເຮົາ ມີຄວາມສະຫງົບ ແລະ ມີຄວາມເປັນລະບຽນຮຽບຮ້ອຍ, ເສດຖະກິດ ໄດ້ຮັບການພັດທະນາ ຢ່າງບໍ່ຢຸດຢັ້ງ.

ຂ່າວ: ພາບ: ອອປສ

KPL