ຂປລ
ຂປລ. ການຜະລິດກະສິກໍາແບບປະສົມ ໂດຍສະເພາະ ການປູກຜັກໃນເຮືອນຮົ່ມ, ລ້ຽງສັດ, ລ້ຽງປາ ແລະ ອື່ນໆສາມາດສ້າງລາຍຮັບ ແລະ ເຮັດໃຫ້ຄອບຄົວພົ້ນທຸກ ດັ່ງຄອບຄົວ ຂອງທ່ານ ນາງ ຮັກ ສີວິໄລ ປະຊາຊົນບ້ານກຸງເກືອຍ ເມືອງຂວາ ແຂວງຜົ້ງສາລີ ເປັນໜຶ່ງຄອບຄົວຕົວແບບ ໃນການຜະລິດກະສິກໍາແບບປະສົມ ດ້ວຍການປູກ-ການລ້ຽງ ພ້ອມຮັກສາໄດ້ສິ່ງແວດລ້ອມ ໃນການຜະລິດກະສິກຳແບບຍືນຍົງ ບວກກັບຄວາມອົດທົນ ຂະຫຍັນພຽນອອກແຮງງານ ແລະ ຄວາມສາມັກຄີພາຍໃນຄອບຄົວ.
ຂປລ. ການຜະລິດກະສິກໍາແບບປະສົມ ໂດຍສະເພາະ ການປູກຜັກໃນເຮືອນຮົ່ມ, ລ້ຽງສັດ, ລ້ຽງປາ ແລະ ອື່ນໆສາມາດສ້າງລາຍຮັບ ແລະ ເຮັດໃຫ້ຄອບຄົວພົ້ນທຸກ ດັ່ງຄອບຄົວ ຂອງທ່ານ ນາງ ຮັກ ສີວິໄລ ປະຊາຊົນບ້ານກຸງເກືອຍ ເມືອງຂວາ ແຂວງຜົ້ງສາລີ ເປັນໜຶ່ງຄອບຄົວຕົວແບບ ໃນການຜະລິດກະສິກໍາແບບປະສົມ ດ້ວຍການປູກ-ການລ້ຽງ ພ້ອມຮັກສາໄດ້ສິ່ງແວດລ້ອມ ໃນການຜະລິດກະສິກຳແບບຍືນຍົງ ບວກກັບຄວາມອົດທົນ ຂະຫຍັນພຽນອອກແຮງງານ ແລະ ຄວາມສາມັກຄີພາຍໃນຄອບຄົວ.
ທ່ານ ນາງ ຮັກ ສີວິໄລ ໄດ້ໃຫ້ສຳພາດຕໍ່ສື່ມວນຊົນ ເມື່ອບໍ່ດົນມານີ້ວ່າ: ບ້ານກຸງເກືອຍ ຕັ້ງຢູ່ເຂດພູດອຍ ຫ່າງຈາກຕົວເມືອງຂວາ ແຂວງຜົ້ງສາລີ ປະມານ 10 ກວ່າກິໂລ ເປັນເຂດພູສູງຊັນ ມີພື້ນທີ່ຜະລິດກະສິກຳທີ່ຈຳກັດ, ຊຶ່ງຄອບຄົວຂອງຕົນມີສະມາຊິກ 5 ຄົນ, ແຮງງານຕົ້ນຕໍ 3 ຄົນ ໃນເມື່ອກ່ອນຄອບຄົວ ໄດ້ຖືເອົາການຖາງປ່າເຮັດໄຮ່ ແບບເລື່ອນລອຍເປັນຫລັກ ສະພາບຄອບຄົວເວລານັ້ນທຸກຍາກຂາດເຂີນ ຍ້ອນການຜະລິດອີງໃສ່ ທຳມະຊາດເປັນຕົ້ນຕໍ. ມາຮອດປີ 2022 ໄດ້ຮັບການຊຸກຍູ້ຊ່ວຍເຫລືອສົ່ງເສີມ ຈາກອົງການແຄຣນາໆຊາດ ປະຈໍາລາວ ກໍຄື ໂຄງການສ້າງຄວາມເຂັ້ມແຂງແກ່ແມ່ຍິງຊົນເຜົ່າ ເພື່ອປັບໂຕເຂົ້າກັບ ການປ່ຽນແປງ ຂອງສະພາບດິນຟ້າອາກາດ ແບບຍືນຍົງ (WECR) ທີ່ໄດ້ຊ່ວຍເຫລືອປະຊາຊົນບ້ານກຸງເກືອຍ ດ້ວຍການສົ່ງເສີມເຕັກນິກການຜະລິດ, ວັດຖຸອຸກອນ, ເມັດພັນ ແລະ ອື່ນໆ ບວກກັບຄອບຄົວມີພື້ນທີ່ ທີ່ເໝາະສົມ ແລະ ບໍ່ກະທົບຕໍ່ສະພາບແວດລ້ອມອ້ອມຂ້າງ. ດັ່ງນັ້ນທາງຄອບຄົວ ຈຶ່ງໄດ້ຫັນປ່ຽນຈາກ ການຖາງປ່າເຮັດໄຮ່ແບບເລື່ອນລອຍ ມາຜະລິດກະສິກໍາແບບປະສົມ ເປັນອາຊີບຫລັກ ເປັນຕົ້ນ ປູກຜັກບົ່ວ, ຜັກກາດ, ລ້ຽງໝູ, ລ້ຽງໄກ່ ແລະ ລ້ຽງປາ, ສ່ວນລາຄາຜັກແມ່ນອີງຕາມລະດູການ ເຊັ່ນ: ຜັກບົ່ວ ແລະ ຫອມປ້ອມ 10.000 ກີບຕໍ່ກິໂລ, ຜັກກາດ 5.000 ກີບຕໍ່ກິໂລ. ໃນໄລຍະລະດູຝົນ ຜັກບົ່ວ ແລະ ຫອມປ້ອມລາຄາຈະສູງເຖິງ 40.000 ກີບຕໍ່ກິໂລ, ຜັກກາດ 8.000 ກີບຕໍ່ກິໂລ. ການຂາຍຜົນຜະລິດແມ່ນ ເປັນທີ່ໜ້າເພິ່ງພໍໃຈສົມຄວນ ສາມາດສ້າງລາຍຮັບເຂົ້າຄອບຄົວ, ມີລາຍໄດ້ດີ, ການຕະຫລາດກໍບໍ່ຫຍຸ້ງຍາກ ເພາະມີແມ່ຄ້າມາຊື້ຢູ່ກັບສວນ, ບາງຄັ້ງກໍໄດ້ໄປສົ່ງຕາມຮ້ານອາຫານ ແລະ ຕະຫລາດ ໃກ້ບ້ານສະເລ່ຍແລ້ວ ສາມາດສ້າງລາຍຮັບໄດ້ 30-36 ລ້ານກີບຕໍ່ປີ.
ທ່ານ ນາງ ຮັກ ສີວິໄລ ໃຫ້ຮູ້ຕື່ມວ່າ: ຜ່ານການບຸກບືນສູ້ຊົນຂະຫຍັນອົດທົນ, ມາຮອດປັດຈຸບັນ ຊີວິດການເປັນຢູ່ຂອງຄອບຄົວ ໄດ້ພັດທະນາດີຂຶ້ນເປັນກ້າວໆ ແລະ ມີຄວາມໝັ້ນຄົງ ໄດ້ມີເຮືອນຢູ່ຖາວອນ 1 ຫລັງ, ມີເງິນໝູນໃຊ້ພາຍໃນຄອບຄົວ, ມີເງິນທຶນແຮໄວ້ໃຊ້ຈ່າຍໃນເວລາເຈັບເປັນ, ມີເງິນທຶນການສຶກສາ ຈຳນວນໜຶ່ງໄວ້ ໃຫ້ລູກຮຽນໜັງສື ແລະ ມີເງິນຝາກທະນາຄານຈຳນວນໜຶ່ງ. ສ່ວນແຜນການໃນຕໍ່ໜ້າ ຈະຂະຫຍາຍການຜະລິດ ເພື່ອຕອບສະໜອງຄວາມຕ້ອງການ ຂອງຕະຫລາດ ແລະ ພ້ອມຈະໃຫ້ຄໍາແນະນໍາແກ່ບຸກຄົນ ຫລື ຄອບຄົວ ທີ່ມີຄວາມສົນໃຈ ໃນການຜະລິດສິນຄ້າກະສິກໍາ ແບບຍືນຍົງນໍາອີກ ພ້ອມທັງໄດ້ສະແດງຄວາມຂອບໃຈ ມາຍັງອົງການແຄຣນາໆຊາດ ປະຈໍາ ລາວ ກໍຄື ໂຄງການ ທີ່ເຂົ້າມາຊຸກຍູ້ຊ່ວຍເຫລືອ ເຮັດໃຫ້ຄອບຄົວມີຊີວິດການເປັນຢູ່ທີ່ດີຂຶ້ນ ແລະ ມີອາຊີບທີ່ໝັ້ນຄົງສາມາດສ້າງລາຍຮັບໃຫ້ແກ່ຄອບຄົວເປັນຢ່າງດີ.
ຂ່າວ-ພາບ: ເກດສະໜາKPL
