*ແຂວງຫົວພັນ ເປັນແຂວງທີ່ມີທີ່ຕັ້ງຄວາມສໍາຄັນທາງປະຫັວດສາດ ເປັນຖີ່ນກໍາເນີດຂອງສ ປ ປ ລາວ, ເປັນແຂວງທີ່ມີທ່າແຮງດ້ານການທ່ອງທ່ຽວປະຫັວດສາດ, ທໍາມະຊາດ ແລະ ວັດທະນະທໍາເປັນຕົ້ນແມ່ນ: ປະຫັວດສາດເມືອງວຽງໄຊ, ຫີນຕັ້ງຫົວເມືອງ, ພູຜາຖີ່, ບໍ່ນໍ້າຮ້ອນເມືອງຮ້ຽມ, ນ້ໍາຕົກຕາດສະເຫຼີຍ ພ້ອມດຽວກັນສີ່ງທີ່ໂດດເດັ່ນ ແມ່ນການຕ່ໍາຫູກທໍ່ໄຫມສີໄມ້ລາຍມືອັນປານີດຂອງເອື້ອຍນ້ອງແມ່ຍິງຊາວແຂວງຫົວພັນ ນອກນີ້ຍັງມີອາຫານທີ່ເປັນເອກະລັກຂອງຕົນ, ມີວິຖີຊີວິດທີ່ດັ້ງເດີມປະຊາຊົນບັນດາເຜົ່າທີ່ມີມູນເຊື້ອໂອບເອື້ອອາລີຮັກແຂກແພງຄົນ, ນອກນີ້, ຍັງເປັນແຂວງ ທີ່ມີທີ່ຕັ້ງພູມສັນຖານທີ່ມີຫ້ວຍເລິກພູສູງ, ມີອາກາດຫນາວເຢັນ, ມີຄວາມອຸດົມສົມບູນທາງດ້ານທໍາມະຊາດ, ມີພູຜາປ່າໄມ້ຂຽວສົດງົດງາມຕະຫຼອດປີ ພ້ອມທັງຄວາມສວຍງາມຂອງດອກໄມ້ທໍາມະຊາດຕາມລະດູການຫຼາຍຊະນິດເຊັ່ນ: ດອກບານ, ດອກປີບ, ດອກແຄ, ດອກຝາງແດງ, ດອກຮ້ານ ແລະ ດອກໄມ້ຊະນິດຕ່າງໆ ເດັ່ນກ່ວາຫມູ່ແມ່ນດອກຄາຍປ່າເຊີ່ງມີຄວາມເປັນເອກະລັກສະເພາະ ແລະ ງົດງາມພິເສດເປັນສີບົວຈາງ ແລະ ສີບົວເຂັ້ມມີລັກສະນະຄ້າຍຄືດອກຊາກຸຣະດອກໄມ້ປະຈໍາຊາດຂອງຍີ່ປຸ່ນ ເຊີ່ງພົບເຫັນຫຼາຍກ່ວາຫມູ່ແມ່ນຢູ່ເມືອງຫົວເມືອງ, ເມືອງຊໍາເຫນືອ ແລະ ເມືອງອື່ນໆ.

    ທ່ານ ວົງໄຊ ຄຳແພງມີໄຊ ຫົວໜ້າຫ້ອງການ ຖວທ ເມືອງວຽງໄຊ ແຂວງຫົວພັນ ກ່າວວ່າ: ເພື່ອເປັນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ໃນທົ່ວເມືອງໃຫ້ໜັກແໜ້ນ, ເປັນການອະນຸລັກຮັກສາ, ສົ່ງເສີມສິລະປະວັດທະນະທຳ, ຮີດຄອງປະເພນີອັນດີງາມ ຂອງເຜົ່າ ໃຫ້ຄົງຢູ່ກັບຊາດລາວ ກໍ່ຄືແຕ່ລະເຜົ່າຕະຫຼອດໄປ. ທັງເປັນການປູກຈິດສໍານຶກໃຫ້ແກ່ຄົນຮຸ້ນລຸກ, ຮຸ້ນຫຼານໃຫ້ຜູ້ເກີດໃໝ່ໃຫຍ່ລຸນຮັບຮູ້ເຂົ້າໃຈ ແລະ ພ້ອມກັນສືບທອດມໍລະດົກອັນລໍ້າຄ່າຂອງເຜົ່າຕົນສືບຕໍ່ໆກັນໄປ ແລະ ເພື່ອເຜີຍແຜ່ວັດທະນະທຳພື້ນບ້ານຂອງເມືອງວຽງໄຊ ພ້ອມທັງດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວຢ້ຽມຢາມເມືອງວຽງໄຊໃຫ້ຫຼາຍຂຶ້ນ.

   ການນຳເມືອງໄດ້ສົມທົບກັບພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງ ແລະ ຫົວໜ່ວຍທຸລະກິດ ຈະຈັດງານບຸນປະເພນີຊົນເຜົ່າ ແລະ ເທດສະການດອກຊາກຸຣະຂຶ້ນລະຫວ່າງວັນທີ 20–22 ທັນວາ 2024  ຢູ່ເດີ່ນສະໜາມຫຼວງເມືອງວຽງໄຊ. ພາຍໃນງານຄັ້ງນີ້ຈະຈັດຫຼາຍຫຼາຍກິດຈະກຳ ເປັນຕົ້ນແມ່ນກິດຈະກຳ ຍ່າງເພື່ອສຸຂະພາບທ່ຽວຊົມດອກຊາກຸຣະ, ທ່ຽວຊົມທັດສະນິຍະພາບ ເມືອງວຽງໄຊ, ທ່ຽວຊົມບັນດາຖ້ຳທ່ານຜູ້ນຳ, ກິດຈະກຳກິລາ-ວັນນະຄະດີ, ເທດສະການຊີມອາຫານ 5 ເຜົ່າ ແລະ ງານຕະຫຼາດນັດສິນຄ້າພື້ນ ເມືອງ-ສິນຄ້າອຸດສາຫະກຳຕື່ມອີກ.

    ໃນໄລຍະຜ່ານມາ ກໍ່ຄືປະຈຸບັນອຳນາດການປົກຄອງແຂວງຫົວພັນ ໄດ້ສຸມໃສ່ການພັດທະນາເທດສະບານຕົວເມືອງຊໍາເຫນືອ ມີຄວາມສວຍສົດງົດງາມ, ເປັນຕົວເມືອງສີຂຽວແບບທໍາມະຊາດ ຄຽງຄູ່ກັບການພັດທະນາບັນດາເມືອງຕ່າງໆພາຍໃນແຂວງ; ໃນປີ 2008 ທາງແຂວງໄດ້ເລີ້ມປູກດອກຄາຍປ່າ ຫຼື ເອີ້ນວ່າ: “ດອກພັນພະນາ” ປູກເປັນຕົ້ນໄມ້ປະດັບພາຍໃນເທດສະບານຕົວເມືອງຊໍາເຫນືອຈໍານວນ 400 ຕົ້ນ ແລະ ໃນປີ 2010 ກໍ່ໄດ້ມີການປູກເພີ່ມຕາມເສັ້ນທາງເລກ 6 ແຕ່ພູເລົ້າ ຫາ ເທດສະບານຕົວເມືອງຊໍາເຫນືອ-ວຽງໄຊ ແລະ ລຽບຕາມເສັ້ນທາງສະຫນາມບິນ ຫນອງຄ້າງ ແລະ ບ່ອນອື່ນໆທີ່ມີເງື່ອນໄຂ.

   ມາຮອດປັດຈຸບັນທົ່ວແຂວງຫົວພັນ ໄດ້ປູກດອກຄາຍປ່າທັງຫມົດຈໍານວນ 160.552 ຕົ້ນ, ຄາດຄະເນ 2023-2025 ຈະປູກເພີ່ມຕື່ມຕາມຈຸດຕ່າງໆໃນ 10 ເມືອງພາຍໃນແຂວງ; ປັດຈຸບັນຕົ້ນດອກຄາຍປ່າ ແລະ ຕົ້ນດອກຊາກຸຣະຈໍານວນຫນື່ງ ໄດ້ອອກດອກເບັ່ງບານສວຍງາມເປັນທີ່ປະທັບໃຈ ແລະ ດຶງດູດແຂກຄົນໃຫ້ເຂົ້າມາຢ້ຽມຢາມ ແລະ ທ່ຽວຊົມເຮັດໃຫ້ກະແສຈາກການທ່ອງທ່ຽວຕ່າງແດນ ມາເປັນການທ່ອງທ່ຽວພາຍໃນຫຼາຍຂື້ນ.