*ສວນພຶກສາສາດເຂດຮ້ອນສິບສອງພັນນາ (Xishuangbanna Tropical Botanical Garden) ແຂວງຢຸນນານ ສປຈີນ ຂຶ້ນກັບສະຖາບັນວິທະຍາສາດຈີນໄດ້ຮັບການສ້າງຕັ້ງຂຶ້ນ ໂດຍອະດີດນັກພຶກສາສາດທີ່ມີຊື່ສຽງຂອງຈີນ ຊື່ທ່ານຈ້າຍ ສີທາວ (CaiXitao) ໃນປີ 1959 ເພື່ອສົ່ງເສີມການອະນຸລັກທີ່ມີປະສິດທິພາບ, ການພັດທະນາແບບຍືນຍົງ ແລະ ນຳໃຊ້ຊັບພະຍາກອນຊີວະຊາດຢ່າງຮູ້ຄຸນຄ່າ, ມີເນື້ອທີ່ ທັງໝົດ1.125 ເຮັກຕາ ເປັນສວນພຶກສາເຂດຮ້ອນທີ່ໃຫຍ່ທີ່ສຸດຂອງສປຈີນ; ສ່ວນເນືື້ອທີ່ທີ່ສະຫງວນໄວ້ເປັນເຂດປ່າຝົນເຂດຮ້ອນຢ່າງດຽວນັ້ນ ກວມເອົາເນື້ອທີ່ 250 ເຮັກຕາ.  

ສວນຕົ້ນປາມ 

ເປັນໂອກາດອັນດີທີ່ຜູ້ຂຽນໄດ້ມີໂອກາດໄປສຳຜັດບັນຍາກາດ, ໄດ້ທ່ຽວຊົມສວນພຶກສາເຂດຮ້ອນສິບສອງພັນນາ ແຫລ່ງທ່ອງທ່ຽວທີ່ໃຫຍ່ທີ່ສຸດຂອງແຂວງຢຸນນານ. ພໍແຕ່ກ້າວຂາເຂົ້າໃນເຂດສວນດັ່ງກ່າວຂ້າພະເຈົ້າກໍຮູ້ສຶກໄດ້ເຖິງຄວາມສົດຊື່ນ, ປອດໂປ່ງ, ເຢັນສະບາຍ ທ່າມກາງຄວາມງົດງາມຂອງທຳມະຊາດທີ່ມີພືດພັນນາໆຊະນິດ, ຕົ້ນໄມ້ໃບຫຍ້າຂຽວອຸ່ມທຸ່ມງາມຕາ, ດອກໄມ້ຫລາກຫລາຍຊະນິດພວມເບັ່ງບານ ເຫັນແລ້ວເປັນຕາອອນຊອນ, ປະທັບໃຈໃນຄວາມງົດງາມຂອງທຳມະຊາດທີ່ຫາອັນປຽບບໍ່ໄດ້ ໂດຍສະເພາະຕົ້ນໄມ້ໃຫຍ່ທີ່ອະນຸລັກໄວ້ຈຳນວນຫລວງຫລາຍ ເຊິ່ງຕົ້ນໄມ້ເຫລົ່ານັ້ນໄດ້ກາຍເປັນຮົ່ມເຢັນໃຫ້ແກ່ນັກທ່ອງທ່ຽວຊົ້ນຮົ່ມຊົ້ນເງົາ, ເຮັດກິດຈະກຳຕ່າງໆ.

    ສວນແຫ່ງນີ້ຂຶ້ນຊື່ທາງດ້ານການອະນຸລັກຊີວະນາໆພັນ ມີພືດພັນທີ່ຫາເບິ່ງໄດ້ຍາກເຊັ່ນ: ຕົ້ນໄຜ່ຍັກທີ່ປະຊາຊົນສິບສອງພັນນາມັກນຳມາເຮັດເຮືອນ ແລະ ເຄື່ອງໃຊ້ສອຍປະຈຳວັນຕ່າງໆ, ລວມເຖິງລາຊາບົວ(Victoria amazonica) ທີ່ໃບຂອງມັນສາມາດໃຫ້ຄົນນ້ຳໜັກບໍ່ເກີນ 45 ກິໂລກຣາມ ຢືນຢູ່ເທິງໄດ້, ສ່ວນຕົ້ນປາມ ທີ່ເປັນບ່ອນລວບລວມຕົ້ນປາມເຂດຮ້ອນຫລາຍຮ້ອຍຊະນິດ ແລະ ຫຍ້າເຕັ້ນລຳ (dancing grass) ເຊິ່ງໃບຂອງມັນຈະເໜັງຕີງໄປມາຄ່ອຍໆເມື່ອມີການບັນເລງສຽງເພງ ຫລື ສຽງດົນຕີສຽງສູງ ຫລື ສຽງແຫລມ.  

ນັກທ່ອງທ່ຽວພາກັນຖ່າຍພາບທີ່ຕົນແຕ້ມ ເຊິ່ງເປັນຮູບຂອງດອກໄມ້ທີ່ຢູ່ທາງຂ້າງຂອງເຂົາເຈົ້າ

  ໃນເຂດບໍລິເວນສວນ, ສິ່ງທີ່ພິເສດອີກຢ່າງໜຶ່ງ ແມ່ນມັກຈະມີຜູ້ອາຍຸສູງ ລວມຕົວກັນເປັນກຸ່ມນັ່ງແຕ້ມຮູບຕາມເດີ່ນຫຍ້າຕາມກ້ອງຮົ່ມໄມ້ ເຊິ່ງສະຖານທີ່ແຫ່ງນີ້ນອກຈາກຈະເປັນບ່ອນພັກຜ່ອນຢ່ອນໃຈທີ່ມີຊື່ສຽງແລ້ວ ຍັງເປັນສະຖານທີ່ສຳລັບການຄົ້ນຄວ້າທາງດ້ານວິທະຍາສາດ, ການອະນຸລັກຊີວະນາໆພັນ, ການພັດທະນາທາງວິທະຍາສາດ ແລະ ເຕັກໂນໂລຊີອີກດ້ວຍ ເພາະສະຖານທີ່ດັ່ງກ່າວສາມາດອະນຸລັກພືດຕ່າງໆຫລາຍກວ່າ 13.000 ຊະນິດ ເຮັດໃຫ້ສວນພຶກສາແຫ່ງນີ້ ເປັນອີກໜຶ່ງໃນບັນດາສວນພຶກສາທີ່ມີຄວາມຫລາກຫລາຍທີ່ສຸດທາງດ້ານຊີວະນານາພັນຂອງໂລກ.

ລາຊາບົວ  

ນອກຈາກຈະເປັນບ່ອນທ່ອງທ່ຽວສຶກສາທາງທຳມະຊາດທີ່ອຸດົມສົມບູນແລ້ວ, ສວນພຶກສາເຂດຮ້ອນສິບສອງພັນນາ ຍັງເປີດຫລັກສູດການຮຽນການສອນລະດັບປະລິນຍາໂທ ແລະ ເອກ ໃນວິຊານິເວດວິທະຍາ ແລະ ວິທະຍາສາດພືດ ແລະ ປະລິນຍາໂທ ໃນສາຂາ ວິສະວະກຳຊີວະວິທະຍານຳອີກ. 

   ຖ້າຫາກວ່າບັນດາທ່ານໄດ້ໄປເມືອງສິບສອງພັນນາແຂວງຢຸນນານ ສປ ຈີນ ຢ່າລືມໄປທ່ຽວຊົມສວນພຶກສາເຂດຮ້ອນສິບສອງພັນນາ ເພາະສວນແຫ່ງນີ້ຂຶ້ນຊື່ທາງດ້ານການອະນຸລັກຊີວະນານາພັນ ມີພືດພັນທີ່ຫາເບິ່ງໄດ້ຍາກເປັນຈຳນວນຫລວງຫລາຍ.

ໂດຍ: ແສງທອງ ພະສະຫວັດ

KPL