ຂປລ
ທ່ານ ສົມສະຫວາດ ນາມອິນທາ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຫຼວງນໍ້າທາ ໄດ້ໃຫ້ຮູ້ກ່ຽວກັບຜົນສໍາເລັດການຈັດກິດຈະກໍາປີທ່ອງທ່ຽວລາວ 2024.
*ທ່ານ ສົມສະຫວາດ ນາມອິນທາ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຫຼວງນໍ້າທາ ໄດ້ໃຫ້ຮູ້ກ່ຽວກັບຜົນສໍາເລັດການຈັດກິດຈະກໍາປີທ່ອງທ່ຽວລາວ 2024 ເມື່ອບໍ່ດົນມານີ້ວ່າ: ການຈັດກິດຈະກໍາດັ່ງກ່າວ ນອກຈາກຈະເປັນການສົ່ງເສີມການທ່ອງທ່ຽວ, ການປົກປັກຮັກສາທໍາມະຊາດ, ອະນຸລັກສົ່ງເສີມວັດທະນະທຳ ແລະ ຮີດຄອງປະເພນີອັນດີງາມຂອງປະຊາຊົນບັນດາເຜົ່າ, ຍັງເປັນການສ້າງບັນຍາກາດ ທີ່ເອື້ອອໍານວຍໃຫ້ແກ່ການໄປມາຫາສູ່, ແລກປ່ຽນ ແລະ ຈໍາໜ່າຍສິນຄ້າ ທີ່ເປັນຜະລິດຕະພັນພາຍໃນທ້ອງຖິ່ນ, ເພື່ອຊຸກຍູ້ການພັດທະນາເສດຖະກິດຂອງແຂວງ ແລະ ສ້າງລາຍຮັບທັງທາງກົງ ແລະ ທາງອ້ອມ ໃຫ້ແກ່ສັງຄົມ.
ຄຽງຄູ່ກັນນັ້ນຍັງເປັນການຊຸກຍູ້ໃນການຜະລິດ ຕະພັນທ່ອງທ່ຽວໃຫ້ມີຄວາມຫຼາກຫຼາຍ, ຍົກລະດັບຄຸນນະພາບການບໍລິການ, ໂຄສະນາເຜີຍແຜ່ຂໍ້ມູນຂ່າວສານເຂົ້າເຖິງກຸ່ມຕະຫລາດເປົ້າໝາຍ, ເຊື່ອມໂຍງກັບບັນດາເມືອງ, ແຂວງ ແລະ ປະເທດໃກ້ຄຽງ; ເພື່ອສົ່ງເສີມກິດຈະກຳບຸນປະເພນີ, ເທດສະການ, ນິທັດສະການຕ່າງໆ ຢູ່ຂັ້ນແຂວງ, ເມືອງ, ບ້ານ ເເລະ ການມີສ່ວນຮ່ວມຂອງທຸກພາກສ່ວນ ແລະ ເປັນການສົ່ງເສີມການທ່ອງທ່ຽວພາຍໃນ ແລະ ດຶງດູດນັກທ່ອງທ່ຽວສາກົນ ໂດຍສະເພາະນັກທ່ອງທ່ຽວ ສປ ຈີນ ເຂົ້າມາທ່ຽວຢູ່ແຂວງຫລວງນໍ້າທາ ນັບມື້ນັບຫລາຍຂື້ນ ເເນໃສ່ສ້າງວຽກເຮັດງານທຳໃຫ້ເເກ່ສັງຄົມ ເເລະ ສ້າງລາຍຮັບເງິນຕາເຂົ້າສູ່ປະເທດ ກໍຄືແຂວງຫຼວງນໍ້າທາ. ນອກຈາກ, ຈະເປັນການຊຸກຍູ້ສົ່ງເສີມງານບຸນປະເພນີແລ້ວ ຍັງໄດ້ສົ່ງເສີມການພັດທະນາໂຄ່ງລ່າງພື້ນຖານຂະໜາດນ້ອຍຢູ່ສະຖານທີ່ທ່ອງທ່ຽວ, ສົ່ງເສີມການຕະຫລາດການທ່ອງທ່ຽວ ແລະ ຍົກລະດັບຄຸນນະພາບການບໍລິການຂອງທຸລະກິດທ່ອງທ່ຽວ.
ພິທີເປີດປີທ່ອງທ່ຽວລາວ 2024 ຂອງແຂວງຫຼວງນໍ້າທາ ຢ່າງເປັນທາງການ ໄດ້ຈັດຂຶ້ນ ໃນວັນທີ 26 ທັນວາ 2023 ທີ່ຜ່ານມາ ຮ່ວມກັບງານບຸນນະມັດສະການພະທາດຫລວງນໍ້າທາ. ຊຶ່ງກິດຈະກໍາປີທ່ອງທ່ຽວລາວ 2024 ຂອງແຂວງ ລວມທັງໝົດມີ 15 ກິດຈະກໍາ; ໃນນີ້ກິດຈະກຳລະດັບຊາດມີ 1 ກິດຈະກໍາ, ລະດັບແຂວງ 5 ກິດຈະກໍາ ແລະ ລະດັບເມືອງ 9 ກິດຈະກໍາ ຊຶ່ງກິດຈະກໍາລະດັບຊາດ ກໍຄືບຸນນະມັດສະການ ແລະ ປະກາດຮັບຮອງພະທາດຫຼວງຈຽງຕຶງ ເປັນມໍລະດົກແຫ່ງຊາດ ຊຶ່ງໄດ້ຈັດຂຶ້ນໃນລະຫວ່າງວັນທີ 9-15 ພະຈິກ 2024 ຜ່ານມານີ້; ຢູ່ເມືອງຫລວງນໍ້າທາ ມີ 5 ກິດຈະກໍາ ເຊັ່ນ: ງານບຸນເຜົ່າໄຕດໍາ ເຂດບ້ານທົ່ງດີ, ເທດສະການດົນຕີນໍ້າທາ, ງານບຸນນະມັດ ສະການພະທາດປຸມປຸກ, ງານບຸນຊ່ວງເຮືອປະຈໍາປີ 2024 ແລະ ບຸນນະມັດສະການພະທາດຫຼວງນໍ້າທາ ປີ 2024; ແລະ ເມືອງສິງ ມີ 3 ກິດຈະກໍາ, ນອກຈາກກິດຈະກໍາລະດັບຊາດແລ້ວ, ມີບຸນປາງເມືອງທົ່ວເມືອງສິງ ແລະ ງານບຸນບັ້ງໄຟ ຫຼື ບຸນປອຍເຜົ່າໄຕ໋ລື້; ເມືອງວຽງພູຄາມີ 2 ກິດຈະກໍາ ຄື: ບຸນກິນຈຽງເຜົ່າຢັ້ງ ແລະ ບຸນຊວງເຮືອປະຈໍາປີ 2024; ເມືອງລອງ ມີ 2 ກິດຈະກໍາ ຄື: ງານບຸນປາງເມືອງທົ່ວເມືອງລອງ ແລະ ບຸນກິນຈຽງ ເຜົ່າອາຄາທົ່ວເມືອງລອງ; ເມືອງນາແລມີ 2 ກິດຈະກໍາ ຄື: ງານບຸນຊວງເຮືອປະຈໍາປີ 2024 ແລະ ງານບຸນເກຼິ ຫຼື ບຸນປົດນຶມເມືອງນາແລ ແລະ ເຂດພັດທະນາເສດຖະກິດພິເສດບໍ່ເຕ່ນແດນງາມ ມີ 1 ກິດຈະກໍາ ຄື: ບຸນປີ ໃໝ່ລາວ ພສ 2566 ແລະ ໄດ້ໂຈະ 1 ກິດຈະກໍາ ຄື: ງານບຸນຊວງເຮືອປະຈໍາປີ 2024 ເມືອງຫຼວງນໍ້າທາ ເນື່ອງຈາກເມືອງໄດ້ຮັບຜົນກະທົບຕໍ່ອຸທົກກະໄພນໍ້າຖ້ວມ ຄັ້ງວັນທີ 9 ກັນຍາ 2024.
ສ່ວນກິດຈະກໍາໃຫຍ່ອີກອັນໜຶ່ງ ແມ່ນເທດສະການດົນຕີນໍ້າທາ ຈັດໂດຍ ບໍລິສັດນໍ້າດີພັດທະນາຈໍາກັດຜູ້ດຽວ ຮ່ວມກັບຄະນະຮັບຜິດຊອບປີທ່ອງທ່ຽວລາວ 2024, ນອກຈາກເທດສະການດົນຕີລະຫວ່າງປະເທດ (ລາວ-ໄທ) ແລ້ວ, ຍັງມີກິດຈະກໍາແລກປ່ຽນດ້ານວັດທະນະທໍາ (ລາວ, ຈີນ ແລະ ໄທ), ການແຂ່ງຂັນກິລາເຕະບານມິດຕະພາບ (ລາວ, ຈີນ ແລະ ໄທ), ແລ່ນຮາບມາລາທອນ, ແຂ່ງຂັນຂີ່ລົດຖີບ ພາກເໜືອຂອງລາວ, ກິລາກະຕໍ້ຫວາຍ (ພາຍໃນເມືອງ-ແຂວງ) ແລະ ກິດຈະກໍາປິດອ້ອມ ເຊັ່ນ: ການສະແດງພາລາມໍເຕີ, ງານຕະຫຼາດນັດ ແລະ ອື່ນໆ. ຈັດຂຶ້ນໃນລະຫວ່າງວັນທີ 18-24 ກຸມພາ 2024 ທີ່ທົ່ງນາບ້ານນໍ້າດີ, ເມືອງ ແລະ ແຂວງຫຼວງນໍ້າທາ.
ສະນັ້ນ, ຕະຫລອດປີ 2024 ເຮັດໃຫ້ແຂວງຫຼວງນໍ້າທາ ມີຫລາກຫລາຍກິດຈະກໍາ ທັງເປັນການໂຄສະນາທ່າແຮງດ້ານການທ່ອງທ່ຽວຂອງແຂວງ ເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວຢູ່ຫລວງນໍ້າທາ ນັບມື້ເພີ່ມຂຶ້ນ. ສະເພາະແຕ່ເດືອນມັງກອນ - ເດືອນພະຈິກ ປີ 2024 ນີ້ ມີນັກທ່ອງທ່ຽວເຂົ້າມາຜ່ານ ແລະ ທ່ອງທ່ຽວຢູ່ແຂວງ 1,1 ລ້ານກວ່າເທື່ອຄົນ, ສ້າງລາຍຮັບທາງກົງ-ທາງອ້ອມເຂົ້າແຂວງໄດ້ເກືອບ 37 ລ້ານກວ່າໂດລາ. ນັ້ນແມ່ນສະແດງໃຫ້ເຫັນເຖິງການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ເວົ້າລວມແຫ່ງຊາດ ເວົ້າສະເພາະພາຍໃນແຂວງຫລວງນໍ້າທາ. ເຮັດໃຫ້ເກີດມີການສ້າງວຽກເຮັດງານທຳໃຫ້ແກ່ປະຊາຊົນບັນດາເຜົ່າ ໃນດ້ານການບໍລິການ, ການຜະລິດກະສິກຳ ແລະ ຫັດຖະກຳເປັນສີນຄ້າ ໂດຍເປັນການສົ່ງອອກກັບທີ່ ແລະ ກະຈາຍລາຍໄດ້ໄປສູ່ທ້ອງຖີ່ນ, ເຂດຊົນນະບົດຫ່າງໄກສອກຫລີກ ທັງເປັນການເປີດກວ້າງການພົວພັນຮ່ວມມືກັບຕ່າງປະເທດອິກດ້ວຍ. ເຖິງວ່າກິດຈະກໍາປີທ່ອງທ່ຽວລາວ 2024 ແຂວງຫລວງນໍ້າທາ ໄດ້ສິ້ນສຸດລົງ ແລະ ໄດ້ຮັບໝາກຜົນຕາມລະດັບຄາດໝາຍ ແຕ່ການສົ່ງເສີມກິດຈະກໍາ ເພື່ອສົ່ງເສີມການທ່ອງທ່ຽວໃນຕໍ່ໜ້າຂອງແຂວງ ຍັງຄົງສືບຕໍ່ຢ່າງຕໍ່ເນື່ອງ ແລະ ໃຫ້ມີບັນຍາກາດຟົດຟື້ນ ແນໃສ່ຊຸກຍູ້ການພັດທະນາ ແລະ ສົ່ງເສີມການທ່ອງທ່ຽວພາຍໃນແຂວງ ໃຫ້ມີບາດກ້າວຂະຫຍາຍຕົວທີ່ແຂງແຮງກວ່າເກົ່າ. ຄາດຄະເນວ່າໃນປີ 2025 ຈະມີນັກທ່ອງທ່ຽວເຂົ້າມາຜ່ານ ແລະ ທ່ອງທ່ຽວຢູ່ແຂວງ 1,5 ລ້ານເທື່ອຄົນ, ສ້າງລາຍຮັບໄດ້ 65 ລ້ານກວ່າໂດລາ. ຮອດປີ 2030 ແຂວງຫລວງນໍ້າທາ ຈະມີແຫຼ່ງທ່ອງທ່ຽວທາງດ້ານວັດທະນະທໍາ, ທໍາມະຊາດ ແລະ ປະຫວັດສາດ ທີ່ໄດ້ມາດຕະຖານລະດັບພາກພື້ນ ແລະ ສາກົນ ຫລາຍກວ່າ 5 ແຫ່ງ ເພື່ອຮອງຮັບນັກທ່ອງທ່ຽວ ສປ ຈີນ ແລະ ທົ່ວໂລກ ທີ່ມີທ່າອ່ຽງເພີ່ມຂຶ້ນເລື້ອຍໆ.
ຂໍ້ມູນ: ຖວທ ຫລວງນໍ້າທາ
KPL
