ຂປລ
ຂປລ. ໃນວາລະກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 29 ພະຈິກ 2024 ນີ້, ທ່ານ ຄໍາໄຫລ ສີປະເສີດ ຮອງປະທານສູນກາງແນວລາວສ້າງຊາດ ໄດ້ຕາງໜ້າສະຫະພັນນັກຮົບເກົ່າແຫ່ງຊາດລາວ ແລະ ອົງການຈັດຕັ້ງມະຫາຊົນຂັ້ນສູນກາງ ໄດ້ນຳເອົາຄຳເຫັນ, ຄຳສະເໜີຂອງປະຊາຊົນ ຢູ່ທ້ອງຖິ່ນຮາກຖານ ໃນຂອບເຂດທົ່ວປະເທດ ສະເໜີໃຫ້ສະພາແຫ່ງຊາດ ສືບຕໍ່ແກ້ໄຂບາງບັນຫາທີ່ຍັງຄົງຄ້າງ
ຂປລ. ໃນວາລະກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 29 ພະຈິກ 2024 ນີ້, ທ່ານ ຄໍາໄຫລ ສີປະເສີດ ຮອງປະທານສູນກາງແນວລາວສ້າງຊາດ ໄດ້ຕາງໜ້າສະຫະພັນນັກຮົບເກົ່າແຫ່ງຊາດລາວ ແລະ ອົງການຈັດຕັ້ງມະຫາຊົນຂັ້ນສູນກາງ ໄດ້ນຳເອົາຄຳເຫັນ, ຄຳສະເໜີຂອງປະຊາຊົນ ຢູ່ທ້ອງຖິ່ນຮາກຖານ ໃນຂອບເຂດທົ່ວປະເທດ ສະເໜີໃຫ້ສະພາແຫ່ງຊາດ ສືບຕໍ່ແກ້ໄຂບາງບັນຫາທີ່ຍັງຄົງຄ້າງ ເຊັ່ນ: ແກ້ໄຂຄວາມຫຍຸ້ງຍາກທາງດ້ານ ເສດຖະກິດ-ການເງິນ-ເງິນຕາ ໂດຍສະເໜີເພີ່ມທະວີຄວາມເຂັ້ມງວດ ແລະ ນໍາໃຊ້ເຄື່ອງມືທັນສະໄໝ ໃນການຈັດເກັບລາຍຮັບ-ຄຸ້ມຄອງລາຍຈ່າຍ ໃຫ້ມີບາດກ້າວດີຂຶ້ນ; ຕິດຕາມກວດກາວຽກງານ ການສຶກສາ ຂອງພາກລັດ ແລະ ເອກະຊົນ ໄປຕາມທິດຫັນສູ່ດ້ານຄຸນນະພາບ ການຮຽນ-ການສອນ ແລະ ການຝຶກອົບຮົມຄູທາງດ້ານວິຊາການ ແລະ ດ້ານການເມືອງ, ຍູ້ແຮງວຽກງານຊ່ວຍໜູນ, ນະໂຍບາຍຕໍ່ຖັນແຖວຄູອາຈານ ໃນເວລາທີ່ຫຍຸ້ງຍາກໃຫ້ດີກວ່າເກົ່າ; ຕິດຕາມກວດກາໃຫ້ເຂັ້ມແຂງ ຕໍ່ການຍົກສູງຄຸນນະພາບ ການບໍລິການສາທາລະນະສຸກ ຕິດພັນກັບຈັນຍາບັນ, ຈັນຍາທຳ ແລະ ນ້ຳໃຈຮັບໃຊ້ປະຊາຊົນຂອງແພດໝໍ, ຮັບປະກັນການປິ່ນປົວບໍ່ພຽງແຕ່ປະຊາຊົນລາວ ຫາກຍັງຕ້ອງຮັບຮອງນັກທ່ອງທ່ຽວຕ່າງປະເທດຕື່ມ.
ທ່ານ ຄໍາໄຫລ ສີປະເສີດ ໄດ້ກ່າວອີກວ່າ: ໃນໄລຍະຜ່ານມາ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ເຖິງວ່າລັດຖະບານ ໄດ້ວາງຫລາຍມາດຕະການ ເຮັດໃຫ້ຄ່າເງິນກີບແຂງຄ່າຂຶ້ນ ທຽບກັບເງິນຕາຕ່າງປະເທດ, ແຕ່ໃນສະພາບຄວາມເປັນຈິງ ລາຄາສິນຄ້າຍັງ ສູງຄືເກົ່າ ສົ່ງຜົນກະທົບຕໍ່ຊີວິດການເປັນຢູ່ ຂອງພະນັກງານ-ລັດຖະກອນທີ່ມີລາຍໄດ້ຕໍ່າ; ການປະຕິບັດສັນຍາສຳປະທານ ຕ້ອງເຂັ້ມງວດກວ່າເກົ່າ, ການລາຍງານຂໍ້ມູນການຂຸດຄົ້ນແຮ່ ຕ້ອງຊັດເຈນ, ຊຸກຍູ້ໃຫ້ມີການລົງທຶນປຸງແຕ່ງ ກ່ອນການສົ່ງອອກ, ການຄວບຄຸມນໍ້າໜັກລົດບັນທຸກແຮ່ ທີ່ພາໃຫ້ເກີດ ຄວາມເສຍຫາຍ ໃຫ້ແກ່ເສັ້ນທາງຄົມມະນາຄົມ; ກວດກາຄືນການປະສານສົມທົບ ລະຫວ່າງ ພາກສ່ວນທີ່ກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ ກ່ຽວກັບການລົງທຶນ ດ້ານກະສິກຳ ຕ້ອງຮັບປະກັນເຮັດໃຫ້ປະຊາຊົນ ມີສ່ວນຮ່ວມ ເພື່ອສະກັດກັ້ນການບຸກລຸກປ່າສະຫງວນ.
ພ້ອມນີ້, ຍັງສະເໜີຄະນະສະມາຊິກສະພາແຫ່ງຊາດ ວາງແຜນລົງພົບປະຜູ້ມີສິດເລືອກຕັ້ງໃຫ້ທົ່ວເຖິງ ໂດຍສະເພາະ ເຂດຫ່າງໄກສອກຫລີກ, ຊົນເຜົ່າ, ເຂດຊາຍແດນ. ໃນນັ້ນ, ຄວນປະສານສົມທົບອົງການປົກຄອງທ້ອງຖິ່ນ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ເພື່ອຊ່ວຍຮຽກໂຮມປະຊາຊົນ ເຂົ້າຮ່ວມຮັບຟັງ ການເຜີຍແຜ່ຜົນສຳເລັດ ຂອງກອງປະຊຸມສະພາແຫ່ງຊາດ ແລະ ສະພາປະຊາຊົນຂັ້ນແຂວງແຕ່ລະເທື່ອ; ການເຂົ້າຮ່ວມກອງປະຊຸມສະພາ ຂອງສະມາຊິກສະພາແຫ່ງຊາດ ແມ່ນມີຄວາມຕັ້ງໜ້າສູງ ແຕ່ການປະກອບຄວາມເຫັນ ແລະ ຊັກຖາມບັນຫາຕ່າງໆ ຂອງສະມາຊິກສະພາ ຈາກແຕ່ລະເຂດເລືອກຕັ້ງ ຍັງບໍ່ທົ່ວເຖິງ (ບາງທ່ານມີການປະກອບຄວາມເຫັນຫລາຍຄັ້ງ ແລະ ບາງທ່ານບໍ່ມີການປະກອບຄວາມເຫັນ).
ຂ່າວ: ກິດຕາ
ພາບ: ເກດສະໜາ
KPL
