ຂປລ
ເຄັນຍາ ໄດ້ເປີດໂຕລົດ ແທັກຊີໄຟຟ້າ ຂອງສປຈີນ ຈຳນວນ 100 ຄັນ ເພື່ອສົ່ງເສີມ ການຂົນສົ່ງ ທີ່ເປັນມິດກັບ ສິ່ງແວດລ້ອມ ພາຍໃນ ປະເທດ.
ຂປລ. ສຳນັກຂ່າວ ຊິນຮວາຂອງ ສປຈີນ, ເມື່ອບໍ່ດົນມານີ້, ເຄັນຍາ ໄດ້ເປີດໂຕລົດ ແທັກຊີໄຟຟ້າ ຂອງສປຈີນ ຈຳນວນ 100 ຄັນ ເພື່ອສົ່ງເສີມ ການຂົນສົ່ງ ທີ່ເປັນມິດກັບ ສິ່ງແວດລ້ອມ ພາຍໃນ ປະເທດ. ໂດຍ ທ່ານ ເອເດນ ດູເອລ ເຈົ້າໜ້າທີ່ ຈາກ ກະຊວງ ສິ່ງແວດລ້ອມ ການປ່ຽນແປງ ສະພາບພູມອາກາດ ແລະ ປ່າໄມ້ຂອງ ເຄັນຍາ ເປີດເຜີຍວ່າ ລົດໄຟຟ້າ ເນຕາ ວີ (Neta V) ຈະໃຫ້ບໍລິການເຊົ່າ ໃຫ້ແກ່ ກຸ່ມຄົນຂັບແທັກຊີ ໃນນະຄອນຫລວງ ໄນໂຣບີ ຊຶ່ງຖືເປັນ ຄວາມກ້າວໜ້າ ຄັ້ງສຳຄັນ ໄປສູ່ ການປະຕິວັດ ດ້ານການຂົນສົ່ງ ທ້ອງຖິ່ນ ແລະ ຖືເປັນແບບຢ່າງ ຄວາມມຸ້ງໝັ້ນ ຂອງ ເຄັນຍາ ໃນການ ປ່ຽໜແປງ ການຂົນສົ່ງ ເພື່ອໃຫ້ສອດຄ່ອງກັບ ເປົ້າໝາຍ ດ້ານສະພາບພູມອາກາດ ຂອງປະເທດ.
ໂດຍໜ່ວຍງານ ຝ່າຍຮັບຜິດຊອບ ພະລັງງານ ແລະ ນໍ້າມັນປິໂຕຣລ່ຽມ ຂອງ ເຄັນຍາ ເປີດເຜີຍວ່າ: ປັດຈຸບັນ ເຄັນຍາ ມີລົດໄຟຟ້າ ຫລາກຫລາຍ ປະເພດ ປະມານ 5.000 ຄັນ . ໃນນັ້ນ ລວມເຖິງ ຍານພາຫະນະ ແບບສອງລໍ້, ສາມລໍ້ ແລະ ລົດໂດຍສານ ສ່ວນບຸກຄົນ ແລະ ເຊິງການຄ້າ. ປັດຈຸບັນ ຂະແໜງການ ຂົນສົ່ງ ກວມເອົາ 10% ຂອງ ການປ່ອຍແກັສ ເຮືອນແກ້ວ, ຄາດວ່າ ຈະເພີ່ມຂຶ້ນເປັນ 17 % ໃນປີ 2030. ສະນັ້ນ ລົດໄຟຟ້າ ຈຶ່ງມີຄວາມສຳຄັນ ຕໍ່ການຫລຸດຜ່ອນ ມົນລະພິດ ທາງອາກາດ ໃນເຂດຕົວເມືອງ ເພື່ອໃຫ້ຄວາມສອດຄ່ອງກັບເປົ້າໝາຍ ການຫລຸດຜ່ອນ ການປ່ອຍແກັສ ເຮືອນແກ້ວ ລະດັບຊາດຂອງ ເຄັນຍາ./
KPL
