ຂປລ
ກຳປູເຈຍ ແລະ ໄທ ຢືນຢັນຮ່ວມກັນເສີມສ້າງ ມິດຕະພາບອັນຍາວນານ ແລະ ການເປັນຄູ່ຮ່ວມມື ເຊິ່ງຍຸດທະສາດ ເພື່ອຜົນປະໂຫຍດຂອງ ທັງສອງປະເທດ. ພາຍຫລັງ ທ່ານ ສົມເດັດ ມະຫາບໍວໍ ທິບໍດີ ຮຸນມະເນດ, ນາຍົກລັດຖະມົນຕີ ກຳປູເຈຍ ແລະ ທ່ານ ນາງ ແພທອງທານ ຊິນນະວັດ ນາຍົກລັດຖະມົນຕີ ໄທ ຮ່ວມກັນຢືນຢັນ ຂໍ້ຕົກລົງມາເຫັນດີ
ຂປລ.ສຳນັກຂ່າວຊິນຮວາຂອງ ສປຈີນ, ກຳປູເຈຍ ແລະ ໄທ ຢືນຢັນຮ່ວມກັນເສີມສ້າງ ມິດຕະພາບອັນຍາວນານ ແລະ ການເປັນຄູ່ຮ່ວມມື ເຊິ່ງຍຸດທະສາດ ເພື່ອຜົນປະໂຫຍດຂອງ ທັງສອງປະເທດ. ພາຍຫລັງ ທ່ານ ສົມເດັດ ມະຫາບໍວໍ ທິບໍດີ ຮຸນມະເນດ, ນາຍົກລັດຖະມົນຕີ ກຳປູເຈຍ ແລະ ທ່ານ ນາງ ແພທອງທານ ຊິນນະວັດ ນາຍົກລັດຖະມົນຕີ ໄທ ຮ່ວມກັນຢືນຢັນ ຂໍ້ຕົກລົງມາເຫັນດີ ໃນລະຫວ່າງ ການພົບປະຫາລືກັນ ນອກກອບກອງປະຊຸມສຸດຍອດ ສະມາຄົມ ປະຊາຊາດ ແຫ່ງອາຊີ ຕາເວັນອອກ ສຽງໃຕ້(ອາຊຽນ)ຢູ່ ສປປ ລາວ ເມື່ອບໍ່ດົນມານີ້ ເພື່ອແນໃສ່ ຄວາມສຳຄັນ ຂອງການແລກປ່ຽນ ຢ້ຽມຢາມ ລະດັບສູງ ເປັນປະຈຳ ແລະ ການປຶກສາຫາລື ວິທີທາງສົ່ງເສີມ ແລະ ຂະຫຍາຍຄວາມສຳພັນ ການຮ່ວມມື ທາງການເມືອງ ລະດັບ ທະວີພາຄີ, ໂດຍມີການພິຈາລະນາ ໃນກອງປະຊຸມ ລັດຖະມົນຕີຮ່ວມກັນ ແລະ ສະໜັບສະໜູນ ກະຊວງການ ຕ່າງປະເທດ ຂອງສອງປະເທດ ຕະຫລອດຈົນການ ຈັດກອງປະຊຸມຄະນະ ກຳມະທິການ ເພື່ອການຮ່ວມມື ທະວີພາຄີ ໂດຍໄວທີ່ສຸດ.
ຂະນະດຽວກັນ ຜູ້ນຳທັງສອງຝ່າຍ ຍັງມີຄວາມຍິນດີ ກັບການຄ້າ ແລະ ການແລກປ່ຽນ ທາງທຸລະກິດ ລະດັບທະວີພາຄີ ທີ່ເພີ່ມຂຶ້ນລວມເຖິງ ຂໍ້ສະຫລຸບຈາກ ກອງປະຊຸມ ລະດັບລັດຖະມົນຕີ ດ້ານການທ່ອງທ່ຽວ ຄັ້ງທີ 3 ຊຶ່ງຈັດຂຶ້ນ ຢູ່ບາງກອກ ປະເທດໄທ ເມື່ອເດືອນ ກໍລະກົດທີ່ຜ່ານມາ ແລະ ເພື່ອດຶງດູດນັກທ່ອງທ່ຽວ ມາຢ້ຽມຢາມ ທັງສອງປະເທດເພີ່ມຂຶ້ນ.ພ້ອມທັງ ດຳເນີນໂຄງການຮ່ວມມື ແລະ ການປຶກສາຫາລື ກ່ຽວກັບການອຳນວຍຄວາມສະດວກໃຫ້ແກ່ການຄ້າຂ້າມຊາຍແດນ,ການສົ່ງເສີມການທ່ອງທ່ຽວ ແລະ ສ້າງແຮງຍູ້ດັນທາງເສດ ຖະກິດເຊັ່ນ ເຂດເສດຖະກິດພິເສດ ຢູ່ບັນດາແຂວງຊາຍແດນ ເພື່ອຜົນປະໂຫຍດຮ່ວມກັນ ທັງສອງປະເທດ.ນອກນີ້ ຜູ້ນຳທັງສອງຝ່າຍ ຍັງເນັ້ນໜັກ ການຮ່ວມມື ຢ່າງແໜ້ນແຟ້ນຍິ່ງຂຶ້ນ ເພື່ອສະກັດກັ້ນ ອາດຊະຍາກຳ ຂ້າມຊາດເຊັ່ນ: ການຄ້າຢາເສບຕິດ, ການຄ້າມະນຸດ, ແລະ ການສໍ້ໂກງ ທາງອອນໄລນ໌.ແລະ ໄພຂົ່ມຂູ່ ທາງອິນເຕີເນັດ./.
KPL
