ຂປລ
ທ່ານ ທາກາຊິ ອິວາຢາ(Takeshi Iwaya), ລັດຖະມົນຕີ ການຕ່າງປະເທດ ຍີ່ປຸ່ນ ຄົນໃໝ່ ໄດ້ມີການໂອ້ລົມ ທາງໂທລະສັບ ຄັ້ງທຳອິດກັບ ທ່ານ ຫວາງອີ, ລັດຖະມົນຕີ ການຕ່າງປະເທດ ຈີນ.
ຂປລ.ວິທະຍຸ ກະຈາຍສຽງ ຫວຽດນາມ, ເມື່ອບໍ່ດົນມານີ້, ທ່ານ ທາກາຊິ ອິວາຢາ(Takeshi Iwaya), ລັດຖະມົນຕີ ການຕ່າງປະເທດ ຍີ່ປຸ່ນ ຄົນໃໝ່ ໄດ້ມີການໂອ້ລົມ ທາງໂທລະສັບ ຄັ້ງທຳອິດກັບ ທ່ານ ຫວາງອີ, ລັດຖະມົນຕີ ການຕ່າງປະເທດ ຈີນ. ໃນການໂອ້ລົມ ທາງໂທລະສັບ, ທ່ານ Takeshi Iwaya ຢັ້ງຢືນວ່າ: ລັດຖະບານ ຊຸດໃໝ່ຂອງ ຍີ່ປຸ່ນ ພ້ອມແລ້ວ ທີ່ຈະຊຸກຍູ້ຢ່າງຮອບດ້ານ ການພົວພັນ ຍຸດທະສາດ ທີ່ຕ່າງຝ່າຍ ຕ່າງມີຜົນປະໂຫຍດ ລະຫວ່າງ ຍີ່ປຸ່ນ ແລະ ສປ ຈີນ, ພ້ອມທັງໃຫ້ຄຳໝັ້ນສັນຍາ ປັບປຸງການພົວພັນ ສອງຝ່າຍ ຕາມທິດເປັນປົກກະຕິ ແລະ ມີລັກສະນະສ້າງສັນ.ພ້ອມທັງ ເນັ້ນ ໜັກວ່າ: ຍີ່ປຸ່ນ ແລະ ສປ ຈີນ ມີຄວາມຮັບຜິດຊອບ ທີ່ຍິ່ງໃຫຍ່ຕໍ່ ສັນຕິພາບ ແລະ ສະຖຽນລະພາບຢູ່ ອາຊີ ແລະ ໂລກ. ລັດຖະບານຊຸດໃໝ່ຂອງ ຍີ່ປຸ່ນ ພ້ອມແລ້ວ ທີ່ຈະຮ່ວມມືກັບ ສປ ຈີນ ເພື່ອປະກອບສ່ວນ ຫລາຍກ່ວາອີກ ເຂົ້າໃນການຊຸກຍູ້ສັນຕິພາບ ແລະ ຮັກສາສະຖຽນລະພາບ ໃນພາກພື້ນ, ກໍ່ຄື ແກ້ໄຂບັນດາສິ່ງທ້າທາຍ ທົ່ວໂລກ. ຂະນະທີ່ ທ່ານ ຫວາງອີ ລັດຖະມົນຕີການຕ່າງປະເທດ ຈີນ ໄດ້ຍົກອອກ ຢ່າງຈະແຈ້ງວ່າ: ສປ ຈີນ ຕີລາຄາສູງ ບັນດາສັນຍານ ທີ່ຕັ້ງໜ້າຈາກລັດຖະບານຊຸດໃໝ່ຂອງ ຍີ່ປຸ່ນ ແລະ ຮຽກຮ້ອງ ໃຫ້ສອງຝ່າຍ ເປີດກວ້າງການຮ່ວມມື, ຊຸກຍູ້ຢ່າງຮອບດ້ານການພົວພັນຍຸດທະສາດ ຕ່າງຝ່າຍ ຕ່າງມີຜົນປະໂຫຍດ, ເພື່ອສ້າງຕັ້ງການພົວພັນສອງຝ່າຍ ທີ່ມີລັກສະນະສ້າງສັນ ແລະ ມີສະຖຽນລະພາບ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
