ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ໂອກາດເຂົ້າຮ່ວມພິທີສະເຫລີມສະຫລອງວັນຄູແຫ່ງຊາດ ຄົບຮອບ 30 ປີ (7 ຕຸລາ 1994-7 ຕຸລາ 2024) ໃນວັນທີ 9 ຕຸລາ 2024 ຜ່ານມາ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ເນັ້ນໃຫ້ພະນັກງານ-ຄູອາຈານ ຕັ້ງໜ້າຝຶກຝົນຫລໍ່ຫລອມຕົນເອງ, ເສີມຂະຫຍາຍນໍ້າໃຈຮັກຊາດ, ຮັກບ້ານເກີດເມືອງນອນ ແລະ ຮັກໃນອາຊີບຄູ, ພ້ອມທັງເອົາໃຈໃສ່ປະຕິບັດ 3 ຂໍ້ແຂ່ງຂັນ, ປະຕິບັດຫລັກສູດການຮຽນ-ການໃຫ້ໄດ້ຕາມ 3 ລັກສະນະ 5 ຫລັກມູນ ເພື່ອເປັນໃຈກາງພັດທະນາຊັບພະຍາກອນມະນຸດໃຫ້ມີຄວາມຮູ້-ຄວາມສາມາດ, ມີປະສິດທິພາບ ແລະປະສິດທິຜົນສູງ.
   ພ້ອມນີ້, ໃຫ້ເອົາໃຈໃສ່ຜັນຂະຫຍາຍ 2 ວາລະແຫ່ງຊາດ ຂອງລັດຖະບານ ເຂົ້າໃນຂະແໜງການສຶກສາ ແລະ ກິລາ ໃຫ້ເປັນຮູບປະທຳ ໂດຍສະເພາະການແກ້ໄຂບັນຫາຢາເສບຕິດ ເພື່ອສ້າງສະຖານການສຶກສາໃຫ້ປອດຢາເສບຕິດ, ຍົກລະດັບການສະກັດກັ້ນ ແລະ ແກ້ໄຂຜົນຮ້າຍຂອງຢາເສບຕິດ; ສືບຕໍ່ຈັດຕັ້ງຜັນຂະຫຍາຍແຈ້ງການ ສະບັບເລກທີ 28/ຊກ ວ່າດ້ວຍການປຸກລະດົມນັກຮຽນ ຕາມເກນອາຍຸເຂົ້າຮຽນໃນຊັ້ນຕ່າງໆ ແລະແຈ້ງການເລກທີ 29/ຊກ ວ່າດ້ວຍການເກັບເງິນປະກອບສ່ວນ ຂອງຊຸມຊົນຕໍ່ວຽກງານການສຶກສາ ແລະກິລາ; ສ້າງຂະບວນການເປີດບັ້ນຈັດຕັ້ງປະຕິບັດ 3 ຂໍ້ແຂ່ງຂັນ ຂອງຂະແໜງການສຶກສາ ແລະ ກິລາ ໃຫ້ເຂົ້າສູ່ວຽກງານຕົວຈິງຂອງແຕ່ລະໂຮງ ຮຽນ, ປັບປຸງການຮຽນ-ການສອນໃຫ້ມີຄຸນນະພາບ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆບໍ່ໃຫ້ເກີດຂຶ້ນໃນໂຮງຮຽນຂອງຕົນ, ສ້າງສະພາບແວດລ້ອມທີ່ດີ ເພື່ອອໍານວຍຄວາມສະດວກ ແລະ ປູກຈິດສໍານຶກໃຫ້ແກ່ນັກຮຽນ ແລະ ສ້າງເງື່ອນໄຂໃຫ້ໂຮງຮຽນກ້າວສູ່ມາດຕະຖານຄຸນນະພາບ. ທັງນີ້, ກໍເພື່ອພັດທະນາວຽກງານການສຶກສາ ແລະກິລາພາຍໃນແຂວງໃຫ້ຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ມີປະສິດທິພາບສູງຂຶ້ນ.
    ພ້ອມນີ້, ທ່ານເຈົ້າແຂວງເຊກອງ ຍັງໄດ້ເນັ້ນໃຫ້ ຄະນະພັກ-ຄະນະນໍາ ກໍຄື ຜູ້ບໍລິຫານການສຶກສາ  ຕ້ອງສືບ ຕໍ່ສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານ-ຄູອາຈານ ຮັບຮູ້ເຂົ້າໃຈຢ່າງເລິກເຊິ່ງຕໍ່ແນວທາງຂອງພັກ, ແຜນນະໂຍບາຍຂອງລັດ; ສືບຕໍ່ສ້າງຂີດຄວາມສາມາດໃຫ້ຄູ ແລະ ບຸກຄະລາກອນການສຶກສາທາງດ້ານວິຊາສະເພາະ, ວິຊາການ ແລະ ການຄຸ້ມຄອງໃຫ້ໄປຕາມມາດຕະຖານ; ຍົກສູງບົດບາດ, ການມີສ່ວນຮ່ວມຂອງຄູ, ບຸກຄະລາກອນການສຶກສາ ແລະ ກິລາທີ່ເປັນເພດຍິງ ແລະ ຊົນເຜົ່າໃນກົງຈັກບໍລິຫານ ແລະ ການຄຸ້ມຄອງແຕ່ລະຂັ້ນໃຫ້ຫລາຍຂຶ້ນ; ເອົາໃຈໃສ່ປັບປຸງກົງຈັກການຈັດຕັ້ງ ຕາມທິດກະທັດຮັດ, ເຂັ້ມແຂງ, ສົມເຫດສົມຜົນ, ສາມາດເຄື່ອນໄຫວວຽກງານຢ່າງມີປະສິດທິພາບ ແລະ ປະສິດທິຜົນ; ສືບຕໍ່ບັນຈຸ, ສັບຊ້ອນ ແລະ ຈັດສັນຄູ ເພື່ອແກ້ໄຂສະພາບການຂາດແຄນຄູຢູ່ແຕ່ລະຊັ້ນ-ສາຍ ແລະ ລາຍວິຊາ ໃຫ້ສາມາດດໍາເນີນການຮຽນ-ການສອນປົກກະຕິ ແລະເອົາໃຈໃສ່ຄົ້ນຄວ້າ, ປະຕິບັດນະໂຍບາຍຄູຢ່າງສົມເຫດ, ສົມຜົນຕາມລະບຽບການ, ວາງມາດຕະການ ແລະ ວິທີການແກ້ໄຂບັນຫາຄູສອນບໍ່ປົກກະຕິໃຫ້ຂາດຕົວ ແລະ ດີຂຶ້ນ.

ຂ່າວ: ອັດສະວິນ

KPL