ຂປລ
ທ່ານ ຟານ ມິງ ຈຽນ ອຸປະທູດຊົ່ວຄາວ ສະຖານທູດແຫ່ງ ສ ສ ຫວຽດນາມ ປະຈຳ ສປປ ລາວ ໄດ້ຕີລາ ຄາການຮ່ວມມືຫວຽດນາມ-ລາວ.
*ທ່ານ ຟານ ມິງ ຈຽນ ອຸປະທູດຊົ່ວຄາວ ສະຖານທູດແຫ່ງ ສສ ຫວຽດ ນາມ ປະຈຳ ສປປ ລາວ ໄດ້ຕີລາຄາການຮ່ວມມື ຫວຽດນາມ-ລາວ ໃນໄລຍະໃໝ່ແມ່ນນັບມື້ຂະຫຍາຍຕົວໃນທຸກຂົງເຂດວຽກງານການມາຢ້ຽມຢາມ ສສ ຫວຽດນາມຂອງທ່ານເລຂາທິການໃຫຍ່,ປະທານປະເທດ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະມີຄວາມໝາຍສຳຄັນທີ່ສຸດ ແລະ ໄດ້ດຳເນີນໄປຫລັງຈາກສະຫາຍໂຕເລີມ, ປະທານປະເທດແຫ່ງ ສສ ຫວຽດນາມ ໄດ້ຮັບການໄວ້ເນື້ອເຊື່ອໃຈເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມໃນວັນທີ 03 ສິງຫາ 2024 ຜ່ານມາ ແລະ ໃນສະພາບການທີ່ສອງພັກ, ສອງລັດກຳລັງພວມຈັດຕັ້ງປະຕິບັດມະຕິກອງປະຊຸມໃຫຍ່ຂອງແຕ່ລະພັກ, ແຜນການພັດທະນາເສດຖະກິດ - ສັງຄົມຂອງ ແຕ່ລະປະເທດ ແລະ ໄດ້ບັນລຸບັນດາຜົນສຳເລັດຢ່າງດີເດັ່ນ. ນອກຈາກການປະກອບສ່ວນເຂົ້າໃນການເພີ່ມທະວີ ແລະ ຮັດແໜ້ນສາຍພົວພັນສະໜິດຕິດແໜ້ນໄວ້ເນື້ອເຊື່ອໃຈລະຫວ່າງສອງພັກ, ສອງລັດ, ການມາຢ້ຽມຢາມຍັງໄດ້ຢືນຢັນຄວາມຕັດສິນໃຈຂອງການນຳຂັ້ນສູງຂອງສອງປະເທດໃນການປົກປັກຮັກສາ,ຮັດແໜ້ນ ແລະ ພັດທະນາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ ແລະ ລາວ.
ດ້ວຍຄວາມໝາຍອັນເລິກເຊິ່ງນັ້ນ, ການຢ້ຽມຢາມແມ່ນໂອກາດເພື່ອໃຫ້ການນຳຂັ້ນສູງສຸດຂອງສອງປະເທດໄດ້ພົບປະແລກປ່ຽນປຶກສາຫາລືໂດຍກົງ, ຕີລາຄາໝາກຜົນການຮ່ວມມືໃນໄລຍະຜ່ານມາ,ແລະ ເຫັນດີເປັນເອກະພາບກ່ຽວກັບທິດທາງການຮ່ວມມືໃນບັນດາຂົງເຂດສຳຄັນຈາກການເມືອງ. ການທູດ, ປ້ອງກັນຄວາມສະຫງົບ,ການຮ່ວມມືດ້ານເສດຖະກິດ, ການສຶກສາ - ບຳລຸງສ້າງ,ວິທະຍາສາດ, ເຕັກໂນໂລຊີ ແລະ ການທ່ອງທ່ຽວ ເພື່ອຮັບໃຊ້ໃຫ້ແກ່ຂະບວນການປະດິດສ້າງ, ກໍ່ສ້າງ ແລະ ພັດທະນາຢູ່ແຕ່ລະປະເທດ. ສອງຝ່າຍກໍຈະປຶກສາຫາລືກ່ຽວກັບບັນດາບັນຫາພາກພື້ນ ແລະ ສາກົນທີ່ພວມສົນໃຈ. ຄາດວ່າເນື່ອງໃນໂອກາດການມາຢ້ຽມຢາມຄັ້ງນີ້, ສອງຝ່າຍກໍຈະລົງນາມບາງເອກະສານຮ່ວມມືທີ່ສຳຄັນຈຳນວນໜຶ່ງ. ຂ້າພະເຈົ້າເຊື່ອໝັ້ນວ່າການຢ້ຽມຢາມຄັ້ງນີ້ຈະບັນລຸຜົນສຳເລັດຢ່າງຈົບງາມ,ສະແດງໃຫ້ເຫັນຄວາມສຳຄັນແລະຄວາມໝາຍຍຸດທະສາດຂອງສາຍພົວພັນພິເສດຫວຽດນາມ - ລາວຕໍ່ຄວາມໝັ້ນຄົງແລະການພັດທະນາຂອງແຕ່ລະປະເທດ,ເພື່ອສັນຕິພາບ, ສະຖຽນລະພາບແລະການພັດທະນາຢູ່ພາກພື້ນ ແລະ ໃນໂລກ.
ພວກເຮົາສາມາດເວົ້າໄດ້ວ່າ ໃນສະພາບການໂລກ ແລະ ພາກພື້ນສືບຕໍ່ມີການຜັນແປໄປຢ່າງວ່ອງໄວ, ສັບສົນແລະບໍ່ສາມາດຄາດຄະເນໄດ້, ສົ່ງຜົນສະທ້ອນຕໍ່ທຸກປະເທດ,ໃນນັ້ນກໍມີຫວຽດນາມແລະລາວ,ເຖິງຢ່າງໃດກໍ່ຕາມ,ບັນດາເນື້ອໃນຂໍ້ຕົກລົງລະຫວ່າງສອງພັກ, ສອງລັດໄດ້ຮັບການຜັນຂະຫຍາຍ.ປະຕິບັດຢ່າງມີປະສິດທິຜົນສູງຈາກທຸກຂັ້ນ,ຂະແໜງການ,ທ້ອງຖິ່ນ,ວິສາຫະກິດຂອງສອງປະເທດ, ສືບຕໍ່ປະກອບສ່ວນເຂົ້າໃນການປັບປຸງແລະເພີ່ມທະວີການພົວພັນພິເສດຫວຽດນາມ - ລາວໃຫ້ນັບມື້ນັບພັດທະນາໃນທຸກຂົງເຂດ,ຄື: ການພົວພັນດ້ານການເມືອງນັບມື້ນັບເຂົ້າສູ່ລວງເລິກ,ສອງຝ່າຍໄດ້ປະສານສົມທົບຈັດຕັ້ງປະຕິບັດບັນດາຖະແຫລງການຮ່ວມ ແລະ ຂໍ້ຕົກລົງລະຫວ່າງການນຳຂັ້ນສູງຂອງສອງພັກ ແລະ ສອງລັດ; ສຸມໃສ່ແກ້ໄຂບັນດາຄວາມຫຍຸ້ງຍາກແລະຂໍ້ຄົງຄ້າງໃນການປະຕິບັດ, ຍົກສູງປະສິດທິຜົນຂອງບັນກົນໄກຮ່ວມມື; ຈັດຕັ້ງການຢ້ຽມຢາມ, ການພົບປະ,ກອງປະຊຸມສົນທະນາ ແລະ ສຳມະນາເພື່ອແລກປ່ຽນຂໍ້ມູນຂ່າວສານແລະແລກປ່ຽນບົດຮຽນກ່ຽວກັບການກໍ່ສ້າງພັກ, ພັດທະນາເສດຖະກິດ-ສັງຄົມ ແລະ ການເຊື່ອມໂຍງສາກົນ. ການຮ່ວມມືດ້ານປ້ອງກັນປະເທດ, ປ້ອງກັນຄວາມສະຫງົບ ແລະ ການທູດສືບຕໍ່ໄດ້ຮັບການຮັກສາແລະພັດທະນາ,ແມ່ນໜຶ່ງໃນບັນດາເສົາຄ້ຳສຳຄັນໃນການພົວພັນລະຫວ່າງສອງປະເທດ, ສອງຝ່າຍໄດ້ປະສານຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນເພື່ອຮັບປະກັນຄວາມເປັນສະຖຽນລະພາບດ້ານການເມືອງ, ຄວາມໝັ້ນຄົງແລະຄວາມເປັນລະບຽບຮຽບຮ້ອຍທາງສັງຄົມ ແລະ ຄວາມປອດໄພຢູ່ແຕ່ລະປະເທດ,ປະຕິບັດເປັນຢ່າງດີບັນດາອະນຸສັນຍາແລະແຜນການຮ່ວມມືປະຈຳປີດ້ານການປ້ອງກັນປະເທດ, ຄວາມໝັ້ນຄົງແລະການທູດ. ສອງຝ່າຍກໍໄດ້ແລກປ່ຽນເປັນປະຈຳບັນດາຂໍ້ມູນຂ່າວສານ,ແບ່ງປັນປະສົບການໃນບັນດາບັນຫາຄວາມໝັ້ນຄົງບໍ່ແບບດັ້ງເດີມ, ບັນຫາສາກົນແລະພາກພື້ນ, ສົມທົບກັນຢ່າງແໜ້ນແຟ້ນ ແລະ ໜູນຊ່ວຍເຊິ່ງກັນແລະກັນຢູ່ບັນດາເວທີຮ່ວມມືຫລາຍຝ່າຍ, ໃນນັ້ນ ກໍມີການຈັດຕັ້ງບັນດາກອງປະຊຸມໃຫຍ່ໃນປີທີ່ລາວຮັບດຳລົງຕຳແໜ່ງເປັນປະທານອາຊຽນ2024. ການຮ່ວມມືດ້ານເສດຖະກິດ, ການຄ້າແລະ ການລົງທຶນສືບຕໍ່ໄດ້ຮັບການຊຸກຍູ້, ສອງຝ່າຍໄດ້ຜັນຂະຫຍາຍຢ່າງຕັ້ງໜ້າບັນດາສັນຍາລະຫວ່າງສອງລັດຖະບານ,ຂໍ້ຕົກລົງວ່າດ້ວຍແຜນການຮ່ວມມືຂອງກອງປະຊຸມຄັ້ງທີ 46 ຄະນະກຳມະການຮ່ວມມືທະວິພາຄີລະຫວ່າງລັດຖະບານແລະ ບັນດາໝາກຜົນການຢ້ຽມຢາມຂອງການນຳຂັ້ນສູງ; ຄ່ອຍໆແກ້ໄຂຄວາມຫຍຸ້ງຍາກ, ຂໍ້ຄົງຄ້າງ, ສ້າງເງື່ອນໄຂສະດວກດ້ານກົນໄກ, ນະໂຍບາຍ ເພື່ອຊຸກຍູ້ວິສາຫະກິດຂອງຫວຽດນາມ ລົງທຶນໃນບັນດາຂົງເຂດທີ່ມີຄວາມສາມາດບົ່ມຊ້ອນ, ທ່າແຮງແລະສອດຄ່ອງກັບທິດທາງບຸລິມະສິດຂອງລັດຖະບານລາວເຊັ່ນ: ພະລັງງານສະອາດ, ພະລັງງານທົດແທນ, ກະສິກຳ, ແຮ່ທາດ, ການທ່ອງທ່ຽວ. ການຮ່ວມມືດ້ານວັດທະນະທຳ, ການສຶກສາ, ສາທາລະນະສຸກແລະວິທະຍາສາດ - ເຕັກໂນໂລຊີໄດ້ມີການພັດທະນາເປັນບາດກ້າວໃໝ່ ແລະ ບັນລຸໄດ້ໝາກຜົນ, ສອງຝ່າຍໄດ້ຜັນຂະຫຍາຍຢ່າງຕັ້ງໜ້າ “ແຜນຮ່າງການຍົກສູງຄຸນນະພາບ ແລະ ປະສິດທິຜົນການຮ່ວມມືຫວຽດນາມ - ລາວໃນຂົງເຂດການສຶກສາພັດທະນາແຫລ່ງຊັບພະຍາກອນມະນຸດ”ໄລຍະ2021-2030”; ສືບຕໍ່ຮ່ວມມືໃນຂົງເຂດວັດທະນະທຳ-ສັງຄົມ, ກິລາ, ທ່ອງທ່ຽວ, ຂ່າວສານ, ສື່ສານ, ວິທະຍາສາດແລະເຕັກໂນໂລຊີ, ປະກອບສ່ວນເພີ່ມທະວີຄວາມເຂົ້າໃຈລະຫວ່າງປະຊາຊົນສອງປະເທດ. ການຮ່ວມມືລະຫວ່າງບັນດາຄະນະພັກ,ບັນດາກະຊວງ,ຂະແໜງການຂອງລັດຖະບານ,ບັນດາອົງການຂອງສະພາແຫ່ງຊາດ, ແນວໂຮມ, ອົງການຈັດຕັ້ງປະຊາຊົນ, ບັນດາທ້ອງຖິ່ນສືບຕໍ່ໄດ້ຮັບການຮັກສາແລະເພີ່ມທະວີຢ່າງມີປະສິດທິຜົນສູງກວ່າ;ຍູ້ແຮງການຮ່ວມມື, ແຮກສ່ຽວ, ການຊ່ວຍເຫລືອເຊິ່ງກັນ ແລະ ກັນລະຫວ່າງບັນດາຫົວໜ່ວຍ,ທ້ອງຖິ່ນ ໂດຍສະເພາະແມ່ນບັນດາທ້ອງຖິ່ນທີ່ມີຊາຍແດນຕິດກັນ.
ໃນສະພາບການຫັນປ່ຽນຢ່າງວ່ອງໄວທີ່ບໍ່ເຄີຍມີມາກ່ອນ,ສັບສົນ ແລະ ບໍ່ສາມາດຄາດຄະເນໄດ້,ໄດ້ສ້າງກາລະໂອກາດແລະສິ່ງທ້າທາຍທີ່ສະຫຼັບກັນໃຫ້ແກ່ທັງຫວຽດນາມແລະລາວ. ເພື່ອປົກປັກຮັກສາ, ເພີ່ມພູນຄຸນສ້າງແລະພັດທະນາສາຍພົວພັນແບບພິເສດຫວຽດນາມ - ລາວໃຫ້ປະກົດຜົນເປັນຮູບປະທຳ, ນຳເອົາຜົນປະໂຫຍດຢ່າງແທດຈິງໃຫ້ແກ່ປະຊາຊົນທັງສອງປະເທດ, ຂ້າພະເຈົ້າເຊື່ອໝັ້ນວ່າ 2 ປະເທດພວກເຮົາ ຕ້ອງສືບຕໍ່ຄຽງບ່າຄຽງໄລ່, ເພີ່ມທະວີການແລກປ່ຽນຂໍ້ມູນຂ່າວສານ, ແບ່ງປັນປະສົບການ ແລະ ຮ່ວມມືໃນທຸກຂົງເຂດ. ໃນໄລຍະມໍ່ໆນີ້, 2 ປະເທດຄວນສຸມໃສ່ບັນດາຂົງເຂດບຸລິມະສິດຄື: ທີໜຶ່ງ,ສືບຕໍ່ນຳເອົາການພົວພັນດ້ານການເມືອງເຂົ້າສູ່ລົງເລິກ, ປະຕິບັດບັນດາຂໍ້ຕົກລົງຂັ້ນສູງເປັນຢ່າງດີ, ພິເສດແມ່ນຕ້ອງສືບຕໍ່ຮັກສາ ແລະ ຍົກສູງປະສິດທິຜົນຂອງບັນດາກົນໄກຮ່ວມມືລະຫວ່າງການນຳຂັ້ນສູງຂອງສອງປະເທດ;ເຊື່ອມຊຶມ ແລະ ຍົກສູງຄວາມຮັບຮູ້ຮ່ວມກັນກ່ຽວກັບຄວາມສຳຄັນຂອງການພົວພັນແບບພິເສດຫວຽດນາມ-ລາວໃຫ້ແກ່ປະຊາຊົນທຸກຊັ້ນຄົນທັງສອງປະເທດ. ຍູ້ແຮງການໂຄສະນາເຜີຍແຜ່ແລະສຶກສາກ່ຽວກັບມູນເຊື້ອການພົວພັນຫວຽດນາມ - ລາວ; ຈັດຕັ້ງການສະເຫລີມສະຫລອງບັນດາວັນສະເຫລີມສະຫລອງ ແລະ ເຫດການທີ່ສໍາຄັນຂອງສອງພັກ, ສອງປະເທດໃນປີ 2024 ແລະ ໂດຍສະເພາະແມ່ນປີ2025. ທີ່ສອງ, ສືບຕໍ່ປະສານສົມທົບຈັດຕັ້ງປະຕິບັດຢ່າງມີປະສິດທິຜົນບັນດາແຜນການຮ່ວມມືລະຫວ່າງສອງກະຊວງປ້ອງກັນປະເທດ ແລະ ສອງກະຊວງປ້ອງກັນຄວາມສະຫງົບ,ຮັບປະກັນສະຖຽນລະພາບດ້ານການເມືອງ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍທາງສັງຄົມຂອງແຕ່ລະປະເທດ, ເພີ່ມທະວີການແລກປ່ຽນຄະນະຜູ້ແທນ,ຜັນຂະຫຍາຍບັນດາກົນໄກເຈລະຈາກ່ຽວກັບນະໂຍບາຍປ້ອງກັນປະເທດແລະການຮ່ວມມືດ້ານຄວາມໝັ້ນຄົງໃຫ້ມີປະສິດທິຜົນສູງ. ທີສາມ,ປະຕິບັດບັນດາຂໍ້ຕົກລົງ,ສັນຍາການຮ່ວມມືລະຫວ່າງລັດຖະບານເປັນຢ່າງດີ, ບັນດາໂຄງການຮ່ວມມືລະຫວ່າງບັນດາກະຊວງ, ຂະແໜງການ ແລະທ້ອງຖິ່ນເພື່ອຍົກລະດັບການຮ່ວມມືດ້ານເສດຖະກິດລະຫວ່າງສອງປະເທດ ໂດຍຜ່ານການເປີດກວ້າງ ແລະ ຍົກລະດັບການເຊື່ອມຕໍ່ໄຄົມມະນາຄົມສາຍຕາເວັນອອກ - ຕາເວັນຕົກ;ສ້າງກົນໄກຮ່ວມມືທີ່ເປັນເອກະພາບແລະນະໂຍບາຍພິເສດ ເພື່ອປົດປ່ອຍແຫລ່ງກຳລັງ ແລະ ສ້າງເງື່ອນໄຂສະດວກທີ່ສຸດໃຫ້ບັນດາວິສາຫະກິດ ແລະ ປະຊາຊົນສອງປະເທດລົງທຶນ ແລະ ດຳເນີນທຸລະກິດ; ແກ້ໄຂຂໍ້ຄົງຄ້າງດ້ວຍວິທີທີ່ມີລັກສະນະບຸກທະລຸ; ເສີມຂະຫຍາຍບັນດາຮູບແບບການຮ່ວມມືໃໝ່ (ການຮ່ວມມືກັບຝ່າຍທີສາມ) ເພື່ອໝູນໃຊ້ໄດ້ຄວາມສາມາດບົ່ມຊ້ອນ, ທ່າແຮງຂອງ 2 ປະເທດ, ຍາດເອົາຄວາມສາມາດດ້ານແຫລ່ງທຶນ, ປະສົບການ ແລະ ເຕັກໂນໂລຢີຂອງຄູ່ຮ່ວມມື; ໝູນໃຊ້ບັນດາຂໍ້ຕົກລົງການຄ້າເສລີເພື່ອຍົກສູງປະສິດທິຜົນດ້ານການຄ້າ, ເປີດກວ້າງຕະຫລາດ ແລະ ດຶງດູດການລົງທຶນ. ສືບຕໍ່ຍົກສູງຄຸນນະພາບ ແລະ ປະສິດທິຜົນການຮ່ວມມືລົງທຶນ, ສຸມໃສ່ແກ້ໄຂບັນດາບັນຫາທີ່ຄົງຄ້າງໃນບາງໂຄງການຮ່ວມມືລະຫວ່າງ 2 ປະເທດຈຳນວນໜຶ່ງ, ຍູ້ແຮງການບັນດາເຊື່ອມຕໍ່ດ້ານພື້ນຖານໂຄງລ່າງຍຸດທະສາດ. ທີສີ່, ເອົາໃຈໃສ່ ແລະ ເພີ່ມທະວີການຮ່ວມມືໃນດ້ານການສຶກສາ, ກໍ່ສ້າງແລະພັດທະນາຊັບພະຍາກອນມະນຸດ ໂດຍສະເພາະແມ່ນການກໍ່ສ້າງແຫລ່ງຊັບພະຍາກອນມະນຸດທີ່ມີຄຸນນະພາບສູງ, ໃຫ້ບຸລິມະສິດແກ່ການກໍ່ສ້າງ ແລະ ບຳລຸງສ້າງພະນັກງານລຸ່ນໜຸ່ມ, ພະນັກງານສຶບທອດແລະພະນັກງານນຳພາ, ຄຸ້ມຄອງໃຫ້ແກ່ບັນດາກະຊວງ, ຂະແໜງການ,ທ້ອງຖິ່ນເພື່ອຕອບສະໜອງຄວາມຮຽກຮ້ອງຕ້ອງຂອງການພັດທະນາຂອງແຕ່ລະປະເທດ, ພ້ອມດຽວກັນນັ້ນ, ປະກອບສ່ວນຮັດແໜ້ນນ້ຳໃຈມິດຕະພາບຢ່າງສະໜິດຕິດແໜ້ນ, ຄວາມສາມັກຄີລະຫວ່າງປະຊາຊົນສອງປະເທດ./.
KPL