ຂປລ. ກະຊວງປ້ອງກັນປະເທດ ຈັດກອງປະຊຸມເຜີຍແຜ່-ເຊື່ອມຊຶມມະຕິເລກທີ 04/ກມສພ ແລະ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ໃຫ້ບັນດາອ້ອມຂ້າງກະຊວງປ້ອງກັນປະເທດໃນວັນທີ 8 ສິງຫາ 2024 ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນເທດ, ມີບັນດາການນໍາກະຊວງ, ບັນດາຜູ້ຕາງໜ້າ 4 ກົມໃຫຍ່, ຫ້ອງວ່າການ, ພ້ອມດ້ວຍພະນັກງານຫລັກແຫລ່ງ ເຂົ້າຮ່ວມ.

ສະຫາຍ ພົນເອກ ຈັນສະໝອນ ຈັນຍາລາດ ໄດ້ເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ເຊິ່ງເນື້ອໃນສຳຄັນມະຕິຂອງກອງປະຊຸມດັ່ງກ່າວ, ໄດ້ຕີລາຄາການຈັດຕັ້ງປະ ຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງໄດ້ໃຫ້ຮູ້ເຖິງ 9 ວຽກງານຈຸດສຸມໃນ 6 ເດືອນທ້າຍປີ 2024. ສຳລັບກ່ຽວກັບການປະຕິຮູບລັດວິສາຫະກິດ, ກໍໄດ້ມີການຕີລາຄາຢ່າງກົງໄປກົງມາ ຕໍ່ສະພາບການດຳເນີນທຸລະກິດ ຂອງລັດວິສາຫະກິດ ໃນໄລຍະຜ່ານມາ, ພ້ອມທັງໃຫ້ທັດສະນະຕ້ອງສືບຕໍ່ຢຶດໝັ້ນ ແນວທາງການສ້າງເສດຖະກິດລັດ ກໍຄື ສ້າງລັດວິສາຫະກິດ ໃຫ້ມີຄວາມເຂັ້ມແຂງ ເປັນເຈົ້າພາທາງໃນລະບົບເສດຖະກິດແຫ່ງຊາດ ແລະ ເປັນເອກະພາບກຳນົດ 5 ຈຸດສຸມປະຕິຮູບລັດວິສາຫະກິດ ໃຫ້ເຂັ້ມແຂງໃນຕໍ່ໜ້າ; ຕີລາຄາກ່ຽວກັບການຍົກສູງ ຄຸນນະພາບການດຳເນີນຄະດີ ຕາມຂະບວນຍຸຕິທໍາ, ຕາມມະຕິເລກທີ 112/ກມສພ, ລົງວັນທີ 2 ມິຖຸນາ 2020 ຂອງກົມການເມືອງສູນກາງພັກ ເຊິ່ງມະຕິກອງປະຊຸມ ແມ່ນໄດ້ເປັນເອກະພາບຕີລາຄາສູງ ຕໍ່ບັນດາຜົນສຳເລັດ ທີ່ອົງການຮັບຜິດຊອບດຳເນີນຄະດີ ຕາມຂະບວນຍຸຕິທໍາທີ່ສ້າງມາໄດ້, ພ້ອມທັງໃຫ້ທິດຊີ້ນໍາບັນຫາຈໍານວນໜຶ່ງ; ກ່ຽວກັບການປັບປຸງຄຸນນະພາບການສຶກສາ ແລະ ແກ້ໄຂບັນຫາການປະລະການຮຽນ, ການຂາດແຄນຄູສອນ ເຊິ່ງມະຕິກອງປະຊຸມໄດ້ເນັ້ນໜັກ ໃຫ້ເອົາໃຈໃສ່ 3 ບັນຫາສຳຄັນ. ພ້ອມນີ້, ມະຕິກອງປະຊຸມ ໄດ້ລະບຸເຖິງ ການກະກຽມເອກະສານຕົ້ນຕໍ ຂອງກອງປະຊຸມໃຫຍ່ ຄັ້ງທີ XII ຂອງພັກ ແລະ ບັນດາວຽດຈຸດສຸມ ແຕ່ນີ້ຮອດກອງປະຊຸມ ຄົບຄະນະ ຄັ້ງທີ 9 ໃນທ້າຍປີ 2024.

ຈາກນັ້ນ, ສະຫາຍ ພົນຕີ ສອນທອງ ພົມລາວົງ ກໍາມະການຄະນະປະຈໍາພັກ ກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ ໄດ້ເຜີຍແຜ່ເພື່ອເຊື່ອມຊຶມ ມະຕິ ເລກທີ 04/ກມສພ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ແລະ ທິດທາງລວມ, ເປົ້າໝາຍສູ້ຊົນ, ແຜນນະໂຍບາຍ ເພື່ອເພີ່ມທະວີ ການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ, ສ້າງຄວາມເຂັ້ມແຂງໃຫ້ແກ່ການຜະລິດ, ການບໍລິ ການ, ລະບົບການເງິນ-ເງິນຕາ ແລະ ການຄຸ້ມຄອງບໍລິຫານລັດ ເພື່ອເປັນພື້ນຖານໃຫ້ແກ່ ການສ້າງເສດຖະກິດ ເອ ກະລາດ ເປັນເຈົ້າຕົນເອງ ຢ່າງມີບາດກ້າວເດີນທີ່ໜັກແໜ້ນ. ທັງນີ້, ກໍເພື່ອໃຫ້ພະນັກງານຫລັກແຫລ່ງອ້ອມຂ້າງ ກະຊວງປ້ອງກັນປະເທດ ມີຄວາມເຂົ້າໃຈເລິກເຊິ່ງ ໃຫ້ການຈັດຕັ້ງປະຕິບັດມະຕິໃຫ້ໄດ້ຮັບຜົນດີ.

KPL