ຂປລ. ໂຮງຮຽນທິດສະດີການເມືອງກອງທັບ ຈັດກອງປະຊຸມສະຫລຸບວຽກງານ ນໍາພາຮອບດ້ານຂອງຄະນະພັກ ປະຈໍາປີ 2024 ແລະ ມອບບັດສະມາຊິກພັກສົມບູນ ຊຸດທີ 3 ໃນວັນທີ 15 ມັງກອນ 2025  ໂດຍການເປັນປະທານຂອງ ສະຫາຍ ພົນຈັດຕະວາ ຄໍາຜາຍ ສະພັງເໜືອ ເລຂາຄະນະພັກ, ຫົວໜ້າການເມືອງ ໂຮງຮຽນທິດສະດີການເມືອງກອງທັບ, ມີຄະນະພັກ, ຄະນະຫ້ອງ, ຄະນະວິຊາຄູ, ບັນດາພະນັກງານ-ຫລັກແຫລ່ງທົ່ວໂຮງ ຮຽນທິດສະດີການເມືອງກອງທັບ ເຂົ້າຮ່ວມ.

ສະຫາຍ ພັນໂທ ພູວັນ ທິບພະວົງ ກໍາມະການຄະນະພັກ, ຮອງຫົວໜ້າການເມືອງໂຮງຮຽນ ທິດສະດີການເມືອງກອງທັບ ໄດ້ຜ່ານບົດສະຫລຸບຕີລາຄາການນໍາພາຮອບດ້ານ ຂອງຄະນະພັກໂຮງຮຽນທິດສະດີ ການເມືອງກອງທັບ ໄລຍະ 1 ປີຜ່ານມາ, ຄະນະພັກ ໄດ້ເອົາໃຈໃສ່ສຶກສາອົບຮົມ ການເມືອງນໍາພາແນວຄິດ ໃຫ້ພະນັກງານນັກຮົບ ຮັບຮູ້ເຊື່ອມຊຶມແນວທາງນະໂຍບາຍ ແລະ ມະຕິຕ່າງໆຂອງພັກວາງອອກ, ຈັດຕັ້ງປະຕິບັດຫັນເຂົ້າສູ່ລວງເລິກຢ່າງແຂງແຮງ ໂດຍແນໃສ່ສ້າງຂະບວນການ ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນທົ່ວໂຮງຮຽນ; ຕີລາຄາຈັດປະເພດໜ່ວຍພັກໃນທົ່ວໂຮງຮຽນ, ມີໜ່ວຍພັກຖືກຮັບຮອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ 4 ສະໄໝຕິດຕໍ່ກັນ 2 ໜ່ວຍພັກ, 3 ສະໄໝ 2 ໜ່ວຍພັກ, 2 ສະໄໝ 4 ໜ່ວຍພັກ ແລະ 1 ສະໄໝ 4 ໜ່ວຍພັກ. ຈາກນັ້ນ ໄດ້ຜ່ານມະຕິຕົກລົງ ວ່າດ້ວຍການຮັບຮອງອອກບັດສະມາຊິກພັກສົມບູນ ໂດຍປະຕິບັດຕາມມະຕິຕົກລົງຂອງກົມ ການເມືອງສູນກາງພັກສະບັບເລກທີ 33/ກມສພ ແລະ ບົດແນະນໍາຂອງຄະນະຈັດຕັ້ງສູນກາງພັກ ເລກທີ047/ຄຈສພ ວ່າດ້ວຍການ ອອກບັດ-ມອບບັດຢູ່ຄະນະພັກ ກະຊວງປ້ອງກັນປະເທດ. ໃນນີ້, ຮັບຮອງການອອກບັດ-ມອບບັດ ສະມາຊິກພັກຊຸດທີ 3 ໃຫ້ບັນດາສະຫາຍສະມາຊິກພັກສົມບູນຢູ່ ຄະນະພັກໂຮງຮຽນທິດສະດີການເມືອງກອງທັບຈໍານວນ 60 ສະຫາຍ.

ໂອກາດນີ້, ສະຫາຍ ພົນຈັດຕະວາ  ຄໍາຜາຍ ສະພັງເໜືອ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ໂດຍໄດ້ ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນໄລຍະຜ່ານມາ, ພ້ອມທັງໄດ້ຮຽກຮ້ອງໃຫ້ ຄະນະພັກ-ຄະນະບັນຊາ ແຕ່ລະຂັ້ນ ສືບຕໍ່ເຮັດວຽກງານສຶກສາອົບຮົມ ການເມືອງນໍາພາແນວຄິດ ໃຫ້ພະນັກງານ-ນັກຮົບ ເຂົ້າໃຈແຈ້ງຕໍ່ແນວທາງນະໂຍບາຍ ຂອງພັກ-ລັດ , ສືບຕໍ່ຫັນລົງກໍ່ສ້າງຮາກຖານ ຕິດພັນກັບວຽກງານ 3 ສ້າງຕາມທິດນໍາຂອງພັກ, ພ້ອມນັ້ນ ຄະນະພັກແຕ່ລະຂັ້ນຕ້ອງເປັນແບບຢ່າງນໍາໜ້າ ໃນການຈັດຕັ້ງປະຕິບັດ ໃນທຸກຂົງເຂດວຽກງານ ແລະ ມີທັດສະນະຄຸນສົມບັດ, ສິນທໍາປະຕິວັດ, ຍົກສູງສະຕິລະວັງຕົວຕໍ່ກົນອຸບາຍ ຫັນປ່ຽນໂດຍສັນຕິຂອງສັດຕູ, ຕອບຕ້ານທຸກປະກົດການຍໍ້ທໍ້ ທີ່ກໍ່ໃຫ້ເກີດຄວາມບໍ່ສະຫງົບ, ຍົກສູງການປັບປຸງລະບຽບ ແບບແຜນຂອງກົມກອງ, ວຽກງານປັບປຸງກໍ່ສ້າງກົມກອງ ຕິດພັນກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ກອງ 3 ປອດ ແລະ ກອງວັດທະນະທໍາ-ນັກຮົບວັດທະນະທໍາ.

ຂ່າວ: ໄພນາລິນ

KPL