ຂປລ
ທ່ານ ລູ່ຈືຢວນ ລັດຖະມົນຕີ ກະຊວງກິດຈະການ ພົນລະເຮືອນ ຂອງ ຈີນ ກ່າວວ່າ: ຈີນ ຈະເພີ່ມ ຄວາມພະຍາຍາມ ຕອບສະໜອງ ຄວາມຕ້ອງການ ບໍລິການ ດູແລ ຜູ້ສູງອາຍຸ ທີ່ເພີ່ມຂຶ້ນ.
ຂປລ. ສຳນັກຂ່າວ ຊິນຮວາ ຂອງ ສປຈີນ, ເມື່ອບໍ່ດົນມານີ້, ທ່ານ ລູ່ຈືຢວນ ລັດຖະມົນຕີ ກະຊວງກິດຈະການ ພົນລະເຮືອນ ຂອງ ຈີນ ກ່າວວ່າ: ຈີນ ຈະເພີ່ມ ຄວາມພະຍາຍາມ ຕອບສະໜອງ ຄວາມຕ້ອງການ ບໍລິການ ດູແລ ຜູ້ສູງອາຍຸ ທີ່ເພີ່ມຂຶ້ນ. ໃນຂະນະທີ່ ຈີນ ກາຍເປັນ ສັງຄົມ ຜູ້ສູງອາຍຸ. ປັດຈຸບັນ, ຈີນ ມີປະຊາກອນ ຜູ້ສູງອາຍຸ 60 ປີຂຶ້ນໄປ ລວມມີ 297 ລ້ານຄົນ ແລະ ປະຊາກອນ ທີ່ມີ ອາຍຸ 65 ປີຂຶ້ນໄປ ຈຳນວນ 217 ລ້ານຄົນ (ຄິດໄລ່ເຖິງ ທ້າຍປີ 2023).
ເຈົ້າໜ້າທີ່ລະດັບສູງກ່ຽວຂ້ອງ ໃຫ້ຮູ້ວ່າ ລະບົບ ດູແລ ຜູ້ສູງອາຍຸ ໄດ້ຜະເຊີນກັບ ຄວາມທ້າທາຍຕ່າງໆ ເຊັ່ນ: ການບໍລິການ ຕາມເຮືອນຊານ ແລະ ເຂດຊຸມຊົນ ບໍ່ພຽງພໍ ລວມເຖິງ ພາວະການ ຂາດແຄນ ບຸກຄະລາກອນ ທ່ານໜໍ ເຮັດໃຫ້ຕ້ອງ ເລັ່ງແກ້ໄຂ ປັບປຸງ. ປັດຈຸບັນ, ຈີນ ພະຍາຍາມ ສ້າງສະພາບ ແວດລ້ອມ ການເຄົາລົບ ຜູ້ສູງອາຍຸ, ຍົກລະດັບ ການບໍລິການ ໃນເຂດ ຊົນນະບົດ ແລະ ຮັບປະກັນວ່າ ຜູ້ສູງອາຍຸ ທຸກຄົນ ສາມາດ ເຂົ້າເຖິງບໍລິການ ດູແລ ຜູ້ສູງອາຍຸ ຂັ້ນພື້ນຖານ. ນອກຈາກນັ້ນ ຈີນ ຈະເພີ່ມຄວາມ ພະຍາຍາມ ພັດທະນາ ການບໍລິການ ຈັດລ້ຽງ ອາຫານ ໃຫ້ແກ່ຜູ້ສູງອາຍຸ , ເພີ່ມຂິດ ຄວາມສາມາດ ໃນການ ດູແລ ຜູ້ສູງອາຍຸ ຕາມເຮືອນຊານ ແລະ ປັບປຸງ ສິ່ງອຳນວຍ ຄວາມສະດວກ ໃນເຂດຊຸມຊົນ ເພື່ອຕອບ ສະໜອງ ຄວາມຕ້ອງການ ຂອງ ຜູ້ສູງອາຍຸ ໃຫ້ດີຂຶ້ນຕື່ມອີກ. /
KPL
