ຂປລ
ແຫລ່ງຂ່າວໃນກະຊວງຮ່ວມປະເທດ ສ.ເກົາຫລີ ກ່າວເຖິງສະຖານະການ ນໍ້າຖ້ວມ ທີ່ເມືອງ ຊິນອິນຈູ ແລະ ເມືອງ ອິນຈູ ໃນແຂວງ ພະຢອງອັນເໜືອ ຂອງສປປ ເກົາຫລີ ຊຶ່ງຕິດກັບເມືອງ ຕານຕົງໃນແຂວງ ຫລຽວໜິງ ທາງຕາເວັນອອກສຽງເໜືອຂອງ ສປຈີນ ເຮັດໃຫ້ມີຜູ້ເສຍຊີວິດ ແລະ ສູນຫາຍ ຢ່າງຫລວງຫລາຍ
ຂປລ.ສຳນັກຂ່າວ ຕ່າງປະເທດ ລາຍງານຈາກ ນະຄອນຫລວງ ເຊອຸນ ຂອງ ສ.ເກົາຫລີ ເມື່ອວັນທີ 1 ສິງຫານີ້ວ່າ: ແຫລ່ງຂ່າວໃນກະຊວງຮ່ວມປະເທດ ສ.ເກົາຫລີ ກ່າວເຖິງສະຖານະການ ນໍ້າຖ້ວມ ທີ່ເມືອງ ຊິນອິນຈູ ແລະ ເມືອງ ອິນຈູ ໃນແຂວງ ພະຢອງອັນເໜືອ ຂອງສປປ ເກົາຫລີ ຊຶ່ງຕິດກັບເມືອງ ຕານຕົງໃນແຂວງ ຫລຽວໜິງ ທາງຕາເວັນອອກສຽງເໜືອຂອງ ສປຈີນ ເຮັດໃຫ້ມີຜູ້ເສຍຊີວິດ ແລະ ສູນຫາຍ ຢ່າງຫລວງຫລາຍ, ໂດຍລັດຖະບານ ສ.ເກົາຫລີ ປະເມີນຈຳນວນຜູ້ເສຍຊີວິດໄວ້ທີ່ລະຫວ່າງ 1.100-1.500 ຄົນ. ໃນນີ້ມີ ເຈົ້າໜ້າທີ່ກູ້ໄພ ລວມຢູ່ໃນຈໍານວນຜູ້ເສຍຊີວິດ ອີກດ້ວຍ, ເນື່ອງຈາກ ເຮລີກົບແຕ້ ຂອງໜ່ວຍງານທີ່ປະຕິບັດໜ້າທີ່ ຊ່ວຍເຫລືອ ເກີດອຸບັດເຫດ ຕົກກະແທກພື້ນ ລະຫວ່າງພະຍາຍາມລົງຈອດ.ສຳນັກງານກາແດງ ສ.ເກົາຫລີ ອອກຖະແຫລງການ ສະແດງຄວາມພ້ອມ ມອບການຊ່ວຍເຫລືອ ດ້ານມະນຸດສະທຳ ໃຫ້ແກ່ຜູ້ປະສົບໄພນໍ້າຖ້ວມ ໃນສປປເກົາຫລີ , ຖືເປັນການສະແດງນໍ້າໃຈໄມຕີຈິດ ມິດຕະພາບ ທີ່ບໍ່ເຄີຍເກີດຂຶ້ນມາກ່ອນ. ຂະນະທີ່ ທ່ານ ຄິມ ຈອງ ອຸນ(Kim Jong-un),ຜູ້ນຳສູງສຸດ ສປປ ເກົາຫລີ ລົງພື້ນທີ່ ຜະເຊີນ ໄພນ້ຳຖ້ວມ ໃນເມືອງຊິນເອີຍຈູ ແລະ ຈັດກອງປະຊຸມສຸກເສີນ ຄະນະກຳມະການກາງ ຂອງພັກແຮງງານ ເພື່ອປຶກສາຫາລື ກ່ຽວກັບ ການໃຊ້ຄວາມຊ່ວຍເຫລືອ ປະຊາຊົນ ຢ່າງຮີບດ່ວນ ຍ້ອນໄດ້ຮັບອິດທິພົນຂອງພາຍຸ ແຄມີ ຢ່າງຮຸນແຮງ ຊຶ່ງພັດຜ່ານ ຟີລິບປິນ,ເຂດບໍລິຫານພິເສດ ໄຕ້ຫວັນຂອງສປ ຈີນ ໂດຍໃນຈີນ ມີລາຍງານ ຜູ້ເສຍຊີວິດ ຢ່າງໜ້ອຍ 15ຄົນ ແລະ ໃນຟີລິບປິນ ມີຜູ້ເສຍຊີວິດ ຫລາຍກວ່າ 20ຄົນ./.
KPL
