ຂປລ
ທ່ານ ເຫລັກໄຫລ ສີວິໄລ ກໍາມະການສູນກາງພັກເລຂາພັກແຂວງເຈົ້າແຂວງເຊກອງ ໄດ້ລາຍງານໃຫ້ຮູ້ວ່າ: ສໍາລັບການພັດທະນາເສດຖະກິດຂອງແຂວງ, ເຖິງແມ່ນວ່າຈະປະເຊີນກັບຄວາມຫຍຸ້ງຍາກອັນໜັກໜ່ວງດ້ານການເງິນ-ເງິນຕາ ແລະ ລາຄານ້ໍາມັນ, ລາຄາສິນຄ້າແພງ.
*ທ່ານ ເຫລັກໄຫລ ສີວິໄລ ກໍາມະການສູນກາງພັກເລຂາພັກແຂວງເຈົ້າແຂວງເຊກອງ ໄດ້ລາຍງານໃຫ້ຮູ້ວ່າ: ສໍາລັບການພັດທະນາເສດຖະກິດຂອງແຂວງ, ເຖິງແມ່ນວ່າຈະປະເຊີນກັບຄວາມຫຍຸ້ງຍາກອັນໜັກໜ່ວງດ້ານການເງິນ-ເງິນຕາ ແລະ ລາຄານ້ໍາມັນ, ລາຄາສິນຄ້າແພງ, ຄະນະພັກແຂວງພວກເຮົາກໍສາມາດຢັບຢັ້ງການເກີດວິກິດການຮ້າຍແຮງດ້ານເສດຖະກິດ, ທັງສາມາດຮັກສາການເຕີບໂຕດ້ານເສດຖະກິດ ໂດຍສະເລ່ຍຄື: ປີ 2023 ບັນລຸ 5,5%, ສະເລ່ຍ 3 ປີ ບັນລຸໄດ້ 4,2%, ລາຍຮັບສະເລ່ຍຕໍ່ຫົວຄົນບັນລຸ 917 ໂດລາໃນ 6 ເດືອນຕົ້ນປີ 2024 ບັນລຸ 6%.
ການສ້າງຖານການຜະລິດ ເພື່ອທົດແທນການນໍາເຂົ້າແມ່ນໄດ້ເກີດມີໜໍ່ແໜງຄື: ແຂວງສາມາດກຸ້ມຕົນເອງດ້ານໄຂ່, ຊີ້ນໝູ, ງົວ-ຄວາຍ ແລະ ພືດ ຜັກຈໍານວນໜຶ່ງ. ການເກັບລາຍຮັບເຂົ້າງົບປະມານບັນລຸໄດ້ 234,30 ຕື້ກີບ, ການນໍາເຂົ້າສິນຄ້າປະຕິບັດໄດ້ທັງຫມົດ 1,14 ລ້ານໂດລາ, ການສົ່ງອອກສິນຄ້າບັນລຸໄດ້ 86,53 ລ້ານໂດລາ, ເຮັດໃຫ້ເກີນດຸ່ນການຄ້າປະມານ 85,39ລ້ານໂດລາ, ການສົ່ງອອກສ່ວນຫລາຍແມ່ນກະແສໄຟຟ້າ, ຖ່ານຫີນ ແລະ ຜົນຜະລິດກະສິກໍາເຊັ່ນ: ມັນຕົ້ນແຫ້ງ, ແປ້ງມັນຕົ້ນ, ກາເຟ, ພືດຜັກ ແລະ ສັດໃຫຍ່ຈໍານວນໜຶ່ງ. ສະພາບການລົງທຶນລວມໃນ 6 ເດືອນຕົ້ນປີ 2024 ໄດ້ທັງໝົດ 320,26 ຕື້ກີບ, ໃນນັ້ນ ການລົງທຶນຈາກງົບປະມານລັດໂດຍກົງ 63,30 ຕື້ກີບ,ທຶນຊ່ວຍເຫລືອ ແລະ ກູ້ຢືມ 117,48 ຕື້ກີບ ຫລື 5 ລ້ານໂດລາ, ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ (ລົງທຶນໃໝ່) 6,34 ລ້ານໂດລາ ຫລື ເທົ່າກັບ 139,48 ຕື້ກີບ, ອັນພົ້ນເດັ່ນໂຄງການລົງທຶນຂອງພາກເອກະຊົນພາຍໃນ ແລະ ຕ່າງປະເທດ 2 ໂຄງການໃຫຍ່ເປັນຕົ້ນ: ໂຄງການພັດທະນາໄຟຟ້າພະລັງງານລົມ (ມູນຊູນວິນ) 600 MW ໄດ້ປະຕິບັດໂຄງການສໍາເລັດໂດຍລວມ 70%, ປະກອບສ່ວນສ້າງວຽກເຮັດງານທໍາໃຫ້ຄົນລາວກໍຄືຄົນທ້ອງຖິ່ນໄດ້ 2.000 ກວ່າຄົນ. ໂຄງການຂຸດຄົ້ນປຸງແຕ່ງແຮ່ຖ່ານຫີນ ເພື່ອສົ່ງອອກ ແລະ ສ້າງຕັ້ງໂຮງງານໄຟຟ້າຄວາມຮ້ອນຖ່ານຫີນຂອງບໍລິສັດພະລັງງານໄຟຟ້າເຊກອງຈໍາກັດ (ກຸ່ມບໍລິສັດພອນສັກ) ນອກຈາກການຂຸດຄົ້ນປຸງແຕ່ງຖ່ານຫີນສົ່ງອອກສ້າງລາຍຮັບໃຫ້ລັດແລ້ວຍັງໄດ້ປະກອບສ່ວນສ້າງວຽກເຮັດງານທໍາໃຫ້ປະຊາຊົນໄດ້ເຖິງ 3.000 ກວ່າຄົນສັງລວມແລ້ວ, ທັງສອງບໍລິສັດໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງແຂວງ ທັງເປັນກໍາລັງດັນຊຸກຍູ້ເສດຖະກິດຂອງແຂວງ ຂະຫຍາຍຕົວໄປຕາມທິດທີ່ໄດ້ກໍານົດໄວ້. ບັັນດາອົງການບໍລິຫານລັດທຸກຂັ້ນ ໄດ້ຮັບການປັບປຸງໄປຕາມທິດກະທັດຮັດ, ສົມເຫດສົມຜົນ, ຫລຸດຜ່ອນຂັ້ນຂອດ, ສິ່ງກີດຂວາງທີ່ອັດຕັນໃນການພັດທະນາເສຖະກິດ-ສັງຄົມ,ການບໍລິການຮັບໃຊ້ປະຊາຊົນຫລຸດລົງເທື່ອລະກ້າວ, ຖ້າທຽບໃສ່ເມື່ອກ່ອນແມ່ນດີຂຶ້ນກວ່າເກົ່າ.
ການພົວພັນຮ່ວມມືກັບບັນດາປະເທດເພື່ອນມິດຍຸດທະສາດ ສສ ຫວຽດນາມ ຂະຫຍາຍຕົວສູ່ລະດັບສູງອັນໃໝ່. ພ້ອມນັ້ນ ຍັງສືບຕໍ່ເປີດກວ້າງການຮ່ວມມືສາກົນຫລາກຫລາຍຮູບແບບ ແລະ ຫລາຍລະດັບບົນພື້ນຖານຢຶດໝັ້ນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ປະກອບສ່ວນສໍາຄັນເຂົ້າໃນການປົກປັກຮັກສາສັນຕິພາບ, ການຮ່ວມມືພັດທະນາ ຢູ່ໃນພາກພື້ນກໍຄືກັບບັນດາແຂວງພາກກາງ ສສ ຫວຽດນາມ. ສໍາລັບການລາຍງານຕົວແບບດ້ານການຜະລິດ, ການຄຸ້ມຄອງບໍລິຫານ, ການກໍ່ສ້າງຮາກຖານການເມືອງ ແມ່ນກໍາລັງສຸມໃສ່ໃຫ້ພາກສ່ວນດັ່ງກ່າວ ກະກຽມດ້ານເນື້ອໃນ ເພື່ອຄັດເລືອກ ແລະ ໄປປະກອບຄໍາເຫັນຕໍ່ກອງປະຊຸມໃຫຍ່ອົງຄະນະພັກເມືອງ, ຫລັງຈາກນັ້ນຈະໄດ້ຄັດເລືອກມາປະກອບຄໍາເຫັນຢູ່ກອງປະຊຸມໃຫຍ່ຄັ້ງທີ XI ອົງຄະນະພັກແຂວງເຊກອງ, ແລ້ວ ຈຶ່ງຈະໄດ້ສົ່ງໄປປະກອບຄໍາເຫັນໃນກອງປະຊຸມໃຫຍ່ຄັ້ງທີ XII ຂອງພັກ.
ແຫລ່ງຂໍ້ມູນ: ຈາກແຂວງເຊກອງ
KPL
